An Makahulang Tataramon nin Dios Nagtatao nin Paglaom Para sa Ngapit
SA TABANG kan Tataramon nin Dios, an Banal na Biblia, an tunay na mga Kristiano nagtatanaw sa ngapit na may pagtubod, paglaom, asin optimismo. Nakasesegurado sa saindang relasyon ki Jehova Dios, inaantisipar ninda an umaaboton. Siring sa ipinaliwanag kan enot na pahayag sa “Makahulang Tataramon nin Dios” na Pandistritong mga Kombension, an Mga Saksi ni Jehova odok na mga paraadal kan hula sa Biblia sa laog nin dakol nang taon. Kaya, ano an itinagama ni Jehova sa saiyang banwaan sa mga kombension na ini? Mantang kapot an mga Biblia, galaga an gabos na nag-atender na maaraman iyan. An tema para sa kada aldaw kan kombension isineparar bilang subtema.
ENOT NA ALDAW: Paglakaw sa Liwanag kan Tataramon nin Dios
Ipinaliwanag kan pahayag na “Giniyahan Kita kan Tataramon nin Dios” na an banwaan ni Jehova siring sa sarong tawo na nagpoon na magbaklay sa kadikloman nin banggi. Mantang nagsisirang an saldang, mga anino an naheheling nia, alagad kun an sirang kan saldang tugdok na, naheheling nia an malinaw na detalye. Siring kan ihinula sa Talinhaga 4:18, malinaw na naheling kan banwaan ni Jehova an saindang dalan paagi sa maliwanag na sirang kan katotoohan gikan sa makahulang tataramon nin Dios. Dai sinda pinabayaan na mapasala sa espirituwal na kadikloman.
An pahayag sa pinakatema na, “Mag-atento sa Makahulang Tataramon nin Dios,” pinagirumdom an mga naghihinanyog na an mga naglalaom ki Jehova nakalilikay sa pagkasudya nin linalaoman asin pagkadesganar na naeeksperyensiahan kan mga tawo na nagsusunod sa falsong mga mesiyas asin falsong mga propeta. Sa kabaliktaran na marhay, nakalalabi an mga kredensial kan tunay na Mesiyas, si Jesu-Cristo! Halimbawa, an milagrosong transpigurasyon ni Jesus nagtao nin patanaw sa saiya sa ngapit bilang an pinatukaw sa trono na Hade sa Kahadean nin Dios. Poon kan dumatong na may kapangyarihan sa Kahadean kan 1914, si Jesus iyo man an “bitoon sa aga” na nasambitan sa 2 Pedro 1:19. “Bilang an Mesiyanikong Bitoon sa Aga, sia nagpapaisi nin sarong bagong aldaw, o panahon, na minasirang para sa gabos na makinuyog na katawohan,” an sabi kan espiker.
Bilang kapinonan kan programa sa hapon, an pahayag na “Nagliliwanag Bilang mga Ilaw” ipinaliwanag nin detalyado an Efeso 5:8, kun saen hinahatolan kita ni apostol Pablo na ‘padagos na maglakaw bilang mga aki nin liwanag.’ An mga Kristiano ilaw, bako sanang paagi sa paghiras sa iba kan Tataramon nin Dios kundi paagi man sa pag-aplikar kan Biblia sa saindang buhay bilang pag-arog ki Jesus.
Tanganing magin an klaseng ini nin ilaw, dapat niatong “Ikaogmang Marhay an Pagbasa kan Tataramon nin Dios.” An temang ini ipinaliwanag sa tolo an kabtang na simposium. Pakatapos na kotaron si Abraham Lincoln, na inapod an Biblia na “an pinakamarahay na regalong itinao noarin man nin Dios sa tawo,” hinapot kan enot na espiker an mga nagdadangog kun ano an ihinahayag kan saindang ugale sa pagbasa manongod sa rarom kan saindang pag-apresyar sa Tataramon ni Jehova. An mga naghihinanyog inenkaminar na basahon nin maingat an Biblia, na tinatawan nin panahon na iladawan sa isip an mga pagkasaysay sa Kasuratan asin ikonektar an bagong mga punto sa mga bagay na nanodan na.
Idinoon kan sunod na kabtang kan simposium an pangangaipong mag-adal, bakong basta sana pagbasa, tanganing matunaw niato an “matagas na kakanon.” (Hebreo 5:13, 14) An pag-adal espesyalmenteng nakapakokosog, sabi kan espiker, kun satuyang patienot na ‘inaandam an satong puso,’ arog kan ginibo kan Israelitang saserdote na si Esdras. (Esdras 7:10) Alagad taano ta mahalagang marhay an pag-adal? Huli ta igwa iyan nin direktang koneksion sa satong relasyon ki Jehova. Huli kaini, an pag-adal sa Biblia dapat na mahalagang marhay, nakaoogmang marhay, asin nakarerepresko, minsan ngani kalabot dian an disiplina sa isip asin paghihingoa. Paano kita nakakukua nin panahon para sa makahulogan na pag-adal? Paagi sa ‘pagtubos kan angay na panahon’ gikan sa bakong gayong importanteng mga aktibidad, an sabi kan ultimong espiker sa simposium. (Efeso 5:16) Iyo, an liabe sa pakakua nin panahon iyo an paggamit sa pinakamarahay na paagi kan satong panahon.
An pahayag na “Tinatawan nin Dios nin Kosog an Napapagal” nagsabi na dakol na tawo an napapagal ngonyan na mga aldaw. Tanganing magkaigwa kita kan “kosog na lihis sa ordinaryo” para sa Kristianong ministeryo, kaipuhan kitang magsarig ki Jehova, na “nagtatao nin kapangyarihan sa napapagal.” (2 Corinto 4:7; Isaias 40:29) Kabale sa mga tabang na nakapakokosog an Tataramon nin Dios, pamibi, Kristianong kongregasyon, regular na pakikikabtang sa ministeryo, Kristianong mga paraataman, asin fiel na halimbawa nin iba. Itinampok kan temang “Magin mga Paratokdo Huli sa Panahon” an pangangaipo na an mga Kristiano magin paratokdo siring man parahulit asin maghingoang paoswagon an “abilidad sa pagtotokdo.”—2 Timoteo 4:2.
An ultimong pahayag sa aldaw na iyan, na “An mga Nakikilaban Tumang sa Dios Dai Manggagana,” sinambit an bago pa sanang napasalang mga paghihingoa sa nagkapirang nasyon na apodon an Mga Saksi ni Jehova na peligrosong kulto. Alagad dai kita kaipuhan na matakot, ta an Isaias 54:17 nagsasabi: “‘An ano man na armas na gibohon tumang sa saimo dai magkakaepekto, asin an arin man na dila na tumindog tumang sa saimo sa paghokom saimong kokondenaron. Iyo ini an rogaring na panonondon kan mga lingkod ni Jehova, asin an saindang katanosan gikan sa sako,’ an sabi ni Jehova.”
IKADUWANG ALDAW: Mga Bagay na Ipinahayag Paagi sa Makahulang Kasuratan
Pakatapos kan pag-oolay sa teksto sa Biblia kan aldaw na iyan, nadangog kan mga nagtiripon an ikaduwang simposium kan kombension, na may temang “Pagpamuraway ki Jehova Bilang mga Paradara nin Liwanag.” Ipinaheling kan enot na pahayag na an pasohan nin sarong Kristiano iyo na pamurawayon si Jehova paagi sa paghuhulit sa gabos na lugar. Sinambit sa suminunod na kabtang an pangangaipo na idirehir sa organisasyon nin Dios an mga naghihimate. Paano? Paagi sa paggamit niato nin lima o sampulong minuto bago o pakatapos kan kada pag-adal sa Biblia tanganing ipaheling kun paano nagpupunsionar an organisasyon nin Dios. Idinoon kan ikatolong pahayag kan simposium na ini an pangangaipo na pamurawayon an Dios paagi sa marahay na mga gibo.
Trinatar kan pahayag na “Kamotan na Marhay an mga Pagirumdom ni Jehova” an piniling mga bersikulo sa Salmo 119. Tunay nanggad, kita nangangaipo nin mga pagirumdom, ta kita gabos may tendensiang makalingaw. Kun siring, kanigoan kaimportante na kita magpatalubo nin pagkamoot sa mga pagirumdom ni Jehova, arog nanggad kan ginibo kan salmista!
Dangan suminunod an sarong espesyal na kabtang—an pahayag sa bautismo na may temang “An Paghimate sa Makahulang Tataramon Minagiya sa Bautismo.” Ipinagirumdom sa mga kandidato sa bautismo na inaarog ninda si Cristo bako sanang paagi sa pagigin bautisado kundi paagi man sa pagsunod nin estrikto sa saiyang mga lakad. (1 Pedro 2:21) Abaang pribilehio an yaon sa mga bagohan na ini na magkaigwa nin kabtang sa kaotoban kan Juan 10:16, kun saen ihinula ni Jesus na matipon sia nin “ibang karnero” na maglilingkod sa kaibanan kan saiyang linahidan nin espiritung mga disipulo!
Sa pagpoon kan programa sa hapon, ipinaliwanag kan pahayag na “Dangogon an Sinasabi kan Espiritu” na an espiritu ni Jehova nagtataram sa sato paagi sa Biblia, “fiel asin madonong na oripon,” asin sa satong konsensia na sinanay sa Biblia. (Mateo 24:45) Huli kaini, dai kaipuhan nin mga Kristiano na makadangog nin literal na tingog hale sa langit tanganing maaraman kun paano paoogmahon an Dios. An suminunod na paliwanag, na “Marigon Para sa Katokdoan na Kaoyon kan Diosnon na Debosyon,” nagsadol sa mga Kristiano na dai magsiyasat sa mga ideyang nakararaot sa moral na pinalalakop kan kinaban na ini. Tunay nanggad, an daing kontrol na pag-usyoso puedeng isapeligro kita sa nakadadanyar na impormasyon na isinasabwag nin mga apostata asin iba pang ahente ni Satanas. Orog karahay nanggad na regular na basahon an Biblia siring man an gabos na artikulo sa An Torrengbantayan asin Awake!
May temang “Padagos na Pangaptan an Arogan nin Nakapakokosog na mga Tataramon,” idinoon kan sunod na pahayag an importansia nin pagigin lubos na pamilyar sa Makakasuratan na “arogan,” o pundamental na estruktura, kan katotoohan. (2 Timoteo 1:13) An pakasabot sa arogan na ini iyo an liabe bako sanang sa pagkaigwa nin diosnon na debosyon kundi siring man sa pakamidbid kan bagay na bakong kaoyon sa katotoohan.
Imahinara an pagigin ibinibilang ni Jehova na kawiliwili. Kanigoan na onra! Basado sa hula ni Haggeo, an pahayag na “Pinapano nin ‘Kawiliwiling mga Bagay’ an Harong ni Jehova” nakaparigon na marhay sa boot huling inasegurar kaiyan an mga naghihinanyog na an balang miembro kan “dakulang kadaklan” totoong kawiliwili para ki Jehova. (Kapahayagan 7:9) Kun siring, dai sinda iiiba ni Jehova sa saiyang ultimong ‘pagyugyug’ sa mga nasyon durante kan maabot na “dakulang kahorasaan.” (Haggeo 2:7, 21, 22; Mateo 24:21) Minsan siring, an banwaan ni Jehova dapat na magdanay na mapagbantay sa espirituwal mientras tanto, siring kan ipinaliwanag sa kabtang na “Pinatatanidan Kita kan Makahulang Kasuratan na Magin Mapagbantay.” Kinotar kan espiker an mga tataramon ni Jesus: “Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan.” (Mateo 24:42) Paano niato pinapagdadanay an espirituwal na pagkapuka? Paagi sa pagdadanay na sibot sa paglilingkod ki Jehova, padagos na pamimibi, asin pagdadanay na naghahalat sa dakulang aldaw ni Jehova.
An ultimong pahayag kan aldaw na iyan may temang “An Makahulang Tataramon sa Panahon kan Katapusan.” Iyan magigirumdoman sa laog kan maabot na mga taon. Taano? Huli ta ipinaisi kan espiker an pagluwas nin sarong bagong libro—an Pay Attention to Daniel’s Prophecy! “An may magayon na mga ilustrasyon na 320-pahinas na publikasyon na ini tinatratar an gabos na kabtang kan librong Daniel,” an sabi kan espiker. Kanigoan kanakapakokosog na ebidensia na tinatawan ni Jehova nin liwanag an saiyang makahulang Tataramon!
IKATOLONG ALDAW: An Makahulang Tataramon nin Dios Nungkang Nasusudya
An ultimong aldaw kan kombension nagpoon sa simposium na “Makahulang mga Tataramon Para sa Itinalaan na Panahon.” Siniyasat kan tolong kabtang an tolong kapahayagan ni propeta Habacuc kan mga pagkastigo ni Jehova. An enot tumang sa sumbikalan na Juda asin an ikaduwa tumang sa mapan-aping Babilonya. An ultimo, na maootob pa, aplikado sa madali nang paglaglag sa gabos na maraot na tawo. Sa pagtaram manongod sa Armagedon, an ultimong tugang sa simposium nagpasabong nin awad-awad na diosnon na pagkatakot sa isip kan mga naghihinanyog sa saiya kan sabihon nia: “Tunay nanggad, makapupukaw nin hararom na paggalang kun ipahayag na ni Jehova an bilog na puersa kan saiyang dakulang kapangyarihan.”
“Pag-apresyar sa Satong Espirituwal na Mana” an titulo kan nakatutudok sa boot na drama sa Biblia kan kombension. An nagsisiyasat sa sadiri na presentasyon na ini ipinaheling an kalaenan kan aktitud ni Jacob asin Esau manongod sa espirituwal na mga bagay. Minenus ni Esau an saiyang espirituwal na mana, kaya itinao iyan ki Jacob, na nagpahalaga dian. “Anong [espirituwal na mana] an itinao ni Jehova sa sato?” an ihinapot sa mga kombensionista. “An katotoohan kan saiyang Tataramon, an Biblia; an paglaom na buhay na daing katapusan; asin an onra na irepresentar sia bilang mga parabalangibog kan maogmang bareta,” an simbag kan espiker.
An sunod na kabtang may temang “Ano an Kahulogan Para sa Saindo kan Satong Mahalagang Marhay na Mana?” Ipinaheheling ta an tamang aktitud sa satong espirituwal na mana paagi sa pag-enot kan paglilingkod ki Jehova asin espirituwal na mga pribilehio kisa personal o materyal na intereses. Sa paaging ini isinesentro niato an satong buhay sa satong relasyon ki Jehova, na kabaliktaran na marhay ki Adan, Esau, asin sa bakong fiel na mga Israelita.
An pahayag-publiko, na “Paggibong Bago kan Gabos na Bagay—Siring sa Ihinula,” pinagsararo an apat na pangenot na hula mapadapit sa “bagong kalangitan” asin “bagong daga.” (Isaias 65:17-25; 66:22-24; 2 Pedro 3:13; Kapahayagan 21:1, 3-5) Malinaw nanggad, an nasa isip ni Jehova iyo an mas dakulang kaotoban kan mga hulang ini kisa kan saiyang ibinalik na banwaan kan 537 B.C.E. Iyo, an nasa isip nia iyo an saiyang gobyernong Kahadean (an “bagong kalangitan”) asin an daganon na mga sakop kaiyan (an “bagong daga”), na mag-eerok sa sarong mamuraway na paraiso na lakop sa globo.
Bilang nakapupukaw sa boot asin nakamomotibar na pagtatapos kan kombension iyo an pahayag na “An Satong Paghalat Mantang Ginigiyahan Kita kan Tataramon nin Dios.” Pinagirumdom kaiyan an gabos na “nainaan na an panahon na natatada” para sa paghaman kan gibohon na pagbalangibog kan Kahadean. (1 Corinto 7:29) Iyo, yaon na kita sa mismong pinto kan kaotoban kan dekreto ni Jehova tumang ki Satanas asin sa saiyang enterong maraot na sistema. An sato logod na mga saboot magin arog kan sa salmista na nag-awit: “An samo mismong kalag naghahalat ki Jehova. Sia an samong katabang asin samong kalasag.” (Salmo 33:20) Kanigoan kamamuraway na oportunidad an nasa enotan kan mga an paglaom nakabasar sa makahulang tataramon nin Dios!
[Ritrato sa pahina 7]
Pinakosog nin nakapupukaw sa boot na drama an pag-apresyar sa espirituwal na mana kan mga lingkod ni Jehova
[Ritrato sa pahina 7]
An dakol na naghimate sa makahulang tataramon nin Dios binautismohan