Bagong Programa sa Pansirkitong Asamblea
Anong praktikal na mga pakinabang an inaako nindo ngonyan sa paglakaw sa kaibanan ni Jehova? Paano nindo mapaglalabanan an sugot na togotan an bakong teokratikong mga okupasyon na halean nin panahon an intereses kan Kahadean sa enot na lugar sa saindong buhay? (Mat. 6:33) Nadedepisilan daw kamo na mamansayan an tama sa sala sa sarong kinaban na pinaluluwas na tama an sala? (Heb. 5:14) An mga bagay na ini tatawan nin atension sa “Makinabang Ngonyan Paagi sa Paglakaw sa mga Dalan nin Dios” na pansirkitong asamblea, na mapoon sa Pebrero 2000.—Sal. 128:1.
An sarong bagong kabtang sa Sabado kan pansirkitong asambleang ini iyo an presentasyon nin sarong modelong Pagtiripon sa Paglilingkod. Iimpormaran kan saindong paraataman sa sirkito an mga kongregasyon kun ano an iinareglo tanganing an gabos makaatender na andam na makinabang nin lubos sa programa.
An kabtang na may temang “Mga Payunir—Magmaan na Marhay sa Saindong Paglakaw” ipaheheling sa sato kun paano gagamiton an kadonongan asin pagkarasonable tangani na tuboson an angay na panahon para sa ministeryo bilang payunir. (Efe. 5:15-17) An temang “Magmaan sa mga Dalan na Garo Baga Tama” totokdoan kita kun paano masisierto an inaako nin Dios sa lambang aspekto nin buhay. An pahayag na “Kun Paano Nakakaapekto sa Sato an Naotob na Hula” makatatabang na panoon an satong isip asin puso nin pagkamoot sa Tataramon nin Dios. An pahayag-publiko na “Mga Dalan nin Dios—Kanigoan Kapakipakinabang!” idodoon an praktikal na mga pakinabang na inaako ngonyan sa padagos na pag-otob sa matanos na mga kahagadan ni Jehova.
Mawot daw nindong ipaheling sa publiko paagi sa bautismo sa tubig na boot nindong lumakaw sa mga dalan nin Dios bilang saro sa saiyang nagdusay na mga lingkod? Kun siring makipag-olay sa nangengenot na paraataman tanganing magibo an kinakaipuhan na mga areglo.
Magin determinado na dai paglipasan an napapanahon na pansirkitong asambleang ini. Magin presente sa bilog na duwang aldaw na programa, huli ta “maogma an gabos na natatakot ki Jehova, na naglalakaw sa saiyang mga dalan.”—Sal. 128:1.