Harani Na an “Sa Dios na Dalan nin Buhay” na Kombension sa 1998-1999!
SA Pilipinas sana, 51 kombension an nakaiskedyul sa Disyembre asin Enero. Posible na an saro kan tolong aldaw na mga pagtiripon na ini gigibohon sa lugar na harani sa saindo. An programa mapoon sa Biernes asin Sabado paagi sa musika sa alas 8:30 n.a. Sa Domingo iyan mapoon sa alas 9:00 n.a.
An programa sa Biernes na aga magtatampok kan mga bareta dapit sa pag-oswag kan paghuhulit kan Kahadean sa laen-laen na parte kan kinaban. Asin an pinakatema kan kombension idodoon kan pahayag na “An Pantubos ni Cristo—An sa Dios na Dalan nin Kaligtasan.”
Pagkahapon an simposium na “Mga Magurang—Idoon Nindo sa Saindong mga Aki an Dalan nin Dios,” matao nin mga suhestion sa kun paano momotibaron an mga aki na kamotan asin paglingkodan si Jehova. An programa sa hapon matatapos paagi sa pahayag na “Igwa daw nin Buhay Pagkagadan?”
Itatampok kan programa sa Sabadong aga an paggibo nin mga disipulo kan Mga Saksi ni Jehova sa tolong magkasurunod na kabtang, “Pagtabang sa mga Tawo na Makapasiring sa Dalan nin Buhay,” “An Angat sa Pag-abot sa mga tawo,” asin “Pagtokdo sa mga Disipulo kan Gabos na Ipinagboot ni Cristo.” Sa pagtatapos kan programa sa aga, magkakaigwa nin probisyon na mabautismohan an bagong mga disipulo.
An pambukas na pahayag sa Sabadong hapon na “Paglilingkod na Tinatanaw an Buhay na Daing Katapusan,” eenkaminaron kita na mapagngayongayong horophoropon an satong personal na mga dahelan sa paglilingkod sa Dios. Iaatubang kan mga pahayag na “Pag-apresyar sa ‘mga Balaog na Lalaki,’ na Nagtotokdo kan Dalan nin Dios” asin “Pagkatawo—Hubaon an Daan Asin Isolog an Bago” an nagtatao nin liwanag na bersikulo por bersikulong pagsiyasat sa Efeso kapitulo 4. Sunod, itatao an marahay na sadol sa Kasuratan sa pahayag na “Papagdanayon an Saindong Sadiri na Daing Digta kan Kinaban” asin sa may tolong kabtang na simposium na “Mga Hoben—Sundon an Dalan nin Dios.” An programa sa hapon matatapos paagi sa pahayag na “An Kaglalang—An Saiyang Personalidad Asin an Saiyang mga Dalan.”
Itatampok kan programa sa Domingong aga an may tolong kabtang na simposium na magpapaliwanag kan huring mga kapitulo kan libro sa Biblia na Ezequiel siring man kan makahulang aplikasyon kaiyan. An makompleto kan programa sa aga iyo an dramang kompleto sa kostium na basado sa pagigin fiel kan tolong hoben na Hebreo. An tampok na kabtang kan kombension sa hapon iyo an pahayag-publiko na “An Solamenteng Dalan Pasiring sa Buhay na Daing Katapusan.”
Seguradong maoswag an kualidad kan saindong espirituwalidad paagi sa pagigin presente sa bilog na tolong aldaw. Kamo odok na inaagda na magin presente sa kada sesyon, na gabos iyan, siempre, mayo nin bayad. Para sa lugar na pinakaharani sa saindo, makikomunikar sa lokal na Kingdom Hall of Jehovah’s Witnesses o sumurat sa mga kagpublikar kan magasin na ini.