Bagong Programa sa Pansirkitong Asamblea
‘Otoba an mga Togon nin Dios Asin Mabuhay’ an tema kan programa sa duwang aldaw na pansirkitong asamblea na mapoon sa Pebrero. (Tal. 4:4) Idodoon kaiyan kun taano an pagkuyog sa mga pagboot nin Dios ta bakong magabat. Apuera kaini, ipaheheling kaiyan kun paano an paggibo kan kabotan nin Dios nagtatao nin kaginhawahan asin tunay na kaogmahan patin paglaom para sa ngapit.—Mat. 11:28-30; Juan 13:17.
An mga boot na magpabautismo sa asamblea bilang pagkuyog sa pagboot ni Cristo maninigong makipag-olay sa nangengenot na paraataman, asin magibo sia nin kinakaipuhan na mga areglo.—Mat. 28:19, 20.
Ipaliliwanag nin sarong simposium an praktikal na mga paagi na ikapaheheling niato an pagkamoot sa Dios asin sa satong mga tugang. (Juan 13:34, 35; 1 Juan 5:3) Iiiba sa programa an nakapupukaw sa puso na hatol gikan sa Salmo 19 asin 119. Minsan ngani an ipinasabong na konseho sa mga salmong ini isinurat kaidtong rinibong taon na an nag-agi, masasabotan niato kun paano kita personalmenteng nakikinabang dian ngonyan.
An pahayag-publiko na itatao kan paraataman sa distrito may temang ‘Matakot sa Dios Asin Otobon an Saiyang mga Togon.’ (Ecl. 12:13) Ipaheheling kan pangultimong pahayag kan paraataman sa sirkito kun paano makukua nin mga hoben an pinakamarahay sa buhay ngonyan asin kun taano sinda ta makakokompiar sa daing katapusan na ngapit. Tataposon kan paraataman sa distrito an programa paagi sa pagsabi kan dakol na pakinabang na minagikan sa pamumuhay sono sa “makahadeng ley” nin pagkamoot. (Sant. 2:8) Tunay nanggad na ini sarong programa sa asamblea na mayo ni saro na bobooton na mapaltahan!