Pakanood na Makanompong nin Kaogmahan sa Pagkatakot ki Jehova
“Madia kamo, mga aki, hinanyoga ako nindo; an pagkatakot ki Jehova iyo an itotokdo ko sa saindo.”—SALMO 34:11.
1. Paano hahaleon kan Kahadean nin Dios an takot, alagad gabos daw na takot an boot sabihon kaiyan?
AN MGA tawo sa gabos na lugar nagmamawot nin katalingkasan sa takot—pagkatakot sa krimen asin kadahasan, pagkatakot sa kadaihan nin trabaho, pagkatakot sa grabeng helang. Kanigoan kamamuraway na aldaw kun an katalingkasan na iyan magin nang totoo sa pagsakop kan Kahadean nin Dios! (Isaias 33:24; 65:21-23; Miqueas 4:4) Minsan siring, bakong gabos na takot mawawara na sa panahon na iyan, ni maninigo niatong mawoton na haleon an gabos na takot sa satong buhay ngonyan. Igwa nin takot na marahay asin takot na maraot.
2. (a) Anong klase nin takot an maraot, asin anong klase an kawiliwili? (b) Ano an diosnon na takot, asin paano iyan ipinaririsa kan sitadong mga teksto?
2 An takot puwedeng magin hilo sa isip, na pinaparalisar an abilidad nin saro na mangatanosan. Puwedeng paluyahon kaiyan an kapusoan asin raoton an paglaom. An siring na takot puwedeng maeksperyensiahan nin saro na hinuhuma sa pisikal nin sarong kaiwal. (Jeremias 51:30) Iyan puwedeng maeksperyensiahan nin saro na labi-labi an pagpahalaga sa pagkaigwa kan pag-oyon nin nagkapirang maimpluwensiang tawo. (Talinhaga 29:25) Pero igwa man nin takot na marahay, an klase na ilinilikay kita sa daing ingat na paggibo nin ano man na bagay, sa pagdanyar sa satong sadiri. Labi pa dian an kalabot sa diosnon na takot. Iyan paghanga ki Jehova, hararom na paggalang saiya, kaiba an marahay na pagkahandal na mapamondo sia. (Salmo 89:7) An pagkatakot na ini na makapamondo sa Dios bunga nin pagpahalaga sa saiyang mamomoton na kabootan asin karahayan. (Salmo 5:7; Oseas 3:5) Kabale man dian an pakaaram na si Jehova an Supremong Hokom asin an Makakamhan sa gabos, na igwa kan kapangyarihan na magtao nin padusa, pati kagadanan, sa mga nagsasayumang kumuyog sa saiya.—Roma 14:10-12.
3. Paano an pagkatakot ki Jehova napapalaen sa pagkatakot na konektado sa nagkapirang paganong dios?
3 An diosnon na takot marahay, bakong makangingiri. Minomotibar kaiyan an saro na magin marigon sa kun ano an tama, bakong makikompromiso paagi sa paggibo nin sala. Bako iyan arog kan takot na konektado sa suanoy na dios kan mga Griego na si Fobos, na sinasabing maraot na dios na makatatakot na marhay. Asin bako iyan arog kan takot na konektado sa diosa kan mga Hindu na si Kali, na kun beses ilinaladawan na paha sa dugo, na naggagamit nin mga bangkay, halas, asin bungo bilang mga samno. An diosnon na takot nakakaakit; iyan dai nakakaparayo. Iyan konektado sa pagkamoot asin pagpahalaga. Kaya, an diosnon na takot idinadayupot kita ki Jehova.—Deuteronomio 10:12, 13; Salmo 2:11.
Kun Taano an Iba ta Igwa Kaiyan Asin an Iba Mayo
4. Siring sa ipinaheling ni apostol Pablo, ano na an nagin kamugtakan kan katawohan, asin ano an dahelan kaini?
4 An katawohan sa pankagabsan dai minomotibar kan kuwalidad nin diosnon na takot. Sa Roma 3:9-18, ilinaladawan ni apostol Pablo kun gurano na karayo kan pagkaholog kan mga tawo hale sa orihinal na pagkasangkap. Pakasabi na an gabos nasa irarom nin kasalan, si Pablo nagkotar sa Salmo, na nagsasabi: “Mayo nin matanos na tawo, mayo minsan saro.” (Helingon an Salmo 14:1.) Dangan nagtao sia nin mga detalye paagi sa pagsambit sa mga bagay na arog baga kan kapabayaan nin tawo sa paghanap sa Dios, an saindang kadaihan nin kabootan, an saindang mapandayang pananaram, pagmuda, asin pagpabolos nin dugo. Eksakto nanggad na ilinaladawan kaiyan an kinaban ngonyan! An mayoriya sa mga tawo mayo nin interes sa Dios asin sa saiyang mga katuyohan. An ano man na pagpaheling nin kabootan parateng gayo na para sana sa mga okasyon na may makukuang pakinabang dian. Lakop an pagputik asin malaswang pananaram. An pagpabolos nin dugo itinatampok bako sanang sa mga bareta kundi pati sa aling-alingan. Ano an dahelan kan siring na situwasyon? Totoo na kita gabos gikan kan parakasalang si Adan, alagad kun ginigibo nin mga tawo bilang saindang pamumuhay an mga bagay na ilinadawan ni apostol Pablo, sarong bagay na labi pa dian an napapalabot. Ipinapaliwanag kan bersikulo 18 kun ano iyan, na an sabi: “Mayo nin pagkatakot sa Dios sa atubangan kan saindang mga mata.”—Helingon an Salmo 36:1.
5. Taano an ibang tawo ta igwa nin diosnon na takot, mantang an iba mayo?
5 Minsan siring, taano an ibang tawo ta igwa nin diosnon na takot, mantang an iba mayo? Sa simpleng pagtaram, huli ta an ibang tawo pinatatalubo iyan, mantang an iba dai. Mayo sato na namundag na igwa kaiyan, alagad kita gabos igwa nin kakayahan na pataluboon iyan. An diosnon na takot sarong bagay na dapat niatong manodan. Dangan, tanganing iyan magin makosog na puwersa na nagmomotibar sa satong buhay, kaipuhan niatong pataluboon iyan.
Sarong Nakakaakit na Imbitasyon
6. Siisay an nagpapaabot sato kan imbitasyon na nasusurat sa Salmo 34:11, asin paano ipinaheheling kan tekstong ini na an diosnon na takot dapat na manodan?
6 An sarong nakakaakit na imbitasyon na manodan an pagkatakot ki Jehova ipinaaabot sato sa Salmo 34. Salmo ini ni David. Asin siisay an ipinanganino ni David? Mayong iba kundi an Kagurangnan na si Jesu-Cristo. An sarong hula na espisipikong iinaplikar ni apostol Juan ki Jesus nasusurat sa bersikulo 20 kan salmong ini. (Juan 19:36) Sa satong aldaw, si Jesus an saro na nagpapaabot nin imbitasyon na arog kan nasa bersikulo 11: “Madia kamo, mga aki, hinanyoga ako nindo; an pagkatakot ki Jehova iyo an itotokdo ko sa saindo.” Malinaw na ipinaheheling kaini na an diosnon na takot sarong bagay na puwedeng manodan, asin si Jesus pambihira kakuwalipikadong magtokdo sato. Taano man?
7. Taano si Jesus ta iyo an nangongorog na saro na sa saiya makakanood nin diosnon na takot?
7 Aram ni Jesu-Cristo an kahalagahan kan diosnon na takot. An Hebreo 5:7 nagsasabi mapadapit sa saiya: “Sa mga aldaw kan saiyang laman si Cristo nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot.” An diosnon na takot na iyan sarong kuwalidad na ipinaheling ni Jesu-Cristo dawa bago pa sia napaatubang sa kagadanan sa hariging pasakitan. Girumdomon, sa Talinhaga kapitulo 8, an Aki nin Dios ilinaladawan bilang personipikasyon nin kadonongan. Asin sa Talinhaga 9:10, kita sinasabihan: “An pagkatakot ki Jehova iyo an kapinonan nin kadonongan.” Kaya an diosnon na takot na ini sarong pundamental na kabtang kan personalidad kan Aki nin Dios haloy pa bago sia nagdigdi sa daga.
8. Sa Isaias 11:2, 3, ano an satong nanonodan manongod sa pagkatakot ki Jehova?
8 Dugang pa, mapadapit ki Jesus bilang Mesiyanikong Hade, an Isaias 11:2, 3 nagsasabi: “Sa saiya matogdon an espiritu ni Jehova, an espiritu nin kadonongan asin nin pakasabot, an espiritu nin hatol asin nin kakosogan, an espiritu nin kaaraman asin nin takot ki Jehova; asin maoogma sia sa pagkatakot ki Jehova.” Abaang gayon na pagkataram kaiyan! An pagkatakot ki Jehova bakong nakararaot. Iyan positibo asin nakararahay. Iyan sarong kuwalidad na makalalakop sa bilog na rona na pamamahalaan ni Cristo bilang Hade. Sia naghahade na ngonyan, asin sa gabos na tinitipon bilang saiyang mga sakop, sia nagtatao nin pagtotokdo sa pagkatakot ki Jehova. Paano?
9. Paano itinotokdo sato ni Jesu-Cristo an pagkatakot ki Jehova, asin ano an boot niang manodan niato manongod kaiyan?
9 Paagi sa satong mga pagtiripon sa kongregasyon, mga asamblea, asin kombension, si Jesus, bilang nombradong Payo kan kongregasyon asin bilang Mesiyanikong Hade, tinatabangan kita na malinaw na masabotan kun ano an diosnon na takot asin kun taano iyan ta kapakipakinabang na marhay. Kaya hinihingoa nia na pararomon an satong pagpahalaga dian tanganing makanood kita na makanompong nin kaogmahan sa pagkatakot ki Jehova arog nia.
Maghihingoa daw Kamo?
10. Kun nag-aatender sa Kristianong mga pagtiripon, ano an dapat niatong gibohon kun boot niatong masabotan an pagkatakot ki Jehova?
10 Siyempre, an pagbasa sana niato kan Biblia o pag-atender sa mga pagtiripon sa Kingdom Hall dai magarantiya na kita magkakaigwa nin diosnon na takot. Mangnoha kun ano an kaipuhan niatong gibohon kun talagang boot niatong masabotan an pagkatakot ki Jehova. An Talinhaga 2:1-5 nagsasabi: “Aki ko, kun aakoon mo an sakong mga tataramon asin pahahalagahan mo an sakong mga pagboot, na magtao nin atension sa kadonongan sa saimong talinga, tanganing ikakiling mo an saimong puso sa pakamansay; siring man, kun mag-apod ka sa pakasabot asin magkurahaw ka sa pagmansay, kun padagos mong hanapon iyan siring baga sa pirak, asin siring baga sa natatagong kayamanan padagos mong hanapon iyan, sa siring masasabotan mo an pagkatakot ki Jehova, asin makukua mo an mismong kaaraman dapit sa Dios.” Kaya kun nag-aatender sa mga pagtiripon, kaipuhan kitang magtao nin atension sa sinasabi, magmaigot na magkonsentrar asin magirumdoman an mahalagang mga ideya, odok na horophoropon kun paanong an satong saboot manongod ki Jehova maninigong makaimpluwensia sa satong kaisipan dapit sa itinataong hatol—iyo, buksan an satong puso. Dangan masasabotan ta an pagkatakot ki Jehova.
11. Tanganing makapatalubo nin diosnon na takot, ano an maninigo niatong odok asin parateng gibohon?
11 An Salmo 86:11 nagdadagka nin atension sa saro pang mahalagang bagay, an manongod sa pamibi. “Tokdoi ako, O Jehova, dapit sa saimong dalan. Ako maglalakaw sa saimong katotoohan,” an pamibi kan salmista. “Gibohang saro an sakong puso na matakot sa saimong ngaran.” Inoyonan ni Jehova an pamibing iyan, huli ta ipinasurat nia iyan sa Biblia. Tanganing makapatalubo nin diosnon na takot, kaipuhan man kitang mamibi ki Jehova para sa saiyang tabang, asin kita makikinabang paagi sa odok asin parateng pamimibi.—Lucas 18:1-8.
Kalabot an Saindong Puso
12. Taano an puso ta dapat tawan nin espesyal na atension, asin ano an kabale dian?
12 May saro pang bagay na maninigo niatong mangnohon sa Salmo 86:11. An salmista dai sana naghahagad nin sa isip sanang pakasabot dapit sa pagkatakot sa Dios. Nasasambitan nia an saiyang puso. Kalabot sa pagpatalubo nin diosnon na takot an piguratibong puso, na nagkakaipo nin espesyal na atension huli ta iyan an panlaog na persona na nahahayag sa gabos niatong aktibidad sa buhay asin kabale an satong kaisipan, an satong ugale, an satong mga kamawotan, an satong mga motibasyon, an satong mga pasohan.
13. (a) Ano an puwedeng magparisa na nababanga an puso nin saro? (b) Mantang nagpapatalubo kita nin diosnon na takot, anong pasohan an maninigo niatong pagmaigotan?
13 Pinatatanidan kita kan Biblia na an puso nin saro puwedeng mabanga. Iyan puwedeng magin madaya. (Salmo 12:2; Jeremias 17:9) Puwedeng magmotibar iyan sato na makikabtang sa kapakipakinabang na mga aktibidad—pagduman sa mga pagtiripon sa kongregasyon asin sa ministeryo sa langtad—alagad puwede man iyan na maogma sa nagkapirang kabtang kan pamumuhay sa kinaban. Puwedeng olangon kita kaini sa pagigin tunay na bilog na kalag sa pagpalakop kan intereses kan Kahadean. Dangan puwedeng hingoahon na kombensiron kita kan madayang puso na, total, an ginigibo ta arog kan ginigibo kan dakol na iba pa. O tibaad sa eskuwelahan o sa satong sekular na trabaho, an puso puwedeng maimpluwensiahan kan pagkatakot sa tawo. Bilang resulta, sa siring na mga kamugtakan tibaad mag-alangan kitang ipamidbid an satong sadiri na mga Saksi ni Jehova asin tibaad gumibo pa ngani nin mga bagay na bakong angay para sa mga Kristiano. Alagad, pakatapos kaiyan pinupurisaw kita kan satong konsensia. Bako iyan an gusto tang magin klase nin pagkatawo. Kaya, kaiba kan salmista na namimibi kita ki Jehova: “Gibohang saro an sakong puso na matakot sa saimong ngaran.” Boot niato na an bilog na panlaog na persona, na nahahayag sa gabos niatong aktibidad sa buhay, magtao nin ebidensia na kita ‘natatakot sa tunay na Dios asin nag-ootob sa saiyang mga pagboot.’—Eclesiastes 12:13.
14, 15. (a) Kan ihinuhula an pagbabalik kan Israel hale sa pagkabihag sa Babilonya, ano an ipinanuga ni Jehova na itatao sa saiyang banwaan? (b) Ano an ginibo ni Jehova sa katuyohan na itanom an pagkatakot sa Dios sa puso kan saiyang banwaan? (c) Taano an Israel ta suminuhay sa mga dalan ni Jehova?
14 Si Jehova nanuga na itatao nia sa saiyang banwaan an siring na matatakton sa Dios na puso. Saiyang ihinula an pagbabalik kan Israel asin nagsabi, siring kan satong mababasa sa Jeremias 32:37-39: “Ibabalik ko sinda sa lugar na ini asin papag-eerokon ko sinda sa katiwasayan. Asin sinda magigin nanggad sakuyang banwaan, asin ako mismo an magigin saindang Dios. Asin tatawan ko sinda nin sarong puso asin sarong dalan tanganing perming matakot sako, sa ikararahay ninda asin kan saindang mga aki kasunod ninda.” Sa bersikulo 40, orog pang pinasarig an panuga nin Dios: “An pagkatakot sa sako ibubugtak ko sa saindang puso tanganing dai sumuhay sa sako.” Kan 537 B.C.E., talagang ibinalik sinda ni Jehova sa Jerusalem siring sa saiyang ipinanuga. Alagad kumusta an iba pang kabtang kan panugang iyan—na tatawan nia sinda nin ‘sarong puso tanganing perming matakot saiya’? Taano an suanoy na nasyon nin Israel ta suminuhay ki Jehova pakatapos na ibalik nia sinda hale sa Babilonya, kaya nalaglag an saindang templo kan 70 C.E., na nungka nang ikatotogdok liwat?
15 Bako ining huli sa ano man na pagkukulang ni Jehova. Tunay nanggad na si Jehova naggibo nin mga paagi na ibugtak an pagkatakot sa Dios sa puso kan saiyang banwaan. Paagi sa pagkaherak na ipinaheling nia sa pagligtas sa sainda hale sa Babilonya asin pagbalik sa sainda sa saindang sadiring daga, tinawan nia sinda nin igong dahelan na mansayon sia na may hararom na paggalang. An Dios dinugangan iyan gabos nin puwersa paagi sa mga pagirumdom, hatol, asin pagsagwe paagi sa mga propeta na sinda Haggeo, Zacarias, asin Malaquias; paagi ki Esdras, na isinugo sa sainda bilang paratokdo; paagi ki Gobernador Nehemias; asin paagi sa sadiring Aki mismo nin Dios. May beses na naghimate an banwaan. Ginibo ninda iyan kan itogdok ninda liwat an templo ni Jehova sa pagsadol ni Haggeo asin Zacarias asin kan isobol ninda an mga agom na babaeng tagaibang banwaan kan kaaldawan ni Esdras. (Esdras 5:1, 2; 10:1-4) Pero mas parate na dai sinda nagkuyog. Pabarubago sinda manongod sa pagtao nin atension; dai sinda nagpadagos sa paghimate sa hatol; dai ninda pinapagdanay na bukas an saindang puso. An mga Israelita dai nagpatalubo nin diosnon na takot, asin bilang resulta, bako iyan makosog na nagmomotibar na puwersa sa saindang buhay.—Malaquias 1:6; Mateo 15:7, 8.
16. Sa kiisay na puso itinanom ni Jehova an diosnon na takot?
16 Minsan siring, an panuga ni Jehova na magbugtak nin diosnon na takot sa puso kan saiyang banwaan dai nasudya. Naggibo sia nin bagong tipan sa espirituwal na Israel, an mga Kristiano na inalokan nia nin langitnon na paglaom. (Jeremias 31:33; Galacia 6:16) Kan 1919, ibinalik sinda nin Dios hale sa pagkabihag sa Dakulang Babilonya, an pankinaban na imperyo nin falsong relihiyon. Marigon niang itinanom sa saindang puso an pagkatakot sa saiya. Nagdara ini nin mayaman na mga pakinabang sa sainda asin sa “dakulang kadaklan,” na igwang paglaom na buhay bilang daganon na mga sakop kan Kahadean. (Jeremias 32:39; Kapahayagan 7:9) An pagkatakot ki Jehova namugtak man sa saindang puso.
Kun Paano an Diosnon na Takot Natatanom sa Satong Puso
17. Paano ibinubugtak ni Jehova an diosnon na takot sa satong puso?
17 Paano itinatanom ni Jehova an diosnon na takot na ini sa satong puso? Paagi sa pagpunsionar kan saiyang espiritu. Asin ano an nasa sato na produkto kan banal na espiritu? An Biblia, an ipinasabong na Tataramon nin Dios. (2 Timoteo 3:16, 17) Paagi sa saiyang mga ginibo kan nakaagi, paagi sa saiyang mga ginigibo sa saiyang mga lingkod ngonyan bilang kaotoban kan saiyang makahulang Tataramon, asin paagi sa mga hula dapit sa mga bagay na madatong, si Jehova nagtatao nin marigon na basihan na kita gabos dapat na magpatalubo nin diosnon na takot.—Josue 24:2-15; Hebreo 10:30, 31.
18, 19. Paano an mga kombension, asamblea, asin pagtiripon sa kongregasyon tinatabangan kita na magkamit nin diosnon na takot?
18 Mahalagang mangnohon na, siring kan ibinareta sa Deuteronomio 4:10, si Jehova nagsabi ki Moises: “Tiriponon mo sako an banwaan tanganing ikapadangog ko sainda an sakong mga tataramon, tanganing sinda makanood na matakot sako sa gabos na aldaw na sinda nabubuhay sa daga asin tanganing matokdoan ninda an saindang mga aki.” Siring man ngonyan, si Jehova naggibo nin abundang probisyon tanganing tabangan an saiyang banwaan na makanood na matakot sa saiya. Sa mga kombension, asamblea, asin pagtiripon sa kongregasyon, isinasaysay niato an ebidensia kan mamomoton na kabootan ni Jehova asin kan saiyang karahayan. Iyan an ginigibo niato sa pag-adal sa librong The Greatest Man Who Ever Lived. Paano an pag-adal na iyan nakakaapektar sa saindo asin sa saindong kaisipan manongod ki Jehova? Mantang naheheling nindo an manlaenlaen na kabtang kan pambihirang personalidad kan satong langitnon na Ama na nababanaag sa saiyang Aki, dai daw kaini pinakokosog an saindong pagmawot na nungkang pamondoon an Dios?—Colosas 1:15.
19 Sa satong mga pagtiripon, pinag-aadalan man niato an mga tala kan pagligtas ni Jehova sa saiyang banwaan kan nakaaging mga panahon. (2 Samuel 7:23) Mantang pinag-aadalan ta an libro sa Biblia na Kapahayagan sa tabang kan librong Revelation—Its Grand Climax At Hand!, nanonodan ta an makahulang mga bisyon na naotob na sa ika-20 siglong ini asin an makangingirhat na mga pangyayari na madatong. Mapadapit sa gabos na gibong iyan nin Dios, an Salmo 66:5 nagsasabi: “Madia kamo, banwaan, asin helinga nindo an mga gibo nin Dios. Makangingirhat an saiyang mga gibo sa mga aki nin mga tawo.” Iyo, minamansay sa tamang paagi, an mga gibong ini nin Dios nagtatanom sa satong puso nin pagkatakot ki Jehova, nin hararom na paggalang. Kaya masasabotan ta kun paano inootob ni Jehova Dios an saiyang panuga: “An pagkatakot sa sako ibubugtak ko sa saindang puso tanganing dai sumuhay sa sako.”—Jeremias 32:40.
20. Tanganing hararom na makatanom sa satong puso an diosnon na takot, ano an hinahagad sa sato?
20 Alagad, malinaw na an diosnon na takot dai mamumugtak sa satong puso na mayo kan satong paghihingoa. An resulta bakong automatiko. Ginigibo ni Jehova an saiyang kabtang. Dapat niatong gibohon an satong kabtang paagi sa pagpatalubo nin diosnon na takot. (Deuteronomio 5:29) An Israel sa laman dai nakagibo kaiyan. Alagad huli sa pagtitiwala ki Jehova, an espirituwal na mga Israelita asin an saindang kairiba nakakaeksperyensia na kan dakol na pakinabang na nakakamtan kan mga matatakton sa Dios. Pag-oolayan niato an nagkapira sa mga pakinabang na ini sa minasunod na artikulo.
Ano an Saindong Simbag?
◻ Ano an diosnon na takot?
◻ Paano kita tinotokdoan na makanompong nin kaogmahan sa pagkatakot ki Jehova?
◻ Tanganing magkaigwa nin diosnon na takot, anong paghihingoa an hinahagad sa sato?
◻ Taano an pagkamit nin diosnon na takot ta kalabot an gabos na kabtang kan satong piguratibong puso?
[Mga retrato sa pahina 12, 13]
An mahigos na pag-adal kinakaipuhan tanganing masabotan an pagkatakot ki Jehova