Mga Hapot Hale sa mga Parabasa
Masasabi daw niato na an mga lingkod nin Dios ngonyan na may daganon na paglaom igwang espiritu nin Dios na arog kadakol kan nasa linahidan nin espiritung mga Kristiano?
An hapot na ini bakong bago. An bagay man sanang ini sinimbag sa “Mga Hapot Hale sa mga Parabasa” sa The Watchtower na Abril 15, 1952. Dakol na an nagin Saksi poon kaidto, kaya puede tang konsideraron an hapot asin sa siring marepaso an sinabi kan naenot na materyal.
Sa pundamental, an simbag, iyo, an fiel na mga tugang na lalaki asin babae na kabilang sa grupong ibang karnero puedeng makihiras na may magkaparehong sokol sa mga linahidan sa pag-ako nin banal na espiritu nin Dios.—Juan 10:16.
Siempre, ini dai nangangahulogan na an espiritu naghihiro sa pareparehong paagi sa gabos na indibiduwal. Girumdoma an fiel na mga lingkod kaidtong mga panahon bago Kristiano, na tunay na nag-ako nin espiritu nin Dios. May kapangyarihan gikan sa espiritu, an nagkapira sa sainda guminadan nin mabangis na mga hayop, nagpaomay sa mga may helang, nagbuhay pa ngani nin mga gadan. Asin kinaipuhan ninda an banal na espiritu sa pagsurat kan ipinasabong na mga libro kan Biblia. (Hokom 13:24, 25; 14:5, 6; 1 Hade 17:17-24; 2 Hade 4:17-37; 5:1-14) An The Watchtower nagsabi: “Minsan ngani bakong kabilang sa grupong linahidan, sinda pano nin banal na espiritu.”
Gikan sa saro pang anggulo, konsiderara an mga lalaki asin babae kan enot na siglo na linahidan kan banal na espiritu, na nagigin espirituwal na mga aki nin Dios na may langitnon na paglaom. An gabos linahidan, alagad iyan dai nangangahulogan na an espiritu pakatapos kaiyan naghiro sa pareparehong paagi sa sainda gabos. Malinaw iyan sa 1 Corinto kapitulo 12. Dian ipinaliwanag ni apostol Pablo an mga balaog kan espiritu. Mababasa ta sa bersikulo 8, 9, asin 11: “Sa saro itinao paagi sa espiritu an pagtaram nin kadonongan, sa saro pa an pagtaram nin kaaraman sono sa iyo man sanang espiritu, sa saro pa an pagtubod paagi sa iyo man sanang espiritu, sa saro pa an mga balaog na mga pagpaomay paagi sa sarong espiritu na iyan. . . . Alagad an gabos na paghirong ini ginigibo nin saro asin iyo man sanang espiritu, na nagwawaras sa lambang saro nin kanya-kanya sono sa boot kaiyan.”
Makahulogan nanggad, bakong gabos na linahidan kaidto igwa nin milagrosong mga balaog kan espiritu. Sa 1 Corinto kapitulo 14, nasambitan ni Pablo an sarong pagtiripon sa kongregasyon na dian an saro igwa kan balaog na pagtaram sa laen-laen na tataramon, alagad mayo ni saro sa mga presente an igwa kan balaog na pagtradusir. Minsan siring, sa sarong mas naenot na pangyayari, naeksperyensiahan kan kada saro sa sainda an paglahid nin espiritu. Magigin makatanosan daw na sabihon na an tugang na igwa kan balaog na pagtaram nin laen-laen na tataramon mas dakol an espiritu kisa sa iba pang presente? Bako. An iba pang mga linahidan na idto dai nagkulang, na garo baga dai nakasasabot sa Biblia patin sa sarong idto o dai man kayang atubangon an mga pagbalo. An espiritu naghiro sa sarong espesyal na paagi sa tugang na nakatataram nin laen-laen na tataramon. Pero, sia asin sinda kinaipuhan na magdanay na dayupot ki Jehova asin ‘padagos na mapano nin espiritu,’ siring kan isinurat ni Pablo.—Efeso 5:18.
Mapadapit kaidtong kabilang sa mga natatada ngonyan, tunay na inako ninda an espiritu nin Dios. May panahon na iyan naghiro sa sainda sa sarong espesyal na paagi—kan panahon na sinda lahidan asin akoon bilang espirituwal na mga aki. Pakalihis kaidto sinda ‘padagos na napano nin espiritu,’ na tinatabangan kaiyan kun sinda naghihingoang saboton nin mas malinaw an Biblia, nangengenot sa gibohon na paghuhulit, asin napapaatubang sa mga pagbalo—personal o organisasyonal.
An mga miembro kan “ibang karnero,” minsan ngani dai nakaeksperyensia nin paglahid, sa ibang bagay talagang nag-aako nin banal na espiritu. An The Watchtower na Abril 15, 1952, nagkomento:
“Ginigibo kan ‘ibang karnero’ ngonyan an trabaho na kapareho kan sa mga natatada, sa irarom kan parehong masakit na mga kamugtakan, asin ipinaheheling an kaparehong pagigin fiel asin integridad. Sinda nagkakakan sa sarong espirituwal na lamesa, parareho an kinakakan, pararehong mga katotoohan an naiintindihan. Huling daganon na grupo, na may daganon na mga paglaom asin odok na interes sa daganon na mga bagay, sinda tibaad mas interesado sa mga teksto na konektado sa daganon na mga kamugtakan sa bagong kinaban; mantang an linahidan na mga natatada, na may langitnon na mga paglaom asin makosog na personal na interes sa mga bagay kan espiritu, tibaad mas mahigos na inaadalan an mga bagay na iyan sa Tataramon nin Dios. . . . Pero, nagdadanay an katunayan na an pararehong mga katotoohan asin pararehong pakasabot puedeng makua kan duwang grupo, asin kun paano sana nagmamahigos an mga indibiduwal sa pag-adal an nagdedeterminar sa nakukua nindang pakasabot sa langitnon asin daganon na mga bagay. An espiritu nin Dios makukua kan duwang grupo na may magkaparehong sokol, asin an kaaraman asin pakasabot pareho itinatao sa duwa, na may magkaparehong mga oportunidad sa pag-intindi kaiyan.”