Matakot ki Jehova Asin Pamurawayon an Saiyang Banal na Ngaran
“Siisay nanggad an dai matatakot saimo, Jehova, asin magpapamuraway kan saimong ngaran, huli ta ika sana an maimbod?”—KAPAHAYAGAN 15:4.
1, 2. (a) Paano binuksan ni Jehova an langitnon na mga gaha durante kan 1991? (b) Anong eksperyensia sa buhay an nagpahiro sa maimbod na misyonero na humatol na: “Matakot ki Jehova”? (Helingon man an 1991 Yearbook, pahina 187-9.)
SI Jehova ‘nagbukas kan mga gaha kan kalangitan asin nag-ula nin mga bendisyon sagkod na mayo na nin kulang.’ An mga tataramon na iyan puwedeng iaplikar nin paorootro sa mga Saksi ni Jehova kasuarin pa sana. (Malaquias 3:10) Halimbawa, nagsopay an entusiasmo kan nagsosongkong mga Saksi asin kan lokal na mga kombensionista sa Kristianong pag-iriba-iba sa espesyal na mga kombension na ginibo sa bilog na kinaban—magpoon sa São Paulo (Agosto 17-19, 1990) asin Buenos Aires sa Amerika del Sur sagkod sa Manila, Taipei, asin Bangkok sa Oriente asin sa Budapest, Prague, asin Zagreb (Agosto 16-18, 1991) sa Sirangan nin Europa.
2 Kanigoan nanggad na kaogmahan idto para sa mga delegado hale sa ibang kadagaan na manompongan an haloy nang panahon na maimbod na mga Saksi sa mga lugar na idto! Halimbawa, sa Bangkok, si Frank Dewar—sa sarong panahon an solamenteng parahayag kan Kahadean sa Thailand—nagsaysay kan saiyang 58 taon sa paglilingkod bilang misyonero. An saiyang gibohon magpoon sa mga isla kan Pasipiko sagkod sa Timog-Sirangan nin Asia, asin maski sa Tsina. Inatubang nia an mga peligro sa pagkalunod, mabangis na mga hayop sa kadlagan, helang, asin an maringis na rehimen kan Hapones na mga opisyal sa guerra. Kan hapoton kun anong hatol an ikatatao nia sa mga kombensionista, an saiyang simpleng simbag: “Matakot ki Jehova!”
3. Taano ta maninigo niatong ipaheling an diosnon na pagkatakot?
3 “Matakot ki Jehova!” Mahalaga nanggad na kita gabos magkultibar kan kapakipakinabang na pagkatakot na iyan! “An pagkatakot ki Jehova iyo an kapinonan nin kadonongan.” (Salmo 111:10) An pagkatakot na ini bakong rima-rimang pagkatakot ki Jehova. Imbes, iyan an hararom na paggalang sa saiyang pambihirang kamahalan asin diosnon na mga kuwalidad, na basado sa pakasabot na satong inako paagi sa pag-adal kan Tataramon nin Dios. Sa Kapahayagan 15:3, 4, an awit ni Moises asin kan Kordero nagpahayag: “Dakula asin makangangalas an saimong mga gibo, Jehova Dios, an Makakamhan sa gabos. Matanos asin tunay an saimong mga dalan, Hade na daing katapusan. Siisay nanggad an dai matatakot saimo, Jehova, asin magpapamuraway kan saimong ngaran, huli ta ika sana an maimbod?” Sa kaimbodan sa saiyang mga parasamba, si Jehova may ‘sarong libro nin girumdoman . . . na isinurat sa atubang nia para sa mga natatakot ki Jehova asin para sa mga naghohorophorop sa saiyang ngaran.” Babalosan sinda nin buhay na daing katapusan.—Malaquias 3:16; Kapahayagan 20:12, 15.
An Diosnon na Pagkatakot Nanggagana
4. Anong suanoy na pagliligtas an maninigong magpakosog sato na matakot ki Jehova?
4 Kan an Israel nagmartsa paluwas sa Ehipto ni Faraon, malinaw na ipinaheling ni Moises na sia natatakot sana ki Jehova. Dai nahaloy, an mga Israelitas nalaom sa pag-oltanan kan Dagat na Pula asin kan mapuwersang makinarya sa militar kan Ehipto. Ano an magigibo ninda? “Sinabi ni Moises sa banwaan: ‘Dai kamo matakot. Dai kamo maghiro, asin maheheling nindo an pagliligtas ni Jehova, na gigibohon nia para saindo ngonyan. Huli ta an mga Ehipcio na naheheling nindo ngonyan dai na nindo maheheling giraray, dai, dai na nanggad giraray. Si Jehova mismo an makikilaban para sa saindo, asin kamo mismo masilensio.’” Sa milagrosong paagi, binanga ni Jehova an katubigan. An mga Israelitas nagmartsa sa tahaw kan dagat sa dagang mamara. Dangan an katubigan nagsalikop giraray. An hukbo ni Faraon nalaglag. Ilinigtas ni Jehova an natatakot sa Dios na nasyon na iyan, mantang kadungan kaiyan ginibo an paghokom sa dai nagtataong onra sa Dios na Ehipto. Siring man ngonyan, ipaheheling man nia an saiyang kaimbodan sa pagliligtas sa natatakot sa Dios na mga Saksi sa kinaban ni Satanas.—Exodo 14:13, 14; Roma 15:4.
5, 6. Anong mga pangyayari kan panahon ni Josue an nagpapaheling na maninigo niatong katakotan si Jehova imbes na an mga tawo?
5 Pakatapos kan Exodo sa Ehipto, nagpadara si Moises nin 12 espiya sa Dagang Panuga. An sampulo natakot kan maheling an arog sa higanteng mga nag-eerok asin prinobaran na paluyahon an boot kan Israel sa paglaog sa daga. Alagad an duwa pa, si Josue asin si Caleb nagbareta: “An daga marahayrahay nanggad. Kun si Jehova nawili sa satuya, kun siring sierto na ilalaog nia kita sa dagang ini asin itatao iyan sa satuya, daga na binubulusan nin gatas asin tangguli. Dai sana kamo magtumang ki Jehova; asin kamo, dai kamo matakot sa mga tawo kan daga, huli ta tinapay ta sinda. Binayaan na sinda kan saindang pailihan, asin si Jehova nasa sato. Dai kamo matakot sa sainda.”—Bilang 14:7-9.
6 Alagad, an mga Israelitang idto naholog sa pagkatakot sa tawo. Bilang resulta, dai nanggad sinda nakaabot sa dagang panuga. Alagad si Josue asin si Caleb, kaiba an bagong kapag-arakian kan mga Israelitas, nagkapribilehiyong makalaog sa piniling dagang iyan asin kultibaron an mga ubasan asin olibo kaiyan. Sa saiyang pahayag nin pamamaaram sa nagkatiripon na banwaan nin Israel, nagtao si Josue kan hatol na ini: “Matakot kamo ki Jehova asin paglingkodan nindo sia nin daing kanawayan asin sa katotoohan.” Asin idinugang ni Josue: “Kun para sa sako asin sa sakong pamilya, kami maglilingkod ki Jehova.” (Josue 24:14, 15) Nakapagpapakosog nanggad na mga tataramon iyan para sa mga payo nin pamilya asin sa gabos pang iba na matakot ki Jehova mantang nag-aandam na kitang lumaog sa matanos na bagong kinaban nin Dios!
7. Paano idinoon ni David an kahalagahan kan pagkatakot sa Dios?
7 An aking pastor na si David nagpaheling man nin arogan na pagkatakot ki Jehova kan inangat nia si Goliath sa ngaran nin Dios. (1 Samuel 17:45, 47) Kan magagadan na sia, ipinahayag ni David: “An espiritu ni Jehova iyo an nagtaram paagi sa sako, asin an saiyang tataramon namugtak sa sakong dila. Sinabi sa sako kan Dios nin Israel, sa sako nagtaram an Gapo nin Israel, ‘Kun an naghahade sa katawohan matanos, na naghahade na may takot sa Dios, kun siring iyan siring sa liwanag kan sarong kaagahan, kun minasubang an aldaw, na mayo nin mga dampog.’” (2 Samuel 23:2-4) An pagkatakot na ini sa Dios dai nag-eeksister sa tahaw kan mga namamahala sa kinaban na ini, asin makaturotriste nanggad an resulta! Kanigoan nanggad na kalaenan kun si Jesus, “an Aki ni David,” an mamahala na sa daga na may pagkatakot ki Jehova!—Mateo 21:9.
Paghirong May Pagkatakot ki Jehova
8. Taano ta nag-oswag an Juda sa irarom ni Josafat, na nagpapaheling nin ano ngonyan?
8 Mga sanggatos na taon pagkagadan ni David, si Josafat nagin hade sa Juda. Uya giraray an hadeng naglingkod na may pagkatakot ki Jehova. Ibinalik nia an teokratikong areglo sa Juda, nagbugtak nin mga hokom sa bilog na kadagaan, asin nagtao sainda kan mga instruksion na ini: “Kamo naghohokom bakong para sa tawo kundi para ki Jehova; asin sia nasa kaibanan nindo sa paghokom. Asin ngonyan mapasaindo logod an pagkatakot ki Jehova. Pagmaan kamo asin gibo kamo, huli ta ki Jehova na satuyang Dios mayo nin karatan o pagpalaenlaen o pag-ako nin suhol. . . . Siring kaini an maninigo nindong gibohon sa pagkatakot ki Jehova na may kaimbodan asin may bilog na puso.” (2 Cronica 19:6-9) Kaya, nag-oswag an Juda sa pagkatakot ki Jehova, kun paanong an banwaan nin Dios nakikinabang sa paglilingkod kan maheherakon na mga paraataman ngonyan.
9, 10. Paano nagin mapanggana si Josafat sa pagkatakot ki Jehova?
9 Alagad, an Juda may mga kaiwal. An mga ini determinadong laglagon an nasyon nin Dios. An pinagsarong puwersa militar kan Amon, Moab, asin Bukid nin Seir nakalakop sa teritoryo kan Juda asin naghuma sa Jerusalem. Iyan mapuwersang hukbo. Si Josafat nagdolok ki Jehova sa pamibi na “an gabos na gikan ki Juda nagtitirindog sa atubang ni Jehova, minsan an saindang saradit na mga aki, an saindang agom na babae asin an saindang mga aking lalaki.” Dangan, bilang simbag sa pamibing iyan, an espiritu ni Jehova nagdatong sa Levitang si Jahaziel, na nagsabi: “Uya an ipinasasabi saindo ni Jehova, ‘Dai kamo matakot o matikbahan huli sa dakulang kadaklan na ini; huli ta bakong saindo an laban, kundi sa Dios. Nuodma lumuwas kamong tumang sa sainda. . . . Dai kamo kaipuhan na makipaglaban sa panahon na ini. Tindog kamo sa saindong puwesto, dai kamo maghiro asin helingon an pagliligtas ni Jehova sa saindo. O Juda asin Jerusalem, dai kamo matakot o makubhan. Nuodma lumuwas kamo tumang sa sainda, asin ta si Jehova maiba sa saindo.’”—2 Cronica 20:5-17.
10 Kan suminunod na aldaw, an mga lalaki sa Juda nagmaratang amay. Mantang makinuyog sindang luminuwas tanganing atubangon an kaiwal, si Josafat nagtindog asin nagsabi: “Dangoga nindo ako, O Juda asin kamong mga nag-eerok sa Jerusalem! Pagtubod kamo ki Jehova na saindong Dios tangani na kamo mabuhay nin halawig. Pagtubod kamo sa saiyang mga propeta asin sa siring magin kamong mapanggana.” Sa pagmartsang nasa enotan kan armadong mga lalaki, an mga parakanta sararong nag-arawit: “Omawa nindo si Jehova, huli ta an saiyang mamomoton na kabootan sagkod sa panahon na daing katapusan.” Ipinahayag ni Jehova an mamomoton na kabootan na iyan kan saiyang ribarawon an mga kaiwal kaya sinda an naggaradanan sa lambang saro. Mantang an mga lalaki nin Juda nag-arabot sa torrengbantayan sa kapatagan, solamenteng an garadan na bangkay kan mga kaiwal an natada.—2 Cronica 20:20-24.
11. Kun manongod sa pagkatakot, paano nalalaen an mga nasyon sa banwaan nin Dios?
11 Kan nadangog kan kataraed na mga nasyon an milagrosong pagliligtas na ini, “an pagkatakot ki Jehova” napasainda. Sa ibong na lado, an nasyon na nagkuyog na may pagkatakot ki Jehova nagkaigwa ngonyan nin “kapahingaloan saen man.” (2 Cronica 20:29, 30) Siring man, kun gibohon na ni Jehova an paghokom sa Armagedon, an mga nasyon magkakaigwang pagkatakot sa Dios asin sa saiyang Parakastigong Aki, si Jesu-Cristo, asin dai sinda makatatagal sa dakulang aldaw kan banal na kaanggotan.—Kapahayagan 6:15-17.
12. Paano binalosan an pagkatakot ki Jehova kan enot na panahon?
12 An kapakipakinabang na pagkatakot ki Jehova nagdadara nin mayaman na mga balos. Si Noe “nagpaheling nin diosnon na pagkatakot asin nagtogdok nin dahong para sa pagligtas kan saiyang harong.” (Hebreo 11:7) Asin kun manongod sa enot na siglong mga Kristiano, irinekord na pakatapos kan panahon nin paglamag, an kongregasyon “luminaog sa panahon nin katoninongan na pinakokosog; asin mantang iyan naglalakaw sa pagkatakot ki Jehova asin sa pagranga kan banal na espiritu padagos iyan na nagdakol”—na siring nanggad kan ginigibo kaiyan sa Sirangan nin Europa ngonyan.—Gibo 9:31.
Kamotan an Marahay, Kaongisan an Maraot
13. Paano sana niato maeeksperyensiahan an bendisyon ni Jehova?
13 Si Jehova lubos na marahay. Kaya, “an pagkatakot ki Jehova nangangahulogan nin pagkaongis sa maraot.” (Talinhaga 8:13) Nasusurat manongod ki Jesus: “Namoot ka sa katanosan, asin naongis ka sa karatan. Kaya an Dios, an saimong Dios, linahidan ka kan lana nin kaogmahan.” (Hebreo 1:9) Kun kita siring ki Jesus, nagmamawot kan bendisyon ni Jehova, maninigo tang kaongisan an karatan, an inmoralidad, an kadahasan, asin an kahanaban kan maabhaw na kinaban ni Satanas. (Ikomparar an Talinhaga 6:16-19.) Kaipuhan tang mamotan an namomotan ni Jehova asin kaongisan an kinaoongisan nia. Kaipuhan kitang matakot na gibohon an ano man na dai makapaoogma ki Jehova. “Sa pagkatakot ki Jehova an saro minarayo sa karatan.”—Talinhaga 16:6.
14. Paano kita tinawan ni Jesus nin padara?
14 Winalatan kita ni Jesus nin padara na maninigo niatong sunodon nin estrikto an saiyang mga lakad. “Kan sia pinag-olog-olog, dai sia nagbalos na mag-olog-olog. Kan sia nagtitios, dai sia nan-uma, kundi padagos na nagdolot kan saiyang sadiri sa naghohokom nin matanos.” (1 Pedro 2:21-23) Sa pagkatakot ki Jehova, puwede man niatong tioson an mga pagtuyaw, pag-olog-olog, paglamag, na ginigibo sato kan kinaban ni Satanas.
15. Taano ta kita maninigong matakot ki Jehova kisa sa mga minagadan nin hawak?
15 Sa Mateo 10:28, sinasadol kita ni Jesus: “Dai kamo matakot duman sa mga minagadan kan hawak alagad dai nakagagadan kan kalag; kundi matakot kamo saiya na nakalalaglag kan kalag asin hawak sa Gehenna.” Maski ngani gadanon kan kaiwal an sarong natatakot ki Jehova, an mga sakit nin kagadanan naagi sana. (Oseas 13:14) Kun buhayon na liwat, an sarong iyan makasasabi: “Kagadanan, haen an saimong kapangganahan? Kagadanan, haen an saimong sogod?”—1 Corinto 15:55.
16. Paano si Jesus nagpaheling nin pagkatakot ki Jehova asin nagpamuraway sa saiya?
16 Si Jesus mismo nagtao nin magayonon na halimbawa para sa gabos na namomoot sa katanosan ni Jehova asin naoongis sa karatan. An saiyang pagkatakot ki Jehova naheheling sa saiyang pangultimong mga tataramon sa saiyang mga disipulo, siring kan manonompongan sa Juan 16:33: “Isinabi ko an mga bagay na ini sa saindo tanganing paagi sa sako magkaigwa kamo nin katoninongan. Sa kinaban magkakaigwa kamo nin kasakitan, alagad magmapuso kamo! Nadaog ko an kinaban.” An rekord ni Juan nagpapadagos: “Itinaram ni Jesus an mga bagay na ini, asin, sa pagtingkalag kan saiyang mga mata sa langit, sia nagsabi: ‘Ama, nagdatong na an oras; pamurawaya an saimong aki, tanganing pamurawayon ka kan saimong aki . . . Ipinahayag ko an saimong ngaran sa mga tawo na itinao mo sa sako hale sa kinaban.’”—Juan 17:1-6.
Matakot ki Jehova Asin Omawon Sia
17. Sa anong mga paagi maaarog niato an halimbawa ni Jesus?
17 Puwede daw niatong arogon an mapusong halimbawa ni Jesus ngonyan? Sierto nanggad na magigibo niato sa pagkatakot ki Jehova! Ipinaaram sato ni Jesus an bantog na ngaran asin mga kuwalidad ni Jehova. Sa pagkatakot ki Jehova bilang an satong Soberanong Kagurangnan, oomawon ta nanggad sia nin orog sa gabos na ibang dios, kabilang na an daing ngaran, misteriosong Trinidad kan Kakristianohan. Si Jesus naglingkod ki Jehova na may tamang pagkatakot, na nagsayumang masiod kan siod nin pagkatakot sa magagadanon na tawo. “Sa mga aldaw kan saiyang laman si Cristo nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot.” Siring ki Jesus, logod matakot man kita ki Jehova mantang padagos tang pinag-aadalan an pagkuyog sa mga bagay na tinitios niato—na perming an daing katapusan na kaligtasan an satong pasohan.—Hebreo 5:7-9.
18. Paano kita makatatao sa Dios nin banal na paglilingkod na may diosnon na takot?
18 Sa pagpadagos kan surat na iyan sa Hebreong mga Kristiano, sinadol ni Pablo an linahidan na mga Kristiano: “Mantang kita mag-aako nin kahadean na dai matatanyog, padagos kitang magkaigwa nin dai na kutana maninigong kabootan, na paagi kaiyan makapagtatao kita sa Dios nin kawiliwiling banal na paglilingkod na may diosnon na pagkatakot asin paghanga.” Ngonyan, an “dakulang kadaklan” nakikikabtang sa banal na paglilingkod na iyan. Asin ano an kalabot dian? Pakasambita sa dai na kutana maninigong kabootan ni Jehova sa pagtao kan atang kan Saiyang Aki, si Jesu-Cristo, sinabi ni Pablo: “Paagi sa saiya danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.” (Hebreo 12:28; 13:12, 15) Sa pag-apresyar kan dai na kutana maninigong kabootan ni Jehova, maninigo tang booton na gamiton an kada oras na posible sa saiyang banal na paglilingkod. Bilang maimbod na mga kairiba kan natatada sa linahidan na mga Kristiano, an dakulang kadaklan ngonyan an naggigibo kan mayor na kabtang kan banal na paglilingkod na iyan. Saindang iinaatribuwir an kaligtasan sa Dios asin ki Cristo, mantang piguratibong nagtitirindog sinda sa atubang kan trono nin Dios, na “nagtatao sa saiya nin banal na paglilingkod aldaw asin banggi.”—Kapahayagan 7:9, 10, 15.
Pamurawayon si Jehova Sagkod Lamang
19, 20. Anong duwang klase nin pagkatakot an maheheling sa “aldaw ni Jehova”?
19 An mamuraway na aldaw kan pagbindikar ki Jehova marikas na nagdadangadang! “‘Uya! nagdadangadang an aldaw na nagbabaga na garo horno, asin an gabos na mapalangkaw asin an gabos na naggigibo nin karatan magigin siring sa pinaggapasan. Asin an aldaw na nagdadangadang masolo sa sainda,’ sabi ni Jehova nin mga hukbo.” An kapahapahamak na panahon na iyan iyo an “dakula asin makangingirhat na aldaw ni Jehova.” (Malaquias 4:1, 5) Iyan magdadara nin “labi-labing kahorasaan” sa puso kan mga maraot, asin “dai [sinda] makaliligtas minsan sa anong paagi.”—Jeremias 8:15; 1 Tesalonica 5:3.
20 Alagad, an banwaan ni Jehova, pinasabngan nin nalalaen na klase nin pagkatakot. An anghel na pinaniwalaan kan “daing katapusan na maogmang bareta” sinabihan sinda sa makosog na tingog, na nagsasabi: “Matakot sa Dios, asin pamurawayon sia, huli ta nag-abot na an oras kan saiyang paghokom.” (Kapahayagan 14:6, 7) Magtitirindog kita sa paghanga sa paghokom na iyan mantang an nakasosolong init kan Armagedon totomtomon an kinaban ni Satanas. An kapakipakinabang na pagkatakot ki Jehova isusurat na dai mapapara sa satong puso. Kun siring kita logod oyonan na manompongan an satong sadiri na kabilang sa ‘mga ilinigtas sa pag-apod sa ngaran ni Jehova’!—Joel 2:31, 32; Roma 10:13.
21. Sa anong mga bendisyon masagkod an pagkatakot ki Jehova?
21 Makangangalas na mga bendisyon an kasunod, kabilang na an “mga taon nin buhay” na malawig sa panahon na daing sagkod! (Talinhaga 9:11; Salmo 37:9-11, 29) Kaya, an satong paglaom man magmana kan Kahadean o maglingkod sa mga rona kaiyan sa daga, padagos kita ngonyan na magtao sa Dios nin banal na paglilingkod na may banal na takot asin paghanga. Padagos niatong pamurawayon an saiyang banal na ngaran. Asin ano an binendisyonan na resulta? Pagpapasalamat sagkod lamang na isinapuso niato an madonong na hatol na perming matakot ki Jehova!
Paano Kamo Masimbag?
◻ Ano an kahulogan kan “pagkatakot ki Jehova”?
◻ Paano nakinabang an suanoy na banwaan sa pagkatakot sa Dios?
◻ Anong padara nin diosnon na pagkatakot an iwinalat sa sato ni Jesus?
◻ Paano kita magdadanay sa integridad sa pagkatakot ki Jehova?
[Ritrato sa pahina 8]
Sa libro nin Kapahayagan, an mga tugang ni Jesus naheling na nag-aarawit kan “awit ni Moises,” sarong awit na nag-oomaw ki Jehova
[Ritrato sa pahina 10]
An hukbo ni Josafat nanggana sa pagkatakot ki Jehova
[Ritrato sa pahina 13]
Mga taon nin buhay na malawig sa panahon na daing sagkod an magigin balos sa mga natatakot ki Jehova