Pakipagtipon sa mga Natatakot sa Dios
“AN MGA tawo sa gabos na lugar nagmamawot nin katalingkasan sa takot—pagkatakot sa kadahasan, pagkatakot sa kadaihan nin trabaho, asin pagkatakot sa grabeng helang. Iyan man an satong minamawot. . . . Kun siring, taano ta pinag-oolayan ta kun paano magpapatalubo nin takot?” An nakaiintrigang hapot na iyan pinalataw kan espiker sa pinakatemang pahayag sa kada saro kan “Diosnon na Takot” na Pandistritong mga Kombension, na nagpoon kan Hunyo 1994.
An minilyon na nag-atender—enot sa Amerika del Norte, dangan kan huri sa Europa, Amerika Sentral asin del Sur, Aprika, Asia, asin sa mga isla kan dagat—galagang makanood na pataluboon an siring na takot. Taano? Huli ta an satong pagkakaigwa nin kabtang sa mga bendisyon ni Jehova Dios para sa saiyang banwaan minadepende sa satong pagkakaigwa nin diosnon na takot. Tanganing makanood manongod sa diosnon na takot kaya nagtiripon an mga kombensionista, asin durante kan tolong aldaw na programa, dakol sindang nanodan manongod sa mahalagang Kristianong kuwalidad na ini.
‘Matakot sa Dios Asin Otobon an Saiyang mga Pagboot’
Iyan an tema sa enot na aldaw kan kombension, na basado sa Eclesiastes 12:13. Ano an boot sabihon kan matakot sa Dios? Sa pinakaenot na kabtang kan programa, ipinaliwanag kan tsirman sa kombension na an diosnon na takot nagpaparisa nin paghanga asin hararom na paggalang ki Jehova siring man nin marahay na pagkatakot na mapamondo sia. An siring na diosnon na takot bakong makangingiri; iyan nakararahay asin tama.
Paano kita nakikinabang sa nakararahay na takot na ini? An suminunod na pahayag, “Dai Kamo Mapagal Asin Sumuko,” nagpaliwanag na an diosnon na takot magmomotibar sato na otobon an mga pagboot nin Dios na may kagayagayahan. Kadungan kan pagkamoot sa Dios asin kataed, an siring na takot matao sato nin epirituwal na kosog. Iyo, an diosnon na takot makatatabang sato na malikayan an panluluya sa paurombasan para sa buhay na daing katapusan.
Kasunod sa programa an mga interbio na nag-aatubang nin buhay na patotoo na an diosnon na takot makasusustenir sa sato. An mga ininterbio nagsaysay kun paano an may paggalang na takot sa Dios nakaimpluwensia sa sainda na magpadagos sa ministeryo sa ibong nin kadaihan nin interes, pagkaindiperente, o paglamag asin nakatabang sainda na makatagal dawa sa atubangan nin masakit na personal na mga pagbalo.
Minsan siring, taano an ibang tawo ta igwa nin diosnon na takot mantang an iba mayo? Sa pahayag na “Pagpatalubo Asin Pagkinabang sa Diosnon na Takot,” an espiker sa pinakatemang pahayag nagpaliwanag na sa Jeremias 32:37-39, nanuga si Jehova na matao Sia sa Saiyang banwaan nin pusong matatakton sa Dios. Nagtatanom si Jehova nin diosnon na takot sa satong puso. Paano? Paagi sa saiyang banal na espiritu asin sa saiyang ipinasabong na Tataramon, an Biblia. Minsan siring, malinaw na kaipuhan kitang odok na maghingoa na adalan an Tataramon nin Dios asin lubos na aprobetsaran an abundang espirituwal na mga probisyon na saiyang ginibo. Kabale digdi an satong mga kombension asin pagtiripon sa kongregasyon, na tinatabangan kitang makanood na matakot sa saiya.
An programa sa hapon binuksan paagi sa sadol na manarig ki Jehova asin sa saiyang Tataramon. Sinundan ini nin pag-orolay dapit sa pangenot na mga paagi na an Kahadean maninigong makaapektar sa satong buhay bilang mga Kristiano.
Dangan suminunod an enot sa tolong simposium na iinatubang sa kombension. “An Diosnon na Takot Nagpapahiro Sato na Kuyogon an Banal na mga Kahagadan” an tema kan simposium na ini, na nagsentro nin atension sa pamilya. An minasunod halimbawa kan itinaong Makakasuratan—asin praktikal—na hatol.
□ Para sa mga agom na lalaki: An diosnon na takot maninigong magpahiro sa lalaki na kamotan an saiyang agom siring sa saiyang sadiring hawak. (Efeso 5:28, 29) An sarong lalaki dai tuyong kinokologan an saiyang sadiring hawak, sinosopog an saiyang sadiri sa atubangan nin saiyang mga katood, o itsinitsismis an saiyang sadiring mga pagkukulang. Kaya, kun siring, maninigo niang itao sa saiyang agom an dignidad asin paggalang na itinatao nia sa saiyang sadiri.
□ Para sa mga agom na babae: An diosnon na takot ni Jesus nagpahiro saiya na ‘danay na paogmahon an Dios.’ (Juan 8:29) Ini sarong marahay na ugale na dapat arogon nin mga agom na babae sa pakikiiba sa saindang agom.
□ Para sa mga magurang: An Kristianong mga magurang makakapaheling nin diosnon na takot paagi sa seryosong pagsaboot kan saindang mga paninimbagan bilang magurang, na minamansay an saindang mga aki bilang mana gikan ki Jehova. (Salmo 127:3) An pangenot na pasohan nin mga magurang maninigong padakulaon an saindang mga aki na magin tunay na mga Kristiano.
□ Para sa mga aki: Pinagbobotan ni Jehova an mga aki na kuyogon an saindang “mga magurang na nasa Kagurangnan.” (Efeso 6:1) Kaya, an pagkuyog sa mga magurang pagkuyog sa Dios.
An pantapos na pahayag kan aldaw nakapahiro sa boot, huli ta ipinaliwanag kaiyan an hararom na mga pagmate na naeeksperyensiahan niato gabos kun magadan an sarong namomotan. Alagad, sa katahawan kan pahayag igwa nin sorpresa. Pinaogma kan espiker an mga nagdadangog paagi sa pag-anunsiar kan pagluwas kan bagong brochure na Kun Magadan an Sarong Namomotan. An 32-pahinas, kompleto sa kolor na publikasyon na ini dakol an sinasabi na makatatabang sa mga nagmomondo na masabotan asin atubangon an mga pagmate asin emosyon na minalataw pagkagadan nin sarong namomotan. Namugtak na daw kamo sa situwasyon na dai nindo aram kun ano an sasabihon sa sarong nagadanan? An sarong kabtang kan brochure na ini nagpapaliwanag kun paano niato matatabangan an mga nagmomondo. Mantang naghihinanyog sa espiker, dakol sa mga nagdadangog an nag-iisip nin saro na puwedeng makinabang sa bagong brochure na ini.
‘Magtao nin Banal na Paglilingkod na May Diosnon na Takot Asin Paghanga’
Iyan an tema kan sunod na aldaw, na basado sa Hebreo 12:28. Durante kan programa sa aga an ikaduwang simposium, “Mga Kongregasyon na Naglalakaw na May Takot ki Jehova.” An enot na kabtang manongod sa pag-atender sa mga pagtiripon. An satong presensia sa mga pagtiripon nagpapaheling kan satong paggalang sa Dios asin sa saiyang espirituwal na mga probisyon. Paagi sa pag-atender, ipinaheheling ta na natatakot kita sa saiyang ngaran asin galagang sumunod sa saiyang kabotan. (Hebreo 10:24, 25) An ikaduwang espiker nagpaliwanag na tanganing an kongregasyon sa kabilogan makalakaw na may takot ki Jehova, maninigong gibohon kan lambang indibiduwal an saiyang kabtang sa pagpapadanay nin marahay na gawe. An ultimong espiker nagtaram manongod sa pribilehiyo asin obligasyon nin gabos na Kristiano—na ipahayag an maogmang bareta na mayo nin ontok. Sagkod noarin kita magpapadagos sa paghuhulit? Sagkod na sabihon ni Jehova na tama na.—Isaias 6:11.
“An Kagayagayahan ni Jehova Iyo an Saindong Kuta” an tema kan sunod na pahayag, na ipinaliwanag ngonyan sa mga artikulong pag-aadalan sa magasin na ini. (Nehemias 8:10) Taano an banwaan ni Jehova ta magayagaya? Sinambit kan espiker an nagkapirang dahelan. An sarong mahalagang marhay iyo na an dayupot na relasyon sa Dios ginigibo kitang pinakamagayagayang mga tawo digdi sa daga. Isip-isipa nanggad, an pagirumdom kan espiker sa mga kombensionista, igwa kita kan pribilehiyo nin pagigin kabilang sa mga tawo na dinagka ni Jehova na dumolok ki Jesu-Cristo. (Juan 6:44) Abaa kamapuwersang dahelan na maggayagaya!
Sarong tampok na kabtang sa kada kombension an bautismo, asin bakong puwera an “Diosnon na Takot” na mga Kombension. Sa pahayag na “Pagdusay Asin Bautismo na May Takot ki Jehova,” ipinaliwanag kan espiker na apat an personal na obligasyon kan gabos na bautisadong tawo: (1) Dapat niatong pag-adalan an Tataramon nin Dios sa tabang kan mga publikasyon na nagtatabang sato na masabotan asin iaplikar iyan; (2) dapat kitang mamibi; (3) dapat kitang makiasosyar sa mga kapagtubod sa mga pagtiripon sa kongregasyon; asin (4) dapat kitang magpatotoo sa ngaran asin Kahadean ni Jehova.
An programa sa Sabado nin hapon nagpoon paagi sa nagpapakosog sa boot na temang “Sarong Banwaan na Dai Binayaan ni Jehova.” Kaidtong 35 siglo na an nakaagi, kan an nasyon nin Israel napaatubang sa masakit na mga panahon, si Jehova nagtao nin garantiya paagi ki Moises, na nagsasabi: ‘Si Jehova na saimong Dios . . . dai ka babayaan ni pababayaan man.’ (Deuteronomio 31:6) Pinatunayan ni Jehova an garantiyang iyan paagi sa pagprotehir sa mga Israelita kan sinda lumaog sa Dagang Panuga asin sinadiri iyan. Ngonyan, kun napapaatubang sa masakit na mga pagbalo, puwede man kitang magkaigwa nin lubos na kompiansa na dai kita babayaan ni Jehova, basta magdanay kitang dayupot sa saiya asin maghimate sa hatol kan saiyang Tataramon.
Paano kamo makanonompong nin kaogmahan sa pagbasa sa Biblia? Sa pahayag na “Basahon an Tataramon nin Dios, an Banal na Biblia, Aroaldaw,” isinuherir kan espiker an pagbasa na igwang mapagsiyasat na isip asin ihinahapot an arog kan mga ini: Ano an itinotokdo sako kan kasaysayan na ini manongod sa mga kuwalidad asin dalan ni Jehova? Paano daw ako orog na magigin arog ki Jehova sa mga bagay na ini? An pagbasa sa Biblia sa siring kaining paagi nakaoogma asin nakakokontentong eksperyensia.
An atension sunod na isinentro sa ikatolong simposium kan programa, an “Mga Probisyon sa Pagtabang sa mga Natatakot ki Jehova.” Minsan ngani si Jehova puwedeng dai gumibo nin milagro para sa saiyang mga lingkod ngonyan, sia seguradong minatabang sa mga natatakot sa saiya. (2 Pedro 2:9) Ipinaliwanag kan simposium na ini an apat na probisyon gikan ki Jehova sa pagtabang sato sa delikadong mga panahon na ini: (1) Paagi sa saiyang espiritu, tinatawan kita ni Jehova nin kapangyarihan tanganing mahaman an mga gibohon na dai nanggad kaya kan satong sadiring kosog. (2) Paagi sa saiyang Tataramon, sia nagtatao nin sadol asin giya sa sato. (3) Paagi sa pantubos, tinatawan nia kita nin malinig na konsensia. (4) Paagi sa saiyang organisasyon, kabale an mga magurang, tinatawan nia kita nin paggiya asin proteksion. (Lucas 11:13; Efeso 1:7; 2 Timoteo 3:16; Hebreo 13:17) Paagi sa lubos na pag-aprobetsar sa mga probisyon na ini, makakatagal kita asin sa siring makakamtan an pag-oyon ni Jehova.
An ultimong pahayag sa Sabado nin hapon may titulong “Harani Na an Makangingirhat na Aldaw ni Jehova,” basado sa hula ni Malaquias. Nagkaigwa nin makangingirhat na mga aldaw sa nakaaging kasaysayan, arog kan hokoman an Jerusalem kan 70 C.E. Pero an pinakamakangingirhat na aldaw sa bilog na eksperyensia nin tawo iyo an maabot na aldaw ni Jehova kun an ‘pamalos darahon na sa mga dai nakamimidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.’ (2 Tesalonica 1:6-8) Gurano kaharani iyan? An espiker nagsabi: “An katapusan harani na! Aram ni Jehova an aldaw asin oras na iyan. Dai nia liliwaton an saiyang iskedyul. Hinahagad sa sato na mapasensiang magtagal.”
Depisil maniwala na nakalihis na an duwang aldaw. Magigin siring daw sa ano an ultimong aldaw?
“Matakot sa Dios Asin Pamurawayon Sia”
An tema kan ikatolong aldaw basado sa Kapahayagan 14:7. Durante kan programa sa aga, itanampok nin sarong serye nin mga pahayag an nagkapirang katokdoan sa doktrina na ipinapalaen an mga Saksi ni Jehova sa gabos na iba pang relihiyosong organisasyon.
Sa pahayag na “Magkakaigwa nin Pagkabuhay Liwat an mga Matanos,” an espiker nagpalataw nin sarong interesanteng hapot: “Durante kan sangribong taon na Aldaw nin Paghokom na iyan, noarin bubuhayon liwat an mga nagadan na maimbod sa ultimong mga taon na ini kan palakaw nin mga bagay ni Satanas?” An simbag? “An Biblia daing sinasabi,” an paliwanag kan espiker. “Minsan siring, bako daw makatanosan na an mga nagagadan sa satong aldaw amay na bubuhayon liwat tanganing makikabtang sa dakulang kadaklan nin mga nakaligtas sa Armagedon sa dakulang gibohon nin pagtotokdo na mangyayari sa bilog na Aldaw nin Paghokom? Iyo nanggad!” Magkakaigwa daw nin mga makaliligtas? Seguradong igwa nanggad. An mga katokdoan asin halimbawa sa Biblia na naggagarantiya sato kaini malinaw na ipinaliwanag sa suminunod na pahayag, “Ilinigtas na Buhay sa Dakulang Kahorasaan.”
Haloy nang nasabotan kan mga Saksi ni Jehova na an Biblia nagtotokdo nin duwang kaaabtan—buhay na daing katapusan sa sarong paraisong daga para sa dai mabilang na minilyon asin inmortal na buhay sa langit para sa sarong limitadong bilang na maghahade kaiba ni Cristo sa saiyang Kahadean. An langitnon na paglaom ipinaliwanag sa pahayag na “Dai Kamo Matakot, Sadangoton na Aripompon.” (Lucas 12:32) Huli kan presenteng situwasyon sa kinaban, an sadangoton na aripompon dapat na magin daing takot; an kada saro sainda dapat na magtagal sagkod sa katapusan. (Lucas 21:19) “An saindang kadaihan nin takot,” an sabi kan espiker, “nagseserbing pampakosog sa mga kabilang sa dakulang kadaklan. Sinda maninigo man na magpatalubo nin daing takot na kaisipan mantang inaantisipar ninda an kaligtasan durante kan pinakamaribok na panahon na naaraman kan kinaban kasuarin pa man.”
Sa pagtatapos kan programa sa aga, an mga nagdadangog maogmang nagheling sa drama sa Biblia na An mga Pagpili na Napapaatubang sa Saindo. Kan kaaldawan ni Josue, asin siring man kan propetang si Elias, an mga Israelita kinaipuhan na magdesisyon. Kaipuhan na pumili. Si Elias nagsabi: “Sagkod noarin kamo mag-uurong-sulong sa duwang magkalaen na opinyon? Kun si Jehova an tunay na Dios, sumunod kamo sa saiya; alagad kun si Baal, sumunod kamo sa saiya.” (1 Hade 18:21) Ngonyan man, an katawohan kaipuhan na magdesisyon. Bako ining panahon na mag-urong-sulong sa duwang magkalaen na opinyon. Ano an tamang pilion? Kapareho kan pinili ni Josue kan suanoy. Sia nagsabi: “Kun para sa sako asin sa sakong pamilya, kami maglilingkod ki Jehova.”—Josue 24:15.
Garo baga bigla na sana, Domingo na nin hapon asin oras na para sa diskurso sa publiko na may titulong “Kun Taano ta Dapat na Matakot sa Tunay na Dios Ngonyan.” Sa Kapahayagan 14:6, 7, an bilog na katawohan sinasadol: “Matakot sa Dios asin pamurawayon sia.” Taano ta apuradong matakot sa Dios ngonyan? Huli ta, siring kan padagos na sinasabi kan teksto, “nag-abot na an oras kan saiyang paghokom.” Paagi sa saiyang Aki, na ngonyan natutukaw na sa trono bilang Hade kan langitnon na Kahadean nin Dios, tatapuson ni Jehova an presenteng maati, rebeldeng palakaw nin mga bagay. Ipinaliwanag kan espiker na ini an solamenteng paagi na paginhawahon an mga natatakot sa Dios saka iligtas patin papagdanayon an satong erokan na daga. Mantang ini na an huring mga aldaw kan palakaw na ini nin mga bagay, apuradong matakot kita sa tunay na Dios ngonyan!
Kasunod kan sumaryo kan leksion sa Torrengbantayan para sa semanang iyan, an pangultimong espiker tuminindog sa plataporma. Bilang resulta kan programa sa kombension, an diosnon na takot nagkaigwa nin orog na kahulogan para sa mga kombensionista, an paliwanag nia. Idinoon nia an dakol na pakinabang na nakakamtan kan mga natatakot sa Dios. Iinanunsiar kan espiker an pagluwas kan bagong video—an United by Divine Teaching. Itinatampok kaiyan an pambihirang mga kabtang kan “Banal na Pagtotokdo” na Internasyonal na mga Kombension na ginibo kan 1993-94. Mantang patapos na an pahayag, an dakol naghorophorop, ‘Ano daw an malalaoman niato sa sunod na taon?’ Tolong aldaw na pandistritong mga kombension sa dakol na lugar.
Bilang konklusyon, sinambit kan espiker an Malaquias 3:16, na nagsasabi: “Sa panahon na iyan idtong mga nagkakatarakot ki Jehova nag-oorolay-olay, an lambang saro sa saiyang kaibanan, asin si Jehova padagos na nagdangog asin naghinanyog. Asin an sarong libro nin girumdoman pinonan na isurat sa atubangan nia para sa mga natatakot ki Jehova asin para sa mga naghohorophorop sa saiyang ngaran.” An mga kombensionista nagharale na may malinaw na determinasyon na maghorophorop sa ngaran ni Jehova asin maglingkod sa saiya na may diosnon na takot.
[Retrato sa pahina 24]
An mga kandidato sa bautismo kaipuhan na padagos na magpaheling nin diosnon na takot
[Retrato sa pahina 25]
An dramang “An mga Pagpili na Napapaatubang sa Saindo” nagdoon sa mga naghihinanyog kan pangangaipong magin desidido manongod sa paglilingkod ki Jehova
[Retrato sa pahina 26]
An mga kombensionista naogmang akoon an bagong brochure na “Kun Magadan an Sarong Namomotan”