Bagong Programa nin Pansirkitong Asamblea
1 Poon sa Pebrero, 1996, an magigin tema para sa pansirkitong mga asamblea “Maghinanyog Asin Makanood na Otobon an Tataramon nin Dios.” An temang ini, na basado sa Deuteronomio 31:12, 13, nagtatao nin angay na basihan para sa bilog na programa na matampok nin mga leksion na kaipuhan niatong manodan asin iaplikar.
2 Dawa ngani an kadaklan na tawo ngonyan naghihinanyog sa nakadadayang ipinasabong na mga kapahayagan, nangangaipo nanggad na an kada saro sa sato maghinanyog sa Tataramon nin Dios asin makanood na otobon iyan. (Luc. 11:28; 1 Tim. 4:1) Isinasaisip ini, dinisenyo an programa nin pansirkitong asamblea tanganing pakosogon asin tabangan an mga parahayag, pamilya, kamagurangan, asin payunir. Sa Sabado, magkakaigwa nin apat na kabtang na simposium sa temang “Pakapanggana sa Satong mga Problema—Paagi sa Pagtaong Atension sa Tataramon nin Dios.” Asin sa Domingong aga, magkakaigwa nin simposium na may temang “Kun Paano an Kasuratan Nagdidisiplina sa Katanosan.” Iaatubang kan bilog na programa an espirituwal na pampakosog na dai maninigong mapaltahan nindo asin kan saindong pamilya.
3 Pareho sa Sabado asin Domingo, itatao asin idedemonstrar an praktikal na mga suhestion para sa ministeryo sa langtad. Iaatubang man an nakapakokosog asin nakapagtotokdong mga eksperyensia asin interbio. Sa siring, paagi sa pagigin presente asin paghinanyog na may katuyohan na iaplikar an saindong nanodan, magigin mas marahay an saindong kamugtakan na lubos na mag-otob kan mga pagboot sa Tataramon nin Dios.
4 An saro sa tampok na mga kabtang kan pansirkitong asamblea iyo an bautismo nin bago pa sanang magdusay na mga tugang na lalaki asin babae. Bueno bago kaining pampublikong pagpahayag kan saindang pagdusay, maninigong sabihon kan mga kandidato sa nangengenot na paraataman an saindang pagmawot na magpabautismo tanganing ikaareglo nia na kaolayon sinda kan kamagurangan.
5 An pahayag-publiko para sa serye kan pansirkitong asambleang ini may temang “Taano ta Dapat na Magpagiya sa Biblia?” Bago pa an asamblea, ponan nang mag-imbitar nin interesadong mga tawo na umatender. Bilang pag-antisipar sa kinakaipuhan na gayong pampakosog asin tabang na aakoon nindo asin kan saindong pamilya, gumibo nin depinidong mga plano na magin presente sa bilog na programa.