Determinadong Sunodon an Dalan nin Dios sa Buhay
An “Sa Dios na Dalan nin Buhay” na mga Kombension kadakol na itinao para sa mga nagmamawot na maglingkod sa Dios! An sarong delegado ilinadawan an kombension bilang “sarong makangangalas na panahon nin pagtotokdo, pagparigon sa boot, asin kaliwanagan.”
AN SARO pang delegado nagsabi na “kadakol kan puedeng ipaggayagaya, pensaron, asin ilaog sa isip.” Pag-olayan ta ngonyan an programa mismo.
Si Jesu-Cristo—An Dalan, an Katotoohan, Asin an Buhay
Ini an tema kan enot na aldaw kan kombension. (Juan 14:6) Sinabi sa enot na pahayag an katuyohan kan satong pagkatiripon sa kombension: tanganing orog pang matokdoan manongod sa pinakamarahay na posibleng dalan nin buhay, an sa Dios na dalan nin buhay. Tinotokdoan ni Jehova an saiyang banwaan kun paano malakaw sa saiyang mga dalan. Ginigibo nia ini paagi sa Biblia, “fiel asin madonong na oripon,” asin banal na espiritu. (Mateo 24:45-47; Lucas 4:1; 2 Timoteo 3:16) Kanigoan na pribilehio na matokdoan kan Soberano sa uniberso!
Bilang pagsusog sa tema kan aldaw, an pahayag sa pinakatema iyo an “An Pantubos ni Cristo—an Dalan nin Dios sa Kaligtasan.” Bilang pagsunod sa dalan nin Dios sa buhay, mahalagang marhay na rekonoseron an kabtang ni Jesu-Cristo sa katuyohan ni Jehova. An espiker nagsabi: “Kun mayo an pantubos na atang ni Jesu-Cristo, daing tawo, ano man an saiyang mga paniniwala o gibo, na makakaako kan buhay na daing katapusan hale sa Dios.” Dangan kinotar nia an Juan 3:16, na nagsasabi: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” An paggibo nin pagtubod sa pantubos na atang ni Cristo naghahagad na kita makaabot sa tamang kaaraman kan katotoohan. Kalabot man dian an pagdusay kan satong buhay ki Jehova, na sinisimbolisaran ini paagi sa bautismo sa tubig, asin pamumuhay oyon sa halimbawa na itinao ni Jesu-Cristo.—1 Pedro 2:21.
An sesyon sa hapon nagpoon paagi sa pahayag na may titulong “An Dalan nin Pagkamoot Dai Noarin Man Nasusudya.” Kaiba digdi an bersikulo por bersikulong paliwanag kan nakapupukaw sa boot na paglaladawan ni Pablo kan pagkamoot, na nakasurat sa 1 Corinto 13:4-8. Ipinagirumdom sa mga nagdadangog na an mapagsakripisyong pagkamoot sarong bagay na nagpapamidbid sa Kristianismo asin na an pagkamoot sa Dios asin kapwa mahalagang marhay na kabtang nin pagsamba na inooyonan ni Jehova.
Suminunod an may tolong kabtang na simposium na may titulong “Mga Magurang—Itadom an Dalan nin Dios sa Saindong mga Aki.” Matatabangan nin mga magurang an saindang mga aki na maglingkod sa Dios paagi sa pagtao nin marahay na halimbawa sa pagbasa asin pag-adal kan saiyang Tataramon. Ikatatadom ninda sa saindang mga aki an katotoohan paagi sa regular na pampamilyang pag-adal, na iinaadaptar iyan sa mga pangangaipo kan pamilya. Mahalaga man na tabangan an mga aki na makikabtang sa mga aktibidad kan kongregasyon asin ministeryo sa langtad. Maski ngani depisil an pagpadakula nin matatakton sa Dios na mga aki sa maraot na kinaban na ini, an paggibo kaiyan nagtatao nin dakulang mga balos.
Kasunod kan simposium na ini an pahayag na “Togotan na Moldehon Kamo ni Jehova Para sa Kagalanggalang na Kagamitan.” Kun paanong minomolde nin paragibo nin koron an sarong lalagan na dalipay, minomolde man nin Dios an mga gustong maglingkod sa saiya. (Roma 9:20, 21) Ginigibo nia ini paagi sa pagtao nin hatol sa saiyang Tataramon asin paagi sa saiyang organisasyon. Tatabangan kita ni Jehova na magamit nin lubos an satong mga kakayahan kun ginigibo niato an satong sadiri na andam na gamiton, kun kita minahiro sono sa mga oportunidad, asin gikan sa boot na tinotogotan sia na giyahan an satong mga lakad.
Suminunod ngonyan an nakaoogmang kabtang kan programa—“Paglilingkod sa Langtad nin Pagmimisyonero.” Sa presente naglilingkod sa bilog na daga sa 148 nasyon an 2,390 ministrong Kristiano na ibinibilang na nasa kategoriya nin misyonero. Nagtatao sinda nin marahayon na halimbawa nin kaimbodan asin kaigotan asin odok na nagpapasalamat sa saindang pribilehio nin paglilingkod sa ibang nasyon. Durante kan kabtang na ini kan programa sa internasyonal na mga kombension, an mga misyonero nagpahayag manongod sa mga kadepisilan asin kagayagayahan sa buhay nin misyonero.
An ultimong pahayag sa enot na aldaw may titulong “Igwa daw nin Buhay Pagkagadan?” Dakolon nang taon na ikinariribaraw kan katawohan an hapot na ini. An mga tawo sa lambang sosyedad nakitusay sa temang iyan. Daing kakulangan sa soboot mga simbag. An mga iyan laen-laen kapareho kan mga kostumbre asin relihion kan mga nagtatao kaiyan. Pero, kaipuhan na manodan kan mga tawo an katotoohan.
Bilang resulta, ipinaisi kan espiker an pagluwas kan magayon na 32-pahinang bagong brosyur na Ano an Nangyayari sa Sato kun Kita Magadan? Ipinaliliwanag kan brosyur na ini an pinaghalean kan tokdo na inmortalidad kan kalag asin ipinaheheling kun paano an ideyang iyan nagin mahalagang marhay sa haros gabos na relihion sa kinaban ngonyan. Sa malinaw asin nakaaatraer na paagi, sinisiyasat kaiyan an sinasabi kan Biblia manongod sa kalag, kun taano kita ta nagagadan, asin ano an nangyayari sa sato pagkagadan. Ipinaliliwanag man kan brosyur kun ano an paglaom para sa mga gadan asin sa mga buhay. Magigin bendisyon nanggad an publikasyon na ini para sa mga naghahanap kan katotoohan sa gabos na lugar!
Magmaan na Marhay sa Saindong Paglakaw
Angay nanggad na tema ini para sa ikaduwang aldaw kan kombension! (Efeso 5:15) An programa sa aga nakasentro sa paghuhulit asin paggibo nin disipulo. Kasunod kan orolay sa pan-aroaldaw na teksto, nagpadagos an programa paagi sa pahayag na “Pagtabang sa mga tawo na Makalaog sa Dalan Pasiring sa Buhay.” Sa pag-otob sa apretadong gibohon na ini, importante an pagkaigwa nin positibong kaisipan, na minimidbid na an paghiras sa iba kan katotoohan pareho pribilehio asin obligasyon. Kan enot na siglo C.E., an kadaklan na tawo sinayumahan an Tataramon nin Dios. Minsan siring, sa ibong nin pagtumang, yaon an mga ‘may tamang tendensia sa buhay na daing katapusan asin nagin mga paratubod.’ (Gibo 13:48, 50; 14:1-5) Kapareho kaiyan an situwasyon ngonyan. Maski ngani dakol an nagsasayuma sa katotoohan sa Biblia, nagpapadagos kita na hanapon an mga mahimate.—Mateo 10:11-13.
Ipinaliwanag sa sunod na pahayag an angat sa pagpaabot sa iba kan mensahe nin buhay. Huling mas masakit ngonyan na manompongan an mga tawo sa harong, kaipuhan kitang maghulit nin sirot asin magin mapamaagi tanganing mapaabotan niato an pinakadakol na mapupuede kan mensahe kan Kahadean. Sa dakol na kadagaan, an mga parahayag kan maogmang bareta nagkakamit nin marahay na mga resulta paagi sa pagpatotoo paagi sa telepono asin paghuhulit sa lugar nin negosyo, sa siring naaabot an mga masakit kutanang makaolay.
An pahayag na may titulong “Pagtokdo sa mga Disipulo kan Gabos na Ipinagboot ni Cristo” nagkonsentrar sa halaga kan pagigin eksperto sa satong ministeryo. Napatatarom an satong mga kakayahan sa pagtokdo mantang kita nakakanood sa iba asin satong iinaaplikar an ekselenteng pagsasanay na inaako sa mga pagtiripon kan kongregasyon. Mantang kita nagigin eksperto sa satong pagtotokdo, nag-oorog an satong kagayagayahan asin satispaksion sa satong pagtabang sa mga tawo na makanood kan katotoohan sa Biblia.
An sesyon sa aga natapos sa pahayag manongod sa kahulogan kan pagdusay asin bautismo. An saro sa mga punto kan espiker iyo na kun kita lubos na nagtitiwala sa Dios asin kita odok na naghihingoa na gibohon an saiyang kabotan, bebendisyonan asin susuportaran nia kita. An tawong madonong nagsurat: “Sa gabos mong dalan girumdomon mo [an Dios], asin itatanos nia mismo an saimong mga dana.” (Talinhaga 3:6) An magayagayang bautismo mismo sarong tampok na kabtang kan kombension na nagpapaheling na dakol an nagpoon na sumunod sa dalan nin Dios sa buhay.
Pakatapos nin pahingalo sa odto, an sesyon sa hapon nagpoon paagi sa pahayag na “Paglilingkod na Tinatanaw an Buhay na Daing Katapusan.” Maootob an katuyohan nin Dios na an makinuyog na mga tawo maglingkod sa saiya sagkod lamang digdi sa daga. Kun siring, angay sana na isentro niato an satong kaisipan, mga plano, asin paglaom sa paglilingkod ki Jehova na tinatanaw an panahon na daing sagkod! Mantang pinapagdadanay niato na harani sa isip an “aldaw ni Jehova,” mahalagang marhay na girumdomon na an satong pasohan maglingkod sagkod sa panahon na daing sagkod. (2 Pedro 3:12) An dai pakaaram kan eksaktong panahon na gigibohon ni Jesus an pamalos nin Dios nagpapadanay sa sato na mapagbantay asin nagtatao sa sato nin mga oportunidad aroaldaw na patunayan na kita naglilingkod ki Jehova na mayo nin paslong motibo.
Siniyasat kan duwang suminunod na pahayag an ikaapat na kapitulo kan surat ni Pablo sa mga taga Efeso. Kabale sa mga bagay na ipinaliwanag an bendisyon sa sato na “balaog na mga lalaki,” mga lalaking may espirituwal na kualipikasyon na ninombrahan kan banal na espiritu. An kamagurangan na ini nagtatao nin hatol asin paggiya para sa satong espirituwal na kapakinabangan. An ipinasabong na surat ni Pablo nagsasadol man sa mga Kristiano na isolog an “bagong personalidad.” (Efeso 4:8, 24) Kaiba sa diosnon na personalidad an mga kualidad na arog kan pakikidamay, kabootan, kababaan nin isip, kahoyoan, pakatios, asin pagkamoot.—Colosas 3:12-14.
Kalabot sa maingat na pagmaan sa satong paglakaw an pagpadanay kan satong sadiri na daing digta kan kinaban—an tema kan sunod na pahayag. Kaipuhan an pagigin timbang sa pagpili nin pag-aling-aling, sosyal na mga aktibidad, asin materyal na mga pinag-aaabot. Paagi sa pag-aplikar kan hatol sa Santiago 1:27 na magdanay na daing digta kan kinaban, kita igwa nin malinig na kamugtakan sa atubangan nin Dios asin nin marahay na konsensia. Makakapamuhay man kita na may katuyohan asin bebendisyonan nin katoninongan, espirituwal na prosperidad, asin marahayon na mga kaibaiba.
Dangan uminabot an may tolong kabtang na simposium na may titulong “Mga Hoben—Sunodon an Dalan nin Dios.” Sa pakaaram na an Dios namomoot sa sainda asin inaapresyar an saindang mga paghihingoa na suportaran an dalisay na pagsamba, maninigo na patoodon kan mga hoben an saindang kakayahan sa pagmansay tanganing fiel na maglingkod sa saiya. An sarong paagi na pataluboon an mga kakayahan sa pagmansay iyo na basahon an Tataramon nin Dios aroaldaw asin horophoropon iyan. Kun gibohon niato ini, maaaraman niato an mga dalan ni Jehova. (Salmo 119:9-11) An mga kakayahan sa pagmansay napatatalubo man paagi sa pag-ako nin maygurang na hatol hale sa mga magurang, kamagurangan, asin publikasyon kan Sosyedad. Paagi sa paggamit nin tama sa saindang mga kakayahan sa pagmansay, linalabanan kan mga hoben an pagkabangkag sa materyal na mga rogaring, malaswang pananaram, asin pagpalabilabi sa pag-aling-aling na dian midbid an kinaban na ini na siblag sa Dios. Paagi sa pagsunod sa dalan nin Dios sa buhay, an mga hoben asin gurang pareho magkakaigwa nin tunay na kapangganahan.
An ultimong pahayag sa aldaw na iyan iyo an “An Kaglalang—An Saiyang Personalidad Asin an Saiyang mga Dalan.” Pakatapos sabihon na binilyon na tawo an dai nakamimidbid sa Kaglalang, an espiker nagsabi: “An tunay na kahulogan nin buhay konektado sa pakamidbid sa Kaglalang, an satong personang Dios; pagrekonoser sa saiyang personalidad; asin pagkooperar sa saiyang mga dalan. . . . Igwa nin mga impormasyon manongod sa satong kinaban asin manongod sa sato na magagamit nindo sa pagtabang sa mga tawo na akoon an Kaglalang asin makanompong nin kahulogan may koneksion sa saiya.” Dangan ipinaliwanag kan espiker an ebidensia na nagtotokdo sa pag-eksister nin madonong asin mamomoton na Kaglalang. Uminabot sa kulminasyon an pahayag paagi sa pagluwas nin sarong bagong libro—Is There a Creator Who Cares About You?
“Iyo Ini an Dalan. Maglakaw Kamo Dian”
Ini an tema kan ikatolong aldaw kan kombension. (Isaias 30:21) Nagpoon an programa paagi sa sarong nakapupukaw na simposium na may tolong pahayag, na nagkokonsentrar sa bisyon ni Ezequiel kan templo. Dakula an kahulogan kan bisyon na ini sa banwaan nin Dios ngonyan, huling konektado iyan sa dalisay na pagsamba sa satong panahon. Ini an liabe sa pakasabot sa bisyon: An dakulang espirituwal na templo ni Jehova nagrerepresentar sa saiyang areglo para sa dalisay na pagsamba. Mantang ipinaliliwanag an mga kabtang kan bisyon, pinensar kan mga nagdadangog an saindang aktibidad bilang pagsuportar sa ginigibo kan mamomoton na mga paraataman na kabilang sa linahidan na natatada asin kan may esperansang magin mga miembro kan klaseng prinsipe.
Paghaloyhaloy kan aga, igwa nin magayon na drama sa Biblia na nakakostium an mga partisipante. An drama may titulong “Mga Pamilya—Gibohon an Aroaldaw na Pagbasa sa Biblia na Magin Saindong Dalan nin Buhay!” Ipinaheling kaiyan an pagtubod asin kapusoan kan tolong Hebreo na nagsayumang humorohod sa bulawan na imahen na itinindog ni Hadeng Nabucodonosor nin Babilonya. Katuyohan kan drama na patunayan na an Biblia bako sanang libro nin suanoy na kasaysayan kundi an hatol kaiyan totoong kapakipakinabang kapwa sa mga hoben asin adulto ngonyan.
An sesyon sa hapon iyo an panahon para sa pampublikong pahayag na “An Solamenteng Dalan Pasiring sa Buhay na Daing Katapusan.” Pakatapos na susogon an kasaysayan kan pagkaholog nin katawohan sa kasalan asin kagadanan, an espiker nagkonklusyon paagi sa nakapupukaw sa boot na mga tataramon na ini: “An pinakatemang teksto sa Biblia para sa kombension na ini iyo an Isaias kapitulo 30, bersikulo 21, na nagsasabi: ‘An saimong mga talinga makadadangog nin tataramon sa likod mo na nagsasabi: “Iyo ini an dalan. Maglakaw kamo dian, banwaan,” enkaso kamo banwaan pumatoo o enkaso kamo pumawala.’ Paano niato nadadangog an tingog na ini? Paagi sa paghinanyog sa Tataramon nin Dios, an Banal na Biblia, asin paagi sa pagsunod sa giya na itinatao paagi kaiyan kan satuyang Kaharohalangkaweng Paratokdo, si Jehova Dios, asin paagi sa saiyang Kristianong organisasyon sa presenteng aldaw. Tunay nanggad, an paggibo kaini an solamenteng dalan pasiring sa buhay na daing katapusan.”
Kasunod kan sumaryo kan artikulong pag-aadalan sa Torrengbantayan para sa semanang iyan an ultimong pahayag, na may titulong “Padagos na Maglakaw sa Dalan ni Jehova.” Sa sarong kabtang, rinepaso kaiyan an pangenot na mga punto kan programa. Dangan iinatubang kan espiker an sarong resolusyon na nagpapahayag kan determinasyon na padagos na mamuhay sa dalan nin Dios.
Nagtapos an resolusyon paagi sa nakapupukaw sa boot na mga tataramon na ini: “Kombensido kita na an pamumuhay sono sa mga prinsipyo, hatol, asin konseho sa Kasuratan nagbubunga kan pinakamarahay na dalan nin buhay ngonyan asin nagbubugtak nin marahay na pundasyon para sa ngapit, tanganing makapangapot kita nin higot sa tunay na buhay. Orog sa gabos, ginigibo ta an resolusyon na ini huli ta namomotan ta si Jehova Dios sa bilog niatong puso, kalag, isip, asin kosog!” Pinatunayan kan gabos na nag-atender an saindang pag-oyon paagi sa makosog na pagsabi nin iyo!
[Kahon/Ritrato sa pahina 8]
Igwa daw nin Kaglalang na Nagmamakolog sa Saindo?
An bagong libro na ini an titulo nag-aatubang nin nakakokombensir na ebidensia kan pag-eksister kan Kaglalang, si Jehova, asin ipinaliliwanag kaiyan an saiyang mga kualidad. Iyan sinadya partikularmente para sa mga halangkaw an inadalan sa sekular na mga bagay alagad dai nagtutubod sa Dios. Pakokosogon man kan 192-pahinang libro na ini an pagtubod nin mga indibiduwal na may pagtubod na sa Dios, na pinatatalubo an pag-apresyar sa saiyang personalidad asin mga dalan.
Dai inaasumir kan Is There a Creator Who Cares About You? na an nagbabasa may pagtubod sa Dios. Imbes, ipinaliliwanag kaiyan kun paano pinatutunayan nin bagong sientipikong mga diskobremiento asin ideya an pag-eksister kan Kaglalang. Kabilang sa mga kapitulo an may titulo na “What Can Add Meaning to Your Life?,” “How Did Our Universe Get Here?—The Controversy,” asin “How Unique You Are!” Ipinaliliwanag kan ibang kapitulo kun taano ta makaseseguro kita na an Biblia ipinasabong nin Dios. An bagong libro nagtatao man nin pankagabsan na pakasabot sa Biblia, na naghahayag kan personalidad asin mga dalan kan Kaglalang. Bako sanang ipinaliliwanag kan libro kun taano ta tinogotan nin Dios an grabeng pagdusa kundi ipinaliliwanag man kaiyan kun paano nia iyan tataposon sagkod lamang.
[Mga ritrato sa pahina 7]
Dakol an nabautismohan
[Mga ritrato sa pahina 7]
An bagong brosyur ilinuwas ni A. D. Schroeder, sarong miembro kan Namamahalang Grupo kan Mga Saksi ni Jehova
[Mga ritrato sa pahina 8, 9]
Inenkaminar kan nakapupukaw sa boot na drama an aroaldaw na pagbasa sa Biblia