Bagong Programa sa Pansirkitong Asamblea
1 An temang ipapaliwanag sa bagong programa sa pansirkitong asamblea na mapoon sa Pebrero iyo an “Magpuka Kamo, Magin Marigon, Magin Makosog.” Basado ini sa mga tataramon nin pagpapakosog ni Pablo sa 1 Corinto 16:13.
2 Mapoon an programa paagi sa pagtampok kan satong danay na pangangaipo nin espirituwal na pagsiyasat sa sadiri. An pagpapadanay nin marigon na paninindogan sa kun ano an tama sa “huring mga aldaw” na ini naghahagad nin pagsiyasat sa satong relasyon ki Jehova asin sa satong paninindogan sa saiyang daganon na organisasyon. (2 Tim. 3:1) Kaipuhan kitang tokdoan sa mga paagi na mapaoswag an satong Kristianong mga kuwalidad asin mapagdanay an marahay na halimbawa nin paggawe.
3 Idodoon man an pangangaipo na magin maigot sa paggibo nin mga disipulo mientras na pinag-aaabot an espirituwal na pag-oswag asin paninimbagan. Itatampok sa manlaenlaen na pahayag, demonstrasyon, asin pag-orolay an praktikal na mga suhestion kun paano an mga indibiduwal asin pamilya puwedeng makapadanay nin regular na programa nin espirituwal na pagkakan.
4 Sa Sabado an kuwalipikadong mga kandidato makakapahayag sa publiko kan saindang pagdusay paagi sa bautismo sa tubig. Dangan, sa Domingo bobooton niato gabos na magin presente para sa pahayag publiko, na may titulong “Ano an Saindong Kamugtakan sa Dios?”
5 Matatapos an programa paagi sa pampakosog na magdanay na marigon sa pagtubod, na perming nakikiiba sa lambang saro sa espiritu nin pagkamoot asin katoninongan. An pansirkitong asamblea saro sa mga oportunidad na itinatao ni Jehova para sa sato na ‘magdagka sa lambang saro sa pagkamoot asin sa marahay na mga gibo.’ (Heb. 10:24, 25) Gumibo nin depinidong mga plano na magin presente sa bilog na programa kan duwang aldaw.