Maghinanyog sa Makahulang Tataramon

¹ “An makahulang tataramon orog pa niatong nasierto.” (2 Ped. 1:19) Taano ta sinabi ini ni Pedro? An mga hula sa Kahadean sa Hebreong Kasuratan siring man sa mga tataramon mismo ni Jesu-Cristo napatunayan na, o ‘orog pang nasierto,’ paagi sa naheling asin nadangog ni Pedro asin nin duwa pang disipulo sa eksena kan transpigurasyon mga 32 na taon an nakaagi. Inasegurar sa sainda kan dramatikong bisyon na ini na si Jesu-Cristo talagang mapapasa kapangyarihan kan Kahadean na igwa nin lubos na suporta kan saiyang Ama. An mga Kristiano kan enot na siglo ‘marahay an ginigibo sa paghinanyog sa makahulang tataramon bilang sarong ilawan na nagliliwanag.’ An paghinanyog sa makahulang tataramon magpapadanay sa sainda na alisto sa pagbanaag kan bagong aldaw, kun an “bitoon nin makaaaga,” si Cristo, sumirang sa kamurawayan kan Kahadean.​—2 Ped. 1:​16-19; Mat. 17:​1-9.

² Mayo kita duman sa kaibahan ni Pedro tanganing maheling an mamuraway na transpigurasyon. Minsan siring, an mga Kristiano sa kapag-arakian na ini na naghinanyog sa makahulang tataramon nagkapribilehiyo na maheling an dai mapagdududahan na ebidensia na an mamuraway na Hade tunay na namamahala na! Kada taon poon kan 1914, an makahulang tataramon orog na nasisierto mantang naheheling niato an pagkaotob kan dakol na kabtang kan “tanda” na itinao ni Jesus dapit sa saiyang makahadeng “presensia.” An sarong mahalagang kabtang kan tandang iyan iyo na an pagpaisi kan saiyang gobyerno gigibohon sa gabos na nasyon bago laglagon kan Hade an palakaw na ini nin mga bagay. Sa paggiya ni Cristo, an paghuhulit kan Kahadean ginigibo ngonyan sa 231 kadagaan. (Mat. 24:​3-14) Saro pa, mantang nagdadangadang an “dakulang kahorasaan,” an natutukaw na sa tronong Hade tinitipon an “sarong dakulang kadaklan” na nakakamansay man sa saiyang presensia.​—Kap. 7:​9, 10, 14.

³ Mantang suminirang na an “bitoon nin makaaaga,” an boot sabihon, si Cristo napasa kapangyarihan na kan Kahadean, igwa pa daw giraray nin dahelan na maghinanyog sa makahulang tataramon? Igwa! An pinamuraway na si Jesu-Cristo tinawan si apostol Juan nin sunod-sunod na bisyon na minabilog sa librong Kapahayagan. An mga ini igwa nin espesyal na halaga sa sato na nabubuhay sa “aldaw kan Kagurangnan.” (Kap. 1:10) Sa dahelan na iyan an gabos sa banwaan ni Jehova dai mahaloy magibo nin dugang pang pag-adal sa librong Revelation.

⁴ “Maogma an nagbabasa nin makosog asin nagdadangog sa mga tataramon kan hulang ini, asin an nagkukuyog sa mga bagay na nasusurat dian; huli ta harani na an itinalaan na panahon.” (Kap. 1:3) Kun boot niatong magin maogma, kaipuhan kitang makasabot, iyo, magkaigwa nin tunay na pakasabot, sa makahulang mga bisyon na ini. Ano an hinahagad kaini? Kinakaipuhan an pag-otro tanganing ikalaog sa satong puso an kahulogan kan kasaysayan sa Kapahayagan. Minidbid ni apostol Pedro, sarong miembro kan namamahalang grupo kan enot na siglo, an halaga nin pag-otro sa pundamental na mga katotoohan tanganing “pukawon” sa espirituwal an saiyang mga tugang. (2 Ped. 1:​12, 13) An “maimbod asin madonong na oripon” sa modernong aldaw tinatabangan man kita paagi sa paorootrong pagdara kan satong atension sa makahulang tataramon.​—Mat. 24:​45-47.

⁵ Kun Paano Maghihinanyog: Anong klaseng atension an maninigong itao sa makahulang tataramon sa Kapahayagan? Pinagigirumdom kita ni apostol Pablo na an Dios dai nakipag-olay sa mga Kristiano paagi sa mga anghel o propeta siring kan ginibo nia bago pa ki Cristo. Imbes, si Jehova nakikomunikar sa sato paagi sa saiyang pinakapadangat na Aki, na ninombrahan niang “paramana kan gabos na bagay.” (Heb. 1:​1, 2) “Kaya ngani kinakaipuhan na kita magtao nin orog kisa dating atension sa mga bagay na satong nadangog, tanganing dai nanggad kita ikaanod.” (Heb. 2:1) Iyo, kaipuhan kitang maghinanyog nangorogna sa makahulang tataramon na minaabot paagi ki Jesu-Cristo. Paano daw kita makakatao nin espesyal na atension sa pag-adal niato sa Kapahayagan?

⁶ Enot, importante na magin presente kada semana sa Pag-adal sa Libro kan Kongregasyon. Totoo, para sa dakol sa sato, ini an ikatolong beses na pinag-adalan niato an librong Revelation. Kaya, an iba tibaad garo dai isaboot an pag-atender sa pag-adal sa libro, na naghohona na dawa mapaltahan ninda an sarong pagtiripon, dati na sindang pamilyar sa materyal. Minsan siring, sa kada minaaging taon, an makahulang impormasyon na ini nagigin mas napapanahon pa ngani kisa kaidtong 1989 kan enot niatong pinag-adalan an librong Revelation. Kita gabos kaipuhan na magin alisto sa mga pangyayari sa presenteng aldaw na marikas na nag-aabante bilang kaotoban kan mga hula sa Kapahayagan. Gibohon na personal nindong pasohan na dai mapaltahan an sarong pag-adal sa libro, kun mahihimo man sana, durante kan importanteng pag-aradal na ini sa Kapahayagan.

⁷ Ikaduwa, andamon na marhay an saindong leksion. Helingon an sinitar na mga teksto asin horophoropon kun paano iyan minasuportar sa pagpaliwanag kan mga bersikulo sa Kapahayagan na pinag-aadalan. Sa paaging ini bako sanang mga simbag sa mga hapot an manonodan nindo. Maghingoang kumua bako sana nin kaaraman kundi nin kadonongan asin pakasabot. (Tal. 4:7) Ikatolo, aktibong magpartisipar paagi sa mga pagkomento asin pagbasa sa mga teksto. Gibohon na pasohan na makasimbag nin kisuerra saro asin mas marahay nin nagkapirang beses sa kada pag-adal. An paggibo kaiyan matabang saindo na papagdanayon an saindong isip na nakasentro sa leksion.

⁸ An pagtao nin orog kisa sa dating atension sa makahulang tataramon bako sanang pag-andam, pag-atender, asin pagpartisipar an kabale. Nangangahulogan man iyan na dawa pakatapos kan pag-adal, nagpapadagos kitang ‘maghorophorop sa mga bagay na ini, na ipanongod dian an bilog tang buhay.’ (1 Tim. 4:15) Tanganing an makahulang tataramon magin ilawan na nagliliwanag sa satong puso, iyan dapat na hararom na makaapektar sa satong panlaog na persona​—sa satong kaisipan, mga kamawotan, emosyon, motibasyon, asin pasohan. (2 Ped. 1:19) Kaya, maninigo tang hapoton an satong sadiri: Ano an kahulogan sa sako personalmente kan impormasyon na ini? Ano an sakong nanodan manongod ki Jehova asin sa saiyang Aki, si Jesu-Cristo? Nasasabotan ko daw sa sakong puso an pinag-aadalan? Paano ko ikakaaplikar an mga katotoohan na ini sa sakong buhay? Sa sakong pamilya? Sa kongregasyon? Paagi sa paggibo nin praktikal na pag-aplikar kan satong nanonodan, makasasabi kita nin siring kan sa salmista: “An saimong tataramon ilawan sa sakong bitis, asin liwanag sa sakong dalan.”​—Sal. 119:105; Job 29:​3, 4.

⁹ Magdanay na Puka sa Delikadong mga Panahon: Kan taon 33 C.E., pinatanidan ni Jesus an saiyang mga disipulo dapit kan maabot na pagkalaglag kan Jerusalem asin kan senyal na sinda maninigong dumulag pasiring sa sarong ligtas na lugar. (Luc. 19:​41-44; 21:​7-21) Dangan, uminagi an labing 30 taon. An ibang Kristianong taga-Judea puwedeng naghona na dai nang gayo magkakaigwa nin pagkaliwat sa haraning ngapit. Napapanahon nanggad an sadol ni apostol Pedro sa saiyang ikaduwang surat, na ginibo mga 64 C.E., na ‘maghinanyog sa makahulang tataramon’! (2 Ped. 1:19) Dai nahaloy pakatapos kaiyan, kan 66 C.E., an Jerusalem sinalikopan kan mga hukbong Romano. Kan an hukbong Romano biglang umatras, an mga Kristianong taga-Judea na puka nagsunod sa mga instruksion ni Jesus asin nagdulag. Dangan, kan 70 C.E., an mga hukbong Romano nagbuwelta asin biyong linaglag an Jerusalem. Siertong naogma an mga Kristianong idto na sinda naghimateng marhay sa makahulang tataramon ni Jesus!

¹⁰ Sa ano kitang mga Kristiano sa modernong aldaw dapat na magin puka? Sa mga bisyon sa Kapahayagan, pinatanidan ni Jesus an mga Kristiano na mabubuhay sa aldaw kan Kagurangnan dapit kan dakol na mangyayari dai mahaloy. Durante kan nakaaging 80 taon, naotob na an nagkapira sa mga pangyayaring ini: an pakamundag kan Kahadean; an ralaban sa langit, kasunod an pag-apon ki Satanas asin sa saiyang mga demonyo sa palibot kan daga; an pagbagsak kan Dakulang Babilonya; asin an pagigin prominente kan mapulang mabangis na hayop, an ikawalong kapangyarihan pankinaban. An kaotoban kan mga kabtang na ini kan makahulang tataramon sa Kapahayagan orog na nagsisierto na sa dai mahahaloy maheheling na niato an natatada pang dramatikong mga pangyayaring ini: an pagtatak sa ultimong mga miembro kan 144,000, an natapos nang pagtipon sa dakulang kadaklan, an paglaglag sa Dakulang Babilonya, an ralaban sa Armagedon, an pagholog ki Satanas sa bungaw, asin an Milenyal na Paghade ni Cristo. Importante nanggad na kita maghinanyog sa patanid ni Jesus: “Uya! ako madatong siring sa parahabon. Maogma an saro na nagdadanay na puka asin sulot an saiyang pan-ibabaw na gubing.”​—Kap. 16:15.

¹¹ Kita daw nagdadanay na puka? Gurano niato kaseryosong minamansay an makahulang tataramon? Baga man idinusay ta an satong buhay ki Jehova kaidtong 5 taon o 50 taon na an nakaagi, an mga tataramon ni Pablo sa mga Kristiano sa Roma minaaplikar nanggad sa sato: “Kamo nakakaaram kan panahon, na oras na para sa saindo na magmata sa pagtorog, huli ta ngonyan an satong kaligtasan orog na harani kisa kan kita magturubod. An banggi makakaagi na; an aldaw naghaharani na.” Dangan sinadol ni Pablo an mga Kristiano na ‘isikwal na an mga gibo kan kadikloman’ asin ‘maglakaw nin maninigo.’ (Roma 13:​11-13) Nabubuhay kita sa sarong kinaban na pano nin kadikloman sa moral. An nakakukubhan na gawe kaidtong nakaagi pa sanang 30 o 40 taon normal sa dakol na kinabanon sa huring dekadang ini kan ika-20 siglo. Magmaan kamo, mga tugang, na dai nindo noarin man pagtogotan an saindong sadiri na ianod sa kadikloman nin kinaban asin magtungka sa moral. Kun totogotan nindo an saindong sadiri na magin konsintidor sa nagraraot na pamumuhay kan kinaban na ini, malilingawan nindo an darakulang isyu na sa dai mahahaloy huhusayon na sagkod lamang: an pagbindikar sa soberaniya ni Jehova asin an pagpakangbanal sa saiyang ngaran. An pagtungka sa espirituwal makararaot sa satong kaligtasan, na ngonyan haranihon na.

¹² Magtalubo sa Isinasapusong Pagpahalaga sa Makahulang Tataramon: An suanoy na Hebreong mga propeta odok na interesado sa kaotoban kan saindang mga hula manongod sa Mesiyas. Sinda naggibo nin “maigot na pagsiyasat asin maingat na paghanap” manongod sa pag-otob kan katuyohan nin Dios. (1 Ped. 1:​10, 11) Siring man, mantang hinihinanyog nindo an makahulang tataramon sa librong Kapahayagan, magtatalubo kamo sa pag-apresyar sa espirituwal na mga bagay. Maorog an saindong gana sa espirituwal, kaya mapapahiro kamong magkotkot sa “hararom na mga bagay nin Dios.” (1 Cor. 2:10) Mantang pinapano nindo an saindong puso nin pagpahalaga sa makahulang tataramon, dai na kaipuhan na sadolon pa kamo nin siisay man na umatender sa mga partiripon; kamo mapapahirong regular na umatender asin magpartisipar. (Luc. 6:45) Asin kun an ‘tataramon nasa saindong sadiring puso,’ kamo mapapahiro na ‘magpahayag kaiyan sa publiko para sa kaligtasan.’​—Roma 10:​8-10.

¹³ Mientras na mas naghaharani kita sa panahon kan katapusan, orog na pag-oolog-ologon kita kan mga paratuya huli sa pagdadanay niato sa satong pagtubod sa makahulang mga kapahayagan nin Dios. (2 Ped. 3:​3, 4) Pero, magdadanay kitang puka sa makahulang tataramon. Ipinaheheling sa sato kan ilawan na Tataramon nin Dios kun haen na kita sa dalagan nin panahon. Maliwanag na iniilawan kaiyan an katunayan na kita nasa huring mga aldaw na kan madiklom na kinaban na ini. An bitoon nin makaaaga suminirang na! Si Cristo nasa kapangyarihan na kan Kahadean! Sa poro kan daga naheheling na niatong namamanaag an sarong bagong aldaw. An ipinanuga nin Dios na bagong kinaban magpadagos logod na tunay sa sato siring kan Kahadean na nagin tunay para sa tolong apostol na nagkapribilehiyong makaheling nin patanaw kaiyan sa milagrosong bisyon kan transpigurasyon ni Jesus!