Kun Taano ta Maninigo Kamong Umatender
AAKOON nindo an apat na kapakipakinabang na aldaw nin espirituwal na pagtotokdo sa “Banal na Pagtotokdo” na Pandistritong Kombension, na ginibo na kaining nakaaging tig-init sa mga siudad sa bilog na kinaban. Sa Estados Unidos sana, an labi sa 150 kan pagtiripon na ini ginibo na mas amay pa sa taon na ini. Sa pankagabsan, an programa mapoon sa Huwebes ala 1:20 n.h. asin matapos sa Domingo alas 4:10 n.h. Magigin tampok sa nagkapirang kombension an mga bareta nin mga misyonero, na natabangan na makapuli sa saindang sadiring nasyon para sa maogmang okasyon na ini.
Baga man kamo gurang o hoben—sarong agom na lalaki, agom na babae, ama, ina, tin-edyer, o aki—aakoon nindo an pagtotokdo na iaatubang sa malinaw, kawiliwiling paagi na mapakikinabangan nindo. Halimbawa, dakol ngonyan an naghahapot, Ano an katuyohan nin buhay? Sa Biyernes na aga, maggagayagaya kamong madangog na ipinaliliwanag an hapot na ini patin maoogma sa makakamtan nindo para sa pagtabang sa iba na masabotan an tema.
Sa Biyernes na hapon an programa itatampok an mga kabtang na “Paggibo sa Pag-agom na Nagdadanay na Pagsasaro,” “Magmaigot Para sa Kaligtasan kan Saindong Harong,” asin “Mga Magurang—An Saindong mga Aki Nangangaipo nin Espesyal na Atension.” Kasunod tolos kaini, isesentro an espisipikong atension sa mga problemang inaatubang nin mga hobenes asin kun paano ninda iyan maaatubang. Maninigo sindang mapakosog kan modernong aldaw na drama na may titulong Mga Hobenes na Ginigirumdom an Saindang Kaglalang Ngonyan.
Sa Sabado an programa itatampok an hula ni Jesus manongod sa huring mga aldaw asin nangorogna an saiyang mga tataramon na: “Pakatapos tolos kan kahorasaan kan mga aldaw na iyan an aldaw madiklom.” (Mateo 24:29) Bobooton nindong madangog an pag-orolay manongod sa kun noarin mangyayari an kahorasaan na iyan. An programa sa Sabado rerepasohon man an rekord kan mga Saksi ni Jehova sa modernong mga panahon asin ipaheheling kun ano na an saindang naginibo.
An saro pang drama sa Domingo, na an titulo Dai Kamo Madayaan o Mag-olog-olog sa Dios, aatubangon an angat sa Kristianong kaimbodan nin saro huli sa popular na mga video asin musika ngonyan. An pampublikong diskurso pagkahapon itatampok an temang “Kapakipakinabang na Pagtotokdo Para sa Satong Delikadong mga Panahon.” An programa matapos sa hatol na “Padagos na Marigon na Mangapot sa Banal na Pagtotokdo.”
Sierto nanggad na makikinabang kamo paagi sa pagigin presente sa bilog na apat na aldaw! Maogma kamong iniimbitaran na umatender. Tanganing makua an lugar na pinakaharani sa saindong harong, kontakon an lokal na Kingdom Hall kan mga Saksi ni Jehova o sumurat sa kagpublikar kan magasin na ini.