Mga Saksi Sagkod sa Kaporoporohhi kan Daga

ETAH

THULE

GODHAVN

GODTHÅB

JULIANEHÅB

ANGMAGSSALIK

AIDTO pang suanoy na mga panahon an Thule kabtang nin sarong ngaran na ginamit na naglaladawan sa ultimong pasohan, sa lugar man o sa iba pang bagay. Ngonyan an Thule iyo an ngaran nin sarong baryo sa harayong amihanan nin Greenland, an pinakadakulang isla sa kinaban. An baryo nginaranan nin siring kan 1910, kan an Danes na eksplorador na si Knud Rasmussen ginamit iyan bilang tiriponan para sa mga ekspedisyon sa polo. Maski ngonyan, an pagduman sa Thule mas masasabing ekspedisyon kisa sa biahe sa pag-aling-aling.

Pero, may apretadong pangangaipo nin mga ekspedisyon pasiring sa Thule. Bilang simbag sa pagboot ni Jesus na: ‘Magin mga saksi ko sagkod sa kaporoporohi kan daga,’ an Mga Saksi ni Jehova galagang darahon an maogmang bareta kan Kahadean nin Dios sa lugar na ini, saro sa permanenteng mga baryo nin mga tawo sa pinakaporong amihanan sa daga.​—Gibo 1:8; Mateo 24:14.

‘Noarin Kita Puedeng Magduman sa Thule?’

Kan 1955 an duwang Danes na Saksi na gustong makapakikabtang sa paghuhulit “sagkod sa kaporoporohi kan daga” nagdatong sa Greenland. An iba nagdatong kan huri, asin luway-luway na an saindang paghuhulit nakalakop sa timog asin solnopan na baybayon sagkod sa Melville de Bay saka sa nagkapirang kabtang sa sirangan na baybayon. Alagad an mas hararayong parte na arog nin Thule haros naabot sana paagi sa surat o telepono.

Sarong aldaw kan 1991, si Bo asin an saiyang agom, si Helen, duwang pambilog na panahon na ministro, nagtitindog sa ibabaw nin sarong gapo na natatanaw an Melville de Bay. Sa pagtanaw sa amihanan nag-isip-isip sinda, ‘Noarin kita makaduduman sa Thule tanganing darahon an maogmang bareta kan Kahadean sa mga tagaduman?’

Kan 1993, si Werner, saro pang pambilog na panahon na ministro, inatubang an peligro sa pagbalyo sa Melville de Bay sa saiyang 5.5 metros na marikas na barotong de motor na Qaamaneq (Liwanag). Naglayag na sia nin 1,200 kilometros hale sa Godthåb sagkod sa lugar nin Upernavik. Pero, bakong pasil an pagbalyo sa Melville de Bay​—na 400 kilometros na mahiwas na katubigan nin Arctico. Sa kadaklan na panahon kan taon, an bay natatahoban nin yelo. Nagin mapanggana si Werner sa pagbalyo sa bay, minsan ngani naraotan sia nin sarong makina huli sa yelo. Asin nahimo niang maghulit bago sia kinaipuhan na bumalik.

Pasiring sa Thule

Pakatapos kan biaheng idto, pinonan ni Werner na gumibo nin bagong mga plano. Kinaolay nia sinda Arne asin Karin​—na may sadiri man na baroto, siete metros na baroto na may apat na torogan asin, orog sa gabos igwa nin modernong kasangkapan sa nabigasyon—​manongod sa iribang pagbiahe pasiring sa Thule. An mga baroto may mga torogan, asin kun duwang baroto an sabay na magbibiahe, an pagbalyo sa Melville de Bay magigin bakong gayong peligroso. Tanganing mahulitan an pinakabanwaan na igwa nin 600 na habitante asin anom na baryo, nangaipo sinda nin dagdag na tabang. Kaya inagda ninda sinda Bo asin Helen saka sinda Jørgen asin Inge​—gabos eksperyensiadong ministro na pamilyar sa pagbiahe sa nasyon na ini—​na umiba. An lima sa grupong ini tatao man magtaram nin Greenlandico.

Patienot na nindang ipinadara an mga literatura sa Biblia. An mga baroto may karga man na mga literatura, patin kinakaipuhan na mga balon na pagkakan asin tubig, gasolina, reserbang makina, asin gomang balsa. Dangan, kan Agosto 5, 1994, pakatapos nin dakol na bulan na preparasyon, nagtiripon an grupo asin an duwang baroto andam asin kargado na sa duongan nin Ilulissat. Nagpoon an biahe paamihanan. Si Werner, Bo, asin Helen naglayag sa mas sadit na baroto. “An magigibo mo sana tumukaw o humigda sa saimong torogan asin mangapot,” an isinurat ni Bo. Sundan ta an rekord para sa biahe kan baroto.

“Mahiwason an kalmadong dagat. Magayonon na mga tanawon an naheling mi​—nagbabanaag na dagat, mahibog na dampog, maliwanag na saldang asin asul na langit, darakulang tipak nin iinaanod na yelo na kawiliwiling marhay an mga korte asin kolor, bulaw na walrus na nagbabalad sa ibabaw nin sarong pidaso nin naglalataw na yelo, baybayon na madiklom an mga bakilid asin kadikit an mga planodo—​daing katapusan an pagliwat nin mga tanawon.

“Siempre, an pinakainteresanteng parte iyo an pagsongko sa inaagihan ming mga baryo. Perming may mga tawo, na sa parate mga aki, sa pier tanganing helingon kun sairisay an mga bisita asin akoon sinda. Nagwaras kami nin mga literatura sa Biblia asin pinasubli an mga tawo nin sarong video manongod sa satong organisasyon. Dakol an nakaheling kaiyan bago kami maghale. Sa Timog na Upernavik, nagkapirang tawo an naglayag pasiring sa samong mga baroto dawa dai pa kami nakaduduong. Kaya sa sarong bilog na banggi, may mga bisita kami sa baroto asin dakol na hapot sa Biblia an sinimbag mi.”

Ngonyan, pakatapos kan enot na 700 kilometros na biahe, an duwang baroto andam nang bumalyo sa Melville de Bay.

An Delikadong Angat

“Ini an ibinilang kan kadaklan na delikadong kabtang kan biahe. Asin kaipuhan ming bumalyo nin diridiretso huli ta an baryo nin Savissivik (na kapinonan kan teritoryo asin duman sana kami makakukua nin maiistaran) may nakaolang pang yelo.

“Kaya nagpoon na kami. Huling kadakol kan yelo, puminatahaw kami sa dagat. Marahay na sana ta kalmado an katubigan. Daing gayong nangyari sa enot na pirang oras​—na naglalayag nin dakol na milya sa kadagatan. Pagkabanggi natanaw mi an Cape York asin luway-luway na nagpaamihanan, na mas harani sa baybayon. Ngonyan may yelo na naman​—haloy na, mahibog, asin nagkakabaraak na mga pidaso nin naglalataw na yelo sagkod sa maheheling pa nin mata. Sinundan mi an gilid kan yelo sagkod sa harayong distansia, na kun beses nagmamaniobra sa hayakpit na mga pag-oltanan nin yelo. Dangan nagkaigwa nin dampog, garo mahibog na kolor abong sopas, na pambihira kagayon huli sa liwanag kan pasolnop nang saldang. Asin an mga alon! Dampog, mga alon, asin yelo na durungan gabos​—an arin man kaini parateng igo nang angat.”

An Pag-ako sa Samuya

“Mas kalmado na an katubigan mantang parani na kami sa Pituffik. An mga linalang nagtao sa samuya nin nakaoogmang pag-ako: an saldang sa asulon na langit; sa atubangan mi, an mahiwas, malinaw na palaog na parte nin dagat sa pag-oltanan nin mga ampas, na may naglalataw na mga bulod-bulod nin yelo; asin duman sa harayo an lataw na korte kan gapo sa Dundas​—an dating Thule!” Mga 100 kilometros pa paamihanan, an mga nagbibiahe nakaabot sa saindang ultimong destinasyon.

Galaga sinda ngonyan na magpoon na maghulit sa harong-harong. Nagin bakong magalang an pag-ako sa duwa sa sainda sa enot nindang pinto. “Sinayumahan kami na garo man sana kami yaon duman sa Denmark,” an sabi ninda. “Alagad an kadaklan inako kaming may kaogmahan. An mga tawo mapaghorophorop asin edukado nanggad. An iba nagsabi na nadangog na ninda an manongod sa samo asin naoogma na sa katapustapusi kami uminabot. May nakamidbid kaming kahangahangang mga tawo, arog baga kan mga paradakop nin foca na nakaabot na sa Amihanan na Polo, asin mga propiong tagaduman, na kontento na asin maekonomiya saka medyo mapagduda dapit sa modernong sibilisasyon.”

Marahay an mga eksperyensia niamo gabos kan sumunod na pirang aldaw. An mga literatura sa Biblia inapresyar sa gabos na lugar. Sa nagkapirang harong an mga Saksi nakapoon tolos nin mga pag-adal sa Biblia. Si Inge nagsasaysay manongod sa sarong harong na nanompongan nia nin interes: “Iyan sarong malinig asin komportableng harong na saro an kuarto. Sa laog nin tolong sunod-sunod na aldaw, sinongko mi an mahoyong lalaki na nakaistar duman asin nawili kami sa saiya. Sia sarong tunay na paradakop nin foca, na igwa nin barotong inaapod kayak sa luwas kan saiyang harong. Nakapana na sia nin dakol na oso, walrus, asin, siempre, foca. Sa samong ultimong pagsongko, namibi kami kaiba nia, asin napaluha an saiyang mga mata. Ngonyan kaipuhan ming isarig an gabos na bagay sa mga kamot ni Jehova asin maglaom na logod magkaigwa nin panahon asin oportunidad na makabalik.”

An Thule parateng dinudumanan nin mga Eskimong taga-Canada. Ibinabareta ni Inge: “Kami ni Helen may nakamidbid na nagkapirang Eskimo hale sa Canada. Interesante nanggad na sinda nakakapakikomunikar sa mga taga-Greenland; an mga tawo sa lugar nin Arctico garo magkakapareho an mga lenguahe. Minsan ngani an mga Eskimong taga-Canada igwa nin sadiring nasusurat na lenguahe, nababasa ninda an satong mga literatura sa Greenlandico. Ini tibaad magbukas nin maogmang mga oportunidad para sa sainda.”

Sinongko man an mga baryo na 50 sagkod 60 kilometros an rayo paagi sa baroto. “Kan pasiring kami sa baryo nin Qeqertat, nanggirilid kami sa baybayon, na naglalaom na makanompong nin mga tawo na nandadakop nin mga narwhal. Siring kan samong linaoman, sa sarong magapong lugar, nanompongan mi an sarong kampo na kompuesto nin tolo o apat na pamilya na nakasulot nin mga gubing na gibo sa barahibo nin hayop, na may mga tolda asin kayak. May kapot na sarapang, an mga lalaki pasarosaralidang nagtutukaw sa gapo sa pag-abang sa pinakamarahay na mga narwhal. Nagkapirang aldaw nang nag-aabang na mayong nadakop, dai nindang gayo nagustohan na maheling kami huli ta tibaad mabugaw mi an mga balyena! Garo sinda biyong bangkag sa saindang sadiring mga aktibidad. An mga babae nag-ako nin nagkapirang literatura, alagad ta bako idtong angay na panahon para sa dugang pang pakipag-olay. Sa katapustapusi uminabot kami sa Qeqertat kan alas 11 nin banggi asin natapos an samong ultimong pagsongko sa baryo kan alas 2 nin aga!”

“Sa katapustapusi naabot mi an Siorapaluk, an baryo sa pinakaporong amihanan sa Greenland. Yaon iyan sa sarong baybayon sa pamitisan nin berde, madoot na mga gapo sa tagiltil na palibot.” Literal na naabot kan mga Saksi an hararayong parte kan daga, kisuerra paamihanan, sa saindang gibohon na paghuhulit.

Natapos an Biahe

Natapos kan mga Saksi an saindang gibohon. Sinda naghulit sa harong-harong asin sa tolda-tolda, nanao nin mga literatura, nakakua nin mga suskripsion, nagpasale nin mga video, nakipag-olay sa dakol na taga-Greenland, asin nagkondukta nin mga pag-adal sa Biblia. Ngonyan panahon nang magpuli. “Pagsakay mi sa samong baroto kan bangging idto tanganing humale na sa baryo nin Moriusaq, nagkapirang tawo an yaon duman sa baybayon tanganing magbabay sa samuya, na ipinapaypay an mga libro o brochure na kinua ninda.”

Kan huri, sa sarong parte kan baybayon na daing nag-iistar, napangalas an mga Saksi na maheling an sarong lalaki na nagpapaypay sa ibabaw nin sarong gapo​—duman sa labi-labi kapuerang lugar! “Siempre, duminuong kami tanganing mamidbid sia. Sia palan sarong hoben na lalaki hale sa Berlin, Alemania, na nagbibiahe paamihanan sa saiyang kayak asin sarong bulan na sa biahe. Sa Alemania regular siang sinongko kan Mga Saksi ni Jehova asin igwa na kan nagkapirang libro ninda. Duwang oras kaming nakipag-olay sa saiya, asin sia tunay na naghanga na manompongan an mga Saksi sa siring na lugar.”

Sa baryo nin Savissivik, na linihisan sa biahe, an nagbibiaheng mga ministro maogmang inako. An nagkapira duman inako asin binasa an mga literatura kan nakaaging taon, asin gusto ninda nin dagdag pang espirituwal na pagkakan.

Katorseng oras an pabalik na pagbalyo sa Melville de Bay. “Naheling mi an pagsolnop nin aldaw, na digdi maeeksperyensiahan sa laog nin dakol na oras, na may dayaday na pagbarobago nin kawiliwiling mga kolor. An pagsirang kan aldaw, na kasunod tolos, haloy man. Mantang an langit sa amihanan-sirangan natatahoban pa kan pagsolnop nin aldaw na garo nakabukang mga abaniko na pula asin krimson, an aldaw suminirang haroharani sa timog. Iyan sarong tanawon na imposibleng ikaladawan​—o retratohon pa ngani—​nin igo.” An grupo yaon duman sa bilog na banggi.

“Pag-abot mi sa Kullorsuaq, pagal-pagal kami. Alagad maogma asin kontento kami. Mapanggana niamong natapos an biahe! Sa natada pang kabtang kan biahe, nakanompomg kami nin dakol na interes sa mga banwaan asin baryo sa mga baybayon. An hapot parateng naootro, ‘Taano ta dai puedeng magpawalat sa samuya an iba sa saindo? Namomondo kaming maheling kamo na madalion maghale!’”

Sa Qaarsut an sarong makikatood na pamilya inimbitaran an lima sa mga bisita na magkakan sa kaibanan ninda. “Gusto kan pamilya na duman na kami magtorog. Alagad huling igwa nin mas marahay na maaangklahan na mga lugar 40 kilometros sa enotan, nagsayuma kami asin naglayag. Kan huri nabaretaan mi na an sarong dakulang tipak nin inaanod na yelo nabaak kan sumunod na amay na aga, asin huli sa alon 14 saradit na baroto an nalunod duman sa dating namugtakan mi!”

Sa katapustapusi, an grupo nakabalik na sa Ilulissat, na natapos na an saindang ekspedisyon sa Thule. Haros kadungan kaiyan, duwa pang parahayag an nagbiahe pasiring sa puerang mga lugar kan sirangan na baybayon nin Greenland. Sa duwang biaheng idto, an mga parahayag nakawaras nin total na 1,200 na libro, 2,199 brochure, asin 4,224 magasin, saka nakakua sinda nin 152 na suskripsion. An komunikasyon sa dakol na bagong interesado pinapagdadanay ngonyan paagi sa telepono asin surat.

Sa ibong kan kalabot na panahon, kosog, asin kuarta, an Mga Saksi ni Jehova may dakulang kagayagayahan sa pag-otob sa pagboot kan saindang Kagurangnan na ‘magin mga saksi ko sagkod sa kaporoporohi kan daga.’​—Gibo 1:8.

[Kahon sa pahina 28]

Sa Sirangan na Baybayon nin Greenland

HAROS kadungan kan pag-abot kan grupo nin mga parahayag sa Thule, an sarong mag-agom na Saksi, si Viggo asin Sonja, nagbiahe pasiring sa dai pa nahuhulitan na teritoryo​—Ittoqqortoormiit (Scoresbysund) sa sirangan na baybayon nin Greenland. Tanganing makaduman kaipuhan sindang magbiahe pasiring sa Iceland, mag-eroplano pabalik sa Constable Point sa baybayon nin Greenland, dangan mag-elekopter.

“Ini an kaenot-enoteng pagdigdi kan Mga Saksi ni Jehova,” an pagsaysay kan duwang payunir na ini, na an propiong tataramon Greenlandico. “Sa ibong kan saindang pagigin nasa puerang lugar, makangangalas na an mga tawo edukado nanggad. Pero, naogma man sindang makanood nin bagong mga bagay. Bilang may balaog na mga paraestorya, gustong-gusto ninda kaming estoryahan kan manongod sa saindang pandadakop nin foca asin iba pang eksperyensia sa naturalesa.” Paano ninda inako an paghuhulit?

Sa paghuhulit sa harong-harong, nakaolay mi si J——, sarong katekista. ‘Salamat ta iiniba nindo ako sa saindong mga sinosongko,’ an sabi nia. Ipinaheling mi sa saiya an satong mga literatura asin kun paano an paggamit kaiyan. Kan sunod na aldaw nagduman sia sa samo asin gustong makanood manongod sa ngaran na Jehova. Ipinaheling mi sa saiya an sarong paliwanag sa nota sa ibaba kan saiyang sadiring Biblia na Greenlandico. Kan makahale na kami, inapodan nia sa telepono an samong mga katood sa Nuuk tanganing magpahayag kan saiyang pasasalamat sa samong pagsongko. Kaipuhan na hingoahon niamong padagos na tabangan an tawong ini.

“Nakaolay mi man si O——, sarong maestro na may aram manongod sa Mga Saksi ni Jehova. Tinawan nia kami nin duwang oras na makipag-olay sa saiyang mga estudyante na an mga edad 14 sagkod 16 anyos. Kaya ipinaheling mi sa sainda an satong video asin sinimbag an saindang mga hapot. An Questions Young People Ask​—Answers That Worka asin iba pang libro madalion na naubos na garo mainit na pandesal. Kan huri nakaolay mi an tolo sa mga aking babae. Kadakol sindang hapot, na an saro sa sainda espesyalmenteng interesado. Sia naghapot, ‘Paano an saro nagigin Saksi? Seguradong nakaoogma na magin arog sa saindo. Kampi man sa saindo si tatay ko.’ Nanuga kaming masurat.

“Sa saro kan mga baryo, may nakaolay pa kaming sarong katekista, si M——, asin nagkaigwa kami nin interesanteng pag-orolay. Sinabi niang seseguradohon nia na an mga lalaki na nasa pandadakop makaaako kan satong mga literatura pagbalik tolos ninda. Kaya ngonyan sia an satong ‘parahayag’ sa puerang lugar na idto.”

Minsan ngani idto pasikosiko asin mapagal na biahe, namatean kan duwang payunir na an saindang mga paghihingoa mayaman na binendisyonan.

[Nota sa ibaba]