Umatender sa “Diosnon na Takot” na Pandistritong Kombension!
Nakagibo na daw kamo nin mga plano na makaatender sa 1994 “Diosnon na Takot” na Pandistritong Kombension kan mga Saksi ni Jehova? Sierto nanggad, makikinabang kamo paagi sa pagigin presente sa gabos na tolong aldaw! Sa labing 42 na kombension na iniskedyul sa Pilipinas sana, posibleng sarong kombension an gigibohon na harani sa saindong iniistaran.
An sarong klase nin takot puwedeng paluyahon an kapusoan asin raoton an paglaom; minsan siring, an keynote address sa Biyernes na aga tatawan nin kahulogan an diosnon na takot asin sasabihon an dakol na pakinabang kaiyan. Iyo nanggad, itatampok kan bilog na programa sa kombension an mga pakinabang na ini.
Sa Biyernes na hapon madadangog nindo kun paano mapaparigon nin diosnon na takot an pag-agoman asin an buhay pampamilya, siring man kun paano iyan makakatabang sa mga hobenes na magdanay na marigon sa saindang kaimbodan sa Dios. An sesyon sa hapon tatapuson paagi sa nakakaogma sa pusong presentasyon na “Karangahan Para sa mga Nagadanan.” Pahahalagahan nindo an praktikal na impormasyon na itatao durante kan pahayag na iyan tanganing matabangan an mga nagadanan nin mga namomotan.
Ipapaheling kan programa sa Sabado kun paano mapapakosog kan diosnon na takot an satong pagkuyog sa paggiya ni Jehova manongod sa kongregasyon asin sa satong ministeryo. Sa pahayag na “Basahon an Tataramon nin Dios, an Banal na Biblia, Aroaldaw,” maako an mga delegado nin praktikal na mga suhestion sa pagbasa asin pag-adal kan Biblia. Matatapos an programa sa Sabado paagi sa pahayag manongod sa nakakapukaw nin interes na tema na “An Makangingirhat na Aldaw ni Jehova Harani Na.”
An sarong tampok sa programa sa Domingo iyo an pahayag na “Magkakaigwa nin Pagkabuhay Liwat kan mga Matanos.” Sa masunod na pahayag, “Nakaligtas na Buhay sa Dakulang Kahorasaan,” itatao an paliwanag manongod sa makangangalas na panuga ni Jesus dapit duman sa mga dai na noarin man magagadan.—Juan 11:26.
An sesyon sa Domingong aga matatapos paagi sa nakakapahiro sa isip na 40-minutos na drama na may titulong An mga Pagpipilian na Napapaatubang sa Saindo. An mga nagdadangog papagirumdomon kan aldaw ni Josue asin maheheling na ilinaladawan an saiyang marigon na desisyon na maglingkod ki Jehova. An pagbalo paagi sa kalayo kan mga aldaw ni Elias iaatubang man, asin palalatawon an mga leksion sa duwang pangyayaring ini na matabang sa mga delegado na ipaheling an diosnon na takot ngonyan. Sa hapon, an pahayag publiko na, “Taano ta Dapat na Matakot Ngonyan sa Tunay na Dios,” magigin tampok kan kombension.
Gumibo na ngonyan nin mga plano na makaatender. Tanganing makua an lugar na pinakaharani sa saindong harong, kontakon an lokal na Kingdom Hall kan mga Saksi ni Jehova o sumurat sa mga kagpublikar kan magasin na ini. Ililista man sa Disyembre 8 luwas kan Awake! an mga adres kan gabos na lugar nin kombension sa Pilipinas.
[Picture Credit Line sa pahina 32]
T. Rosenthal/SUPERSTOCK