Mga Hapot Hale sa mga Parabasa

An mga tataramon daw na “tinawan kan balaog na espiritu,” na yaon sa 1 Corinto 14:​37, nangangahulogan na an sarong tawo nag-ako nin banal na espiritu sa sentido nin pagigin linahidan, o boot daw sabihon kaiyan na sia igwa nin milagrosong balaog gikan sa espiritu?

Sa New World Translation of the Holy Scriptures, an bersikulong ini nagsasabi: “Kun an siisay man naghohona na sia propeta o tinawan kan balaog na espiritu, midbidon nia an mga isinusurat ko sa saindo, huling an mga iyan an pagboot kan Kagurangnan.”​—1 Corinto 14:37.

Puwedeng saboton nin sarong nagbabasa an fraseng “tinawan kan balaog na espiritu” bilang pagsambit sa bagay na an enot na siglong mga Kristiano mga pinaniaki kan espiritu asin nagin espirituwal na mga aki nin Dios. O an frase puwedeng saboton na minaaplikar sa saro na nag-ako nin espesyal na balaog kan banal na espiritu. An huring pakahulogan na ini an posible, siring sa ipinaheheling kan mga pangyayari sa likod kan tekstong ini.

Ginamit digdi ni apostol Pablo an Griego na pneu·ma·ti·kosʹ, na igwa kan pundamental na kahulogan nin “napapanongod sa espiritu, espirituwal.” An mga porma kaiyan ginagamit sa mga paglaladawan na “espirituwal na hawak,” “espirituwal na bendisyon,” “espirituwal na pakatalastas,” asin “espirituwal na harong.”​—1 Corinto 15:​44; Efeso 1:​3; Colosas 1:​9; 1 Pedro 2:5.

Sa mga kasong iyan, an Biblia itinatalaan an bagay (hawak, bendisyon, pakatalastas, harong) na ilinaladawan kan “espirituwal.” Pero sa ibang kaso, an kahulogan asin angay na traduksion sa “espirituwal” kaipuhan na madeterminaran gikan sa konteksto. Halimbawa, an 1 Corinto 2:​14, 15 ipinaheheling an pagkakalaen kan ugale nin pisikal na tawo asin nin ho pneu·ma·ti·kosʹ, na an rasonableng boot sabihon “espirituwal na tawo.”

An 1 Corinto kapitulo 12 sagkod 14 nasesentro sa milagrosong mga balaog kan banal na espiritu. Itinao ini nin Dios sa nagkapirang enot na Kristiano tanganing ipaheling na dai na nia ginagamit an Israel sa laman kundi binibendisyonan nia ngonyan an Kristianong “Israel nin Dios.” (Galacia 6:16) Mapadapit sa mga balaog na ini, si Pablo nagsurat: “Ngonyan igwa nin manlaenlaen na balaog, alagad saro sana an espiritu.” (1 Corinto 12:4) An espesyal na kadonongan, kaaraman, asin pagtubod kabale sa mga balaog kan espiritu, siring man an paghula, pagtaram nin laen-laen na tataramon, asin an pag-interpretar nin mga tataramon.​—1 Corinto 12:​8-11.

An mga Kristiano sa Corinto na sinuratan ni Pablo mga linahidan kan banal na espiritu nin Dios. Si Pablo nagsabi: “Alagad kamo nahugasan na, alagad kamo pinakangbanal na, alagad kamo ipinahayag nang matanos sa ngaran kan satong Kagurangnan na si Jesu-Cristo asin sa espiritu kan satong Dios.” (1 Corinto 6:11; 12:​13) Iyo, an gabos nag-ako kan “tanda kan madatong, an boot sabihon, an espiritu.” (2 Corinto 5:5) Alagad, bakong gabos sa sainda nag-ako nin espesyal na balaog paagi sa banal na espiritu. Asin garo baga dakol an nawili sa pagtaram nin laen-laen na tataramon, na tinatawan nin labi sa maninigong pagpahalaga an balaog na ini. Si Pablo nagsurat tanganing itanos an saindang pag-isip asin idinoon na an mga tataramon dai pakikinabangan nin dakol na tawo kapareho kan balaog na paghula. Sa katapusan kan kapitulo 12, sinadol ni Pablo an mga taga-Corinto: “Padagos nindong maigot na hanapon an orog kadakulang mga balaog.”​—1 Corinto 12:​28-31.

Dangan, sa kapinonan kan kapitulo 14, nagsadol sia: “Pag-aaboton nindo an pagkamoot, alagad danay na maigot na hanapon an [ta pneu·ma·ti·kaʹ], alagad orog karahay tangani na kamo makapaghula.” Hanapon an ano? An mga Kristianong idto dai kaipuhan na hanapon an paglahid nin espiritu, ta igwa na sinda kaiyan. Rasonable na an boot sabihon ni Pablo “mga balaog” kan espiritu, na, sa katapusan kan kapitulo 12, isinadol niang hanapon ninda. Sa siring, an pagtradusir kan New World Translation of the Holy Scriptures sa 1 Corinto 14:1: “Danay na maigot na hanapon an espirituwal na mga balaog.” An ibang bersion nin Biblia tinatradusir digdi an ta pneu·ma·ti·kaʹ na “an espirituwal na mga balaog” o “an mga balaog kan Espiritu.”

Huli sa mga pangyayaring iyan, maririsa ta na sa pagtatapos kan kapitulo 14, si Pablo ikinokonektar an paghula sa pneu·ma·ti·kosʹ. Kapareho kan bersikulo 1, an konteksto nagsusuherir na an boot niang sabihon pagigin tinawan kan balaog na espiritu. An The New Testament in Modern Speech, ni R. F. Weymouth, inaadaptar an pagkatradusir na: “Kun ibinibilang nin siisay man na sia propeta o tawo na igwang espirituwal na mga balaog, akoon nia bilang pagboot kan Kagurangnan an isinusurat ko ngonyan.”

Iyo, an gabos na Kristiano, baga man sinda igwang balaog na paghula o ano pa man na ibang balaog kan espiritu, kaipuhan na akoon asin sunodon an hatol na isinurat ni Pablo mapadapit sa kun paano maninigong magibo an mga bagay sa kongregasyon.