“Midbida Nindo an Siring na mga Tawo”

BAKONG marahay an kamugtakan sa kongregasyon nin Corinto. Nagkaigwa nin nakabibiglang kaso nin inmoralidad, asin may pagkabaranga sa tahaw kan mga tugang. An iba napaatubang sa magagabat na personal na problema o may mga hapot na kaipuhan na simbagon. An ibang tugang nag-iinarakusaran sa korte; an iba dinedeharan pa ngani an pagkabuhay liwat.

Naglataw man an seryosong mga hapot. Maninigo daw na an mga nasa harong na baranga sa pagtubod magdanay sa kaibahan kan saindang daing pagtubod na agom, o maninigo na sinda bumulag? Ano an katongdan kan mga tugang na babae sa laog kan kongregasyon? Angay daw na kumakan nin karne na iinatang sa mga idolo? Paano maninigong gibohon an mga pagtiripon​—kabale na an Pamanggihan kan Kagurangnan?​—1 Corinto 1:12; 5:1; 6:1; 7:​1-3, 12, 13; 8:1; 11:​18, 23-26; 14:​26-35.

Daing duwa-duwa na nahahadit manongod sa ikararahay kan saindang mga tugang sa siring karibok na espirituwal na kamugtakan, si Acaico, Fortunato, asin Estefanas nagbaklay tanganing songkoon si apostol Pablo sa Efeso. Apuera sa siring na nakariribok na bareta, posible na igwa sindang darang surat para ki Pablo hale sa kongregasyon na may laog na mga hapot manongod sa mga isyung ini. (1 Corinto 7:1; 16:17) Malinaw na bako sanang an tolong tugang na lalaking ini an nahahadit manongod sa situwasyon. Si Pablo, sa katunayan, nakaresibi na nin bareta hale sa “mga yaon sa harong ni Cloe” na igwa nin pagkabaranga sa tahaw kan mga miembro kan kongregasyon. (1 Corinto 1:11) Daing duwa-duwa na an report kan mga mensahero nakatabang ki Pablo na magkaigwa nin mas malinaw na pakasabot sa situwasyon, na makapagdesisyon kun anong hatol an itatao, asin kun paano sisimbagon an pinalataw na mga hapot. Minalataw na an surat na ngonyan midbid niato bilang an Enot na Corinto iyo an simbag ni Pablo, na giniyahan kan banal na espiritu nin Dios. Si Acaico, Fortunato, asin Estefanas iyo an tibaad nagdara kan surat.

Sairisay sinda Acaico, Fortunato, asin Estefanas? Ano an satong manonodan sa pag-adal sa sinasabi kan Kasuratan manongod sa sainda?

An Kairiba sa Harong ni Estefanas

An kairiba sa harong ni Estefanas iyo an “enot na mga bunga” kan ministeryo ni Pablo sa Romanong probinsia nin Acaya, Timog na Grecia, kan mga taon 50 C.E., asin si Pablo mismo an nagbautismo sa sainda. Malinaw na ibinilang sinda ni Pablo na arogan, sarong maygurang na impluwensiang nakaparirigon para sa mga taga-Corinto. Maogma nia sindang inomaw huli sa saindang aktibidad para sa kongregasyon: “Ngonyan ako nagsasadol sa saindo, mga tugang: Aram nindo na an kairiba sa harong ni Estefanas iyo an enot na mga bunga nin Acaya asin na itinalaga ninda an saindang sadiri na maglingkod sa mga banal. Kamo man logod padagos na magpasakop sa siring na mga tawo asin sa gabos na nakikipagtabangan asin nagpapagal.” (1 Corinto 1:16; 16:​15, 16) Dai sinabi kun sairisay an eksaktong minakompuesto sa “kairiba sa harong” ni Estefanas. An ekspresyon puedeng mangahulogan sana nin mga miembro nin pamilya alagad puede man na kabale an mga oripon o empleyado. Mantang an Acaico sarong Latin na ngaran na naglaladawan sa sarong oripon, asin an Fortunato naglaladawan sa sarong pinatalingkas na tawo, an nagkapirang komentarista naghohona na an duwa posibleng miembro kan kairiba sa harong man sanang iyan.

Ano man an totoo, ibinilang ni Pablo na arogan an kairiba sa harong ni Estefanas. An mga miembro kaiyan ‘itinalaga an saindang sadiri na maglingkod sa mga banal.’ Seguradong aram kan pamilya ni Estefanas na igwang dapat na gibohon para sa karahayan kan kongregasyon asin boluntad na inako an paglilingkod na ini bilang personal na paninimbagan. An saindang kamawotan na itao an siring na paglilingkod sa mga banal daing duwa-duwa na maninigong tawan nin moral na pagsuportar asin pagmidbid.

“Pinaginhawa Ninda an Sakong Espiritu Asin an Saindo”

Minsan ngani nahahadit si Pablo manongod sa situwasyon sa Corinto, an pag-abot kan tolong mensahero nakapakosog sa saiyang boot. Si Pablo nagsasabi: “Ipinaggagayagaya ko an pagdatong ni Estefanas asin ni Fortunato patin ni Acaico, huli ta hinipnoan ninda an pagigin mayo nindo digdi. Huli ta pinaginhawa ninda an sakong espiritu asin an saindo.” (1 Corinto 16:​17, 18) Huli sa mga kamugtakan, an pisikal na pagkabulag sa mga taga-Corinto posibleng pinaggikanan nin kahaditan ni Pablo, alagad ngonyan an presensia kan saindang mga representante nakahipno sa pagigin mayo kan bilog na kongregasyon. An saindang report posibleng nagserbi na makompleto an impormasyon ni Pablo manongod sa situwasyon asin medyo nakaina sa saiyang mga kapurisawan. Total tibaad an situwasyon bako man na arog karaot kan inimahinar nia.

Sono ki Pablo, an misyon kan tolo bako sanang pinaginhawa an saiyang espiritu kundi nagserbi man na pakosogon an espiritu kan kongregasyon nin Corinto. Daing duwa-duwa na naginhawahan sinda na maaraman na an saindang mga representante malinaw na ikinapaliwanag ki Pablo an lambang aspekto kan situwasyon asin mabalik na dara an saiyang hatol.

Kaya si Estefanas asin an duwa niang kaiba maogmang tinawan nin komendasyon sa saindang mga pagpapagal para sa mga taga-Corinto. Kanigoan an pag-apresyar ni Pablo sa mga lalaking ini kaya pagbalik ninda sinda maninigong makapangenot sa barangang kongregasyon nin Corinto. Sinadol kan apostol an mga tugang: “Padagos na magpasakop sa siring na mga tawo asin sa gabos na nakikipagtabangan asin nagpapagal. . . . Midbida nindo an siring na mga tawo.” (1 Corinto 16:​16, 18) An siring na makosog na rekomendasyon malinaw na nagparisa kan lubos na kaimbodan kan mga lalaking ini sa ibong kan mga tension sa laog kan kongregasyon. An siring na mga lalaki maninigong kamotan.​—Filipos 2:29.

An Fiel na Pakipagtabangan May Marahay na mga Resulta

Mayong duda manongod dian, an pakipagtabangan na marhay sa organisasyon ni Jehova asin sa mga representante kaiyan may marahay na mga resulta. Kan ipadara ni Pablo an surat na ngonyan midbid bilang an Ikaduwang Corinto, dai nahaloy pakatapos kan enot na surat, mas marahay na an kamugtakan sa kongregasyon. An padagos na pasensiosong aktibidad kan mga tugang na arog ni Acaico, Fortunato, asin Estefanas, siring man an pagsongko ni Tito, nagkaigwa nin marahay na epekto.​—2 Corinto 7:​8-15; ikomparar an Gibo 16:​4, 5.

An mga miembro kan mga kongregasyon kan banwaan ni Jehova sa modernong aldaw puedeng makinabang paagi sa paghorophorop sa halipot na pagkasambit sa fiel na mga lalaking ini sa Kasuratan. Halimbawa, ipamugtak na an sarong nagpapadagos na situwasyon sa laog kan lokal na kongregasyon dai tolos puedeng maresolberan huli sa sarong dahelan asin ikinahahadit kan mga tugang. Ano an maninigong gibohon? Arogon si Estefanas, Fortunato, asin Acaico, na dai suminibog sa saindang paninimbagan na paisihon si Pablo dapit kan situwasyon dangan may kompiansang isarig an mga bagay sa mga kamot ni Jehova. An kaigotan para sa katanosan dai nanggad nagpangyari sa sainda na independienteng gumibo nin aksion o ‘maanggot tumang ki Jehova.’​—Talinhaga 19:3.

An kongregasyon sadiri ni Jesu-Cristo, asin sa saiya mismong tamang panahon, arog sa Corinto, mahiro sia tanganing resolberan an ano man na mga problema na tibaad magtao nin peligro sa saindang espirituwal na ikararahay asin katoninongan. (Efeso 1:22; Kapahayagan 1:​12, 13, 20; 2:​1-4) Mientras tanto, kun aarogon niato an marahay na halimbawa na itinao ni Estefanas, Fortunato, patin Acaico asin padagos na magpapagal sa paglilingkod sa satong mga tugang, kita man maimbod na magsusuportar sa areglo kan kongregasyon, na pinakokosog an satong mga tugang, asin ‘dinadagka sinda sa pagkamoot asin marahay na mga gibo.’​—Hebreo 10:​24, 25.