Umatender sa “Pagtubod sa Tataramon nin Dios” na Pandistritong Kombension!
MINILYON an maatender sa ginatos na lugar sa bilog na kinaban. Sa Pilipinas sana, 49 kombension an nakaiskedyul. An enot sa Disyembre 19-21 asin an huri sa Enero 2-4, 1998. Posibleng an saro sa tolong aldaw na mga pagtiripon na ini—Biernes sagkod Domingo—sa sarong siudad na harani sa saindong harong.
Makikinabang kamo sa abundang praktikal na pagtotokdo sa Biblia. Sa kadaklan na lugar mapoon an programa kada aga sa alas 8:30 paagi sa musika. Itatampok sa Biernes na aga an 25 minutos na mga interbio sa mga tawo na an buhay naapektaran na marhay kan saindang pagtubod sa Tataramon nin Dios. Matatapos an enot na sesyon na iyan paagi sa pahayag sa pinakatema, “Paglakaw Paagi sa Pagtubod, Bakong Paagi sa Pakaheling.”
Kokonsideraron kan enot na pahayag sa Biernes na hapon an mahalagang marhay na kabtang kan mga hoben sa Kristianong kongregasyon. Ipaliliwanag kan masunod na may tolong kabtang na simposium an mga pamantayan sa Biblia na may koneksion sa Kristianong gawe-gawe sa pagtaram, mga ugale, asin personal na pag-alinyar. Sunod ikokonsentrar kan mga pahayag na “Magmaan sa Kadaihan nin Pagtubod” asin “An Tataramon nin Dios Buhay” an atension sa marahay na konseho na nasa Hebreo kapitulo 3 asin 4. Matatapos an programa sa Biernes paagi sa pahayag na “Sarong Libro Para sa Gabos na Tawo.”
An enot na pahayag sa Sabadong aga iyo an “An Pagtubod na Daing Gibo Gadan.” Ilaladawan kan saro pang importanteng pahayag sa agang iyan, “Magin Nakagamot Asin Marigon sa Katotoohan,” kun paano magigibo an espirituwal na pagtalubo. Matatapos an sesyon paagi sa sarong regular na kabtang kan kombension, “An Pagtubod sa Tataramon nin Dios Naggigiya sa Bautismo,” na pakatapos kaiyan magkakaigwa nin probisyon na mabautismohan an bagong mga disipulo.
Ipaliliwanag kan pambukas na pahayag sa Sabadong hapon, “Makipaglaban nin Maigot Para sa Pagtubod,” an konseho kan libro kan Biblia na Judas. Kokonsideraron kan sarong oras an lawig na simposium na may temang “Dumuman Kita sa Harong ni Jehova” an mga pakinabang sa Kristianong mga pagtiripon. Matatapos an programa sa aldaw na iyan paagi sa pahayag na “An Kualidad kan Saindong Pagtubod—Nababalo Ngonyan.”
Itatampok kan programa sa Domingong aga an may tolong kabtang na simposium na magpapaliwanag kan libro kan Biblia na Joel, kaiba an aplikasyon kaiyan sa satong kaaldawan. Dangan masunod an sarong drama sa Biblia na may temang “Papagdanayon na Simple an Saindong Mata.” An sarong tampok na kabtang kan kombension iyo an pahayag-publiko sa hapon, “An Pagtubod Asin an Saindong Ngapit.”
Seguradong magigin kamong mayaman sa espirituwal paagi sa pagigin presente. Maogma kamong aakoon sa kada sesyon. Magplano na ngonyan na umatender. Para sa lugar na pinakaharani sa saindong harong, kontakon an lokal na Kingdom Hall kan Mga Saksi ni Jehova o sumurat sa mga kagpublikar kan magasin na ini. Puede man nindong makua an adres kan mga lugar kan kombension sa Disyembre 8 luwas kan Awake!