Siertohon an Orog na Mahalagang mga Bagay
1 An suplemento kan Marso, 1987 An Satong Ministeryo sa Kahadean nagpaisi nin mga areglo para sa espesyal na aldaw nin asamblea sa kada sirkito poon 1988. Poponan niato an areglong ini sa Marso, 1988 digdi sa Pilipinas. Sa nagkapirang kaso tibaad posible na an sarong espiker na taga-Bethel makaibanan sa programa kan paraataman sa sirkito asin iba pang kamagurangan sa sirkito. Gigibohon man an areglo para sa bautismo.
2 An tema kan programa sa enot na espesyal na aldaw nin asamblea iyo an “Siertohon an Orog na Mahalagang mga Bagay.” (Fil. 1: 9, 10) An mga boot na magkamit kan kaligtasan na ipinanuga ni Jesus dapat na humirong may kadonongan asin daing pag-atraso. (Luc. 21:28) Kaipuhan ninda an tabang sa pakakua nin simbag sa saindang mga hapot asin sa marigon na paninindogan para sa katotoohan. May itataong praktikal na impormasyon sa kun paano gigiyahan sa organisasyon an mga bagohan.
3 Apuwera sa pagtabang sa iba na magtalubo sa espirituwal, an lambang saro sa sato kaipuhan na padagos na umoswag sa espirituwal. An programa nagtatao nin atension sa seryosong bagay na ini paagi sa pagtao nin nakatatabang na mga suhestion tanganing ipaheling kun ano an magigibo kan pagsiyasat sa mas hararom na mga bagay sa Tataramon nin Dios. —1 Cor. 2:10.
4 An sarong kabtang kan programa matao nin nakakokombensir na ebidensia sa satong pagigin kuwalipikado nanggad na maglingkod bilang mga ministro nin Dios. Sa huring kabtang, makakadangog kamo nin mga eksperyensia asin report na nagpapaheling na an organisasyon ni Jehova nag-aabante, asin mapakokosog kamo na makidungan dian.
5 Ipaaaram saindo kan saindong paraataman sa sirkito kun ano an mga areglo para sa espesyal na aldaw nin asamblea sa saindong sirkito. Siertohon na yaon kamo para sa programa sa bilog na aldaw.