An mga Patanaw sa Ngapit kan Kahadean nin Dios Nagin Sarong Katunayan
“Marahay an saindong ginigibo sa pagtao nin atension [sa makahulang tataramon] na siring sa sarong ilawan na nagliliwanag sa madiklom na lugar.”—2 PEDRO 1:19.
1. Anong pagkakalaen an maheheling niato sa kinaban ngonyan?
SUNOD-SUNOD na krisis—iyan an mayor na tema kan presenteng kinaban. Poon sa mga kalamidad sa ekolohiya sagkod sa lakop sa globong terorismo, an mga problema nin katawohan garo baga dai na mapogolan. Dawa an mga relihion kan kinaban dai nahimong makatabang. Sa katunayan, parate nindang pinapagrabe an situwasyon paagi sa paggatong sa pagkapanatiko, pagkaongis, asin nasyonalismo na nakakabanga sa mga tawo. Iyo, siring kan ihinula, an “mahibog na kaduloman” nakatahob “sa mga nasyon.” (Isaias 60:2) Minsan siring, kadungan kaiyan, minilyon an nakatanaw sa ngapit na may kompiansa. Taano? Huling nagtatao sinda nin atension sa makahulang tataramon nin Dios “siring sa sarong ilawan na nagliliwanag sa madiklom na lugar.” Tinotogotan ninda na giyahan an saindang mga lakad kan “tataramon,” o mensahe nin Dios na makukua ngonyan sa Biblia.—2 Pedro 1:19.
2. Oyon sa hula ni Daniel manongod sa “panahon kan katapusan,” siisay sana an tinawan nin espirituwal na pakarorop?
2 May labot sa “panahon kan katapusan,” si propeta Daniel nagsurat: “Dakol an magririlibot, asin an tunay na kaaraman magigin abunda. Dakol an lilinigan an sadiri asin papupution an sadiri patin dadalisayon. Asin an mga maraot magawe nanggad sa maraot na paagi, asin mayo lamang nin maraot na makakasabot; alagad an mga igwa nin pakarorop makakasabot.” (Daniel 12:4, 10) An espirituwal na pakarorop para sana sa mga sinserong ‘nagririlibot,’ o mahigos na nag-aadal sa Tataramon nin Dios, nagpapasakop sa saiyang mga pamantayan, asin nagmamaigot na gibohon an saiyang kabotan.—Mateo 13:11-15; 1 Juan 5:20.
3. Durante kan mga taon nin 1870, anong mahalagang katotoohan an nasabotan kan enot na mga estudyante sa Biblia?
3 Kaidto pang mga taon nin 1870, bago magpoon an “huring mga aldaw,” si Jehova Dios nagpoon na magpasirang nin orog na liwanag sa “sagradong mga hilom kan kahadean kan kalangitan.” (2 Timoteo 3:1-5; Mateo 13:11) Sa panahon na iyan nasabotan nin sarong grupo nin mga estudyante sa Biblia—sarongat sa lakop na opinyon—na an pagbalik ni Cristo dai maheheling. Pagkatapos na patukawon sa trono sa langit, si Jesus mabalik sa sentido na itatao nia an saiyang atension sa daga bilang Hade. Sarong naheheling na tanda na kompuesto nin laen-laen na kabtang an magtataong senyal sa saiyang mga disipulo na nagpoon na an saiyang dai naheheling na presensia.—Mateo 24:3-14.
Kan an Sarong Patanaw sa Ngapit Magin Katunayan
4. Paano pinakosog ni Jehova an pagtubod kan saiyang mga lingkod sa presenteng aldaw?
4 An bisyon kan transpigurasyon sarong pambihirang patanaw sa ngapit ki Cristo na may kamurawayan sa Kahadean. (Mateo 17:1-9) An bisyon na iyan nagpakosog sa pagtubod ni Pedro, Santiago, asin Juan sa panahon na dakol an nagporondo sa pagsunod ki Jesus huli ta dai nia inotob an bakong sono sa Kasuratan na mga linalaoman ninda. Siring man, sa panahon na ini kan katapusan, pinakosog ni Jehova an pagtubod kan saiyang mga lingkod sa presenteng aldaw paagi sa pagtao nin orog pang liwanag sa kaotoban kan makangingirhat na bisyon na iyan asin dakol na konektadong hula. Konsideraron niato ngonyan an nagkapira sa nakakapakosog sa pagtubod na espirituwal na mga katunayan na ini.
5. Siisay an Bitoon sa Aga, saka kasuarin asin paano sia ‘suminirang’?
5 Nagtataram manongod sa transpigurasyon, si apostol Pedro nagsurat: “Bilang resulta an makahulang tataramon orog pa niamong nasierto; asin marahay an saindong ginigibo sa pagtao nin atension dian na siring sa sarong ilawan na nagliliwanag sa madiklom na lugar, sagkod na mamanaag an aldaw asin an bitoon sa aga sumirang na, sa saindong puso.” (2 Pedro 1:19) An piguratibong Bitoon sa Aga na iyan, o “maliwanag na bitoon sa makaaga,” iyo an pinamuraway na si Jesu-Cristo. (Kapahayagan 22:16) Sia ‘suminirang’ kan 1914 kan mamundag an Kahadean nin Dios sa langit, na nagtatanda sa pagpoon nin sarong bagong kapanahonan. (Kapahayagan 11:15) Sa bisyon kan transpigurasyon, nagtunga si Moises asin Elias sa kataed ni Jesus, na nakikipag-olay sa saiya. Siisay an ipinapanganino ninda?
6, 7. Sairisay an irinerepresentar ni Moises asin Elias sa transpigurasyon, asin anong importanteng mga detalye an ihinahayag kan Kasuratan manongod sa mga irinerepresentar ninda?
6 Huling nakikabtang si Moises asin Elias sa kamurawayan ni Cristo, an duwang maimbod na saksing ini siertong nagrerepresentar sa mga mamamahala kaiba ni Jesus sa saiyang Kahadean. An pakasabot na si Jesus may kairibang namamahala kaoyon kan itinao ki propeta Daniel na sarong bisyon na patanaw sa ngapit kan pinatukaw sa trono na Mesiyas. Nakaheling si Daniel nin “saro na kaagid sa aki nin tawo” na inaako an “daing talaan an pagdadanay na pamamahala” hale “sa Suanoy kan mga Aldaw,” si Jehova Dios. Alagad mangnoha an ipinaheling ki Daniel dai nahaloy pakatapos kaiyan. Sia nagsurat: “An kahadean asin an pamamahala patin an kadakulaan kan mga kahadean sa sirong kan bilog na kalangitan itinao sa banwaan na mga banal kan Supremo.” (Daniel 7:13, 14, 27) Iyo, labing limang siglo bago an transpigurasyon, ihinayag nin Dios na may nagkapirang “banal” na makikikabtang sa kadakulaan kan paghade ni Cristo.
7 Sairisay an mga banal sa bisyon ni Daniel? An siring na mga indibiduwal an sinasambit ni apostol Pablo kan sabihon nia: “An espiritu man sana nagpapatotoo kaiba kan satong espiritu na kita mga aki nin Dios. Kun siring, kun kita mga aki, kita man mga paramana: mga paramana nanggad nin Dios, alagad kaibang mga paramana ni Cristo, basta kita iribang magdusa tangani man kitang iribang mapamuraway.” (Roma 8:16, 17) An mga banal mayong iba kundi an linahidan nin espiritu na mga disipulo ni Jesus. Sa Kapahayagan, si Jesus nagsasabi: “An makadaog totogotan kong tumukaw sa kaibanan ko sa sakong trono, kun paanong ako nakadaog asin tuminukaw sa kaibanan kan sakong Ama sa saiyang trono.” May kabilangan na 144,000, an binuhay liwat na mga ‘nakadaog’ na ini, kaiba ni Jesus, mamamahala sa bilog na daga.—Kapahayagan 3:21; 5:9, 10; 14:1, 3, 4; 1 Corinto 15:53.
8. Paano an linahidan na mga disipulo ni Jesus nakikabtang sa gibohon na kapareho kan ki Moises asin Elias, asin may anong mga resulta?
8 Pero, taano ta irinerepresentar ni Moises asin Elias an linahidan na mga Kristiano? An rason iyo na an siring na mga Kristiano, mantang mga tawo pa, may gibohon na kaagid kan ginibo ni Moises asin Elias. Halimbawa, naglilingkod sinda bilang mga saksi ni Jehova, dawa sa ibong nin paglamag. (Isaias 43:10; Gibo 8:1-8; Kapahayagan 11:2-12) Kapareho ni Moises asin Elias, may kosog nin boot na ibinubuyagyag ninda an falsong relihion mantang sinasadol an sinserong mga tawo na itao sa Dios an dai nababangang debosyon. (Exodo 32:19, 20; Deuteronomio 4:22-24; 1 Hade 18:18-40) Nagbunga daw an saindang gibohon? Iyo nanggad! Apuera kan pagtabang na tiponon an gabos na kabilang sa mga linahidan, tinabangan ninda an minilyon kan “ibang karnero” na magpaheling nin gikan sa boot na pagpasakop ki Jesu-Cristo.—Juan 10:16; Kapahayagan 7:4.
Tinapos ni Cristo an Saiyang Pandadaog
9. Paano ilinaladawan kan Kapahayagan 6:2 an kamugtakan ni Jesus ngonyan?
9 Bako nang sarong ordinaryong tawo na nakasakay sa ogbon nin asno, si Jesus saro na ngonyan na makapangyarihan na Hade. Ilinaladawan sia na nakasakay sa sarong kabayo—sarong Biblikong simbolo nin pakikilaban. (Talinhaga 21:31) “Uya! sarong maputing kabayo,” an sabi kan Kapahayagan 6:2, “asin an nangangabayo dian igwa nin arko; asin may koronang itinao sa saiya, asin sia nagluwas sa pandaog asin sa pagtapos kan saiyang pandadaog.” Dugang pa, may labot ki Jesus, si salmistang David nagsurat: “An sogkod kan saimong kakosogan ipapadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’”—Salmo 110:2.
10. (a) Paano nagkaigwa nin mamuraway na kapinonan an pangangabayo ni Jesus tanganing mandaog? (b) Paano an enot na kapangganahan ni Cristo nagkaigwa nin epekto sa kinaban sa pankagabsan?
10 An enot na kapangganahan ni Jesus nangyari tumang sa saiyang pinakamakapangyarihan na mga kalaban—ki Satanas asin sa mga demonyo. Huling pinahale sinda sa langit, ihinulog nia sinda digdi sa daga. Sa pakaaram na halipot na sana an saindang panahon, ipinahayag kan maraot na mga espiritung ini an saindang madahas na kaanggotan sa katawohan, na nagbunga nin grabeng sakit. An grabeng sakit na ini isinisimbolisar sa Kapahayagan kan pangangabayo nin tolo pang parakabayo. (Kapahayagan 6:3-8; 12:7-12) Kaoyon kan hula ni Jesus may labot sa “tanda kan [saiyang] presensia asin kan pagtatapos kan sistema nin mga bagay,” an saindang pangangabayo nagresulta sa guerra, tiggutom, asin nakakagadan na peste. (Mateo 24:3, 7; Lucas 21:7-11) Kapareho kan literal na mga kolog sa pangangaki, an “mga kolog nin kasakitan” na ini daing duwa-duwa na padagos na maorog sagkod na ‘taposon ni Cristo an saiyang pandadaog’ paagi sa pagpara kan gabos na gira kan naheheling na organisasyon ni Satanas.a—Mateo 24:8.
11. Paano pinapatotoohan kan kasaysayan kan Kristianong kongregasyon an autoridad ni Cristo bilang hade?
11 Risang-risa man an autoridad ni Jesus bilang hade huli ta iningatan nia an Kristianong kongregasyon tanganing maotob kaiyan an sugo na ihulit sa bilog na kinaban an mensahe kan Kahadean. Sa ibong kan maringis na pagtumang kan Dakulang Babilonya—an pambilog na kinaban na imperyo nin falsong relihion—asin kan bakong makikatood na mga gobyerno, an paghuhulit bako sanang nagpadagos kundi nakaabot sa sokol na dai pa nangyari kaidto sa kasaysayan kan kinaban. (Kapahayagan 17:5, 6) Makosog nanggad na patotoo sa pagkahade ni Cristo!—Salmo 110:3.
12. Taano ta dai nasasabotan kan kadaklan na tawo an dai naheheling na presensia ni Cristo?
12 Pero, makamomondo na an kadaklan na tawo, kaiba an minilyon na naghihingakong Kristiano, dai nasasabotan an dai naheheling na mga katunayan sa likod kan importanteng mga pangyayari digdi sa daga. Pinag-oolog-olog pa ngani ninda an mga nagpapahayag kan Kahadean nin Dios. (2 Pedro 3:3, 4) Taano? Huling binuta ni Satanas an saindang isip. (2 Corinto 4:3, 4) Sa katunayan, pinonan na niang butahon an naghihingakong mga Kristiano paagi sa espirituwal na kadikloman kaidtong dakol na siglo na an nakaagi, na pinapangyari pa ngani na bayaan ninda an mahalagang marhay na paglaom sa Kahadean.
Binayaan an Paglaom sa Kahadean
13. Ano an ibinunga kan espirituwal na kadikloman?
13 Ihinula ni Jesus na an mga apostata, kapareho nin mga doot na isinabwag sa tanga kan mga trigo, malaog sa Kristianong kongregasyon asin ilalagalag an dakol. (Mateo 13:24-30, 36-43; Gibo 20:29-31; Judas 4) Pag-abot nin panahon, inako kan mga Kristiano daang ini an paganong mga kapiestahan, kaugalean, asin katokdoan, na sinasabi pa ngani na “sa Kristiano” an mga iyan. Halimbawa, an Pasko naggikan sa mga seremonya na may kaibang pagsamba sa mga paganong dios na si Mitra asin Saturno. Alagad ano an nagtulod sa naghihingakong mga Kristiano na akoon an bakong sa Kristianong mga selebrasyon na ini? Sinasabi kan The New Encyclopædia Britannica (1974): “An Pasko, an kapiestahan kan pagkamundag ni Jesu-Cristo, inestablisar bilang resulta kan nagluluyang paghalat sa madali nang pagbalik ni Cristo.”
14. Paano minisrepresentar kan mga katokdoan ni Origen asin Agustin an katotoohan kan Kahadean?
14 Estudyare man an pagbiribid sa kahulogan kan termino na “kahadean.” An librong The Kingdom of God in 20th-Century Interpretation nagsasabi: “Binago ni Origen [sarong teologo kan ikatolong siglo] an paggamit nin Kristiano sa ‘kahadean’ asin tinawan nin panlaog na kahulogan bilang pamamahala nin Dios na nasa puso.” Saen ibinasar ni Origen an saiyang katokdoan? Bakong sa Kasuratan, kundi sa “pundamental na mga elemento nin pilosopiya asin pagmansay kan kinaban na laen na marhay sa kaisipan ni Jesus asin kan kaenot-enoteng iglesia.” Sa saiyang publikasyon na De Civitate Dei (An Siudad nin Dios), sinabi ni Agustin na taga Hipo (354-430 C.E.) na an iglesia mismo iyo an Kahadean nin Dios. An bakong sono sa Kasuratan na kaisipan na iyan nagtao sa mga iglesia nin Kakristianohan nin teolohikong mga basehan tanganing gamiton an politikal na kapangyarihan. Asin ginamit ninda an siring na kapangyarihan sa dakol na siglo, na may kabangisan sa parate.—Kapahayagan 17:5, 18.
15. Paano naotob an Galacia 6:7 kun dapit sa kadaklan kan mga iglesia nin Kakristianohan?
15 Pero, inaani na ngonyan kan mga iglesia an saindang itinanom. (Galacia 6:7) Dakol an garo baga nawawaran na kan saindang kapangyarihan saka kan mga miembro kan saindang parokya. An siring na dalagan nin mga bagay risang-risa sa Europa. Oyon sa magasin na Christianity Today, “ngonyan an darakulang katedral sa Europa [nagseserbi] bakong bilang mga harong nin pagsamba kundi bilang mga museo, na mayo nang laog kundi mga turista.” Maoobserbaran man an kaparehong dalagan nin mga bagay sa iba pang parte kan kinaban. Ano an ipinaparisa kaini para sa falsong relihion? Mapapara na sana daw iyan huli sa pagkawara nin suporta? Asin paano maaapektaran an tunay na pagsamba?
Magin Andam Para sa Dakulang Aldaw nin Dios
16. Taano ta may kahulogan an nag-oorog na pagkaanggot sa Dakulang Babilonya?
16 Kun paanong an pagbuga nin aso asin abo hale sa dating toninong na bulkan puedeng magparisa na iyan madali nang magtuga, an nag-oorog na pagkaanggot sa relihion sa dakol na parte kan kinaban nagpaparisa na nabibilang na an mga aldaw kan falsong relihion. Sa dai na mahahaloy, papangyayarihon ni Jehova an politikal na mga elemento kan kinaban na magsararo sa paghihingoa na ibuyagyag asin laglagon an espirituwal na patotot na Dakulang Babilonya. (Kapahayagan 17:15-17; 18:21) Maninigo daw na ikatakot kan tunay na mga Kristiano an pangyayaring iyan asin an iba pang aspekto kan “dakulang kahorasaan” na masunod? (Mateo 24:21) Dai nanggad! Sa katunayan magkakaigwa sinda nin mga dahelan na maggayagaya kun gumibo na nin aksion an Dios tumang sa mga maraot. (Kapahayagan 18:20; 19:1, 2) Estudyare an halimbawa kan Jerusalem kan enot na siglo asin an mga Kristianong nag-eerok duman.
17. Taano ta puedeng atubangon na may kompiansa kan maimbod na mga lingkod ni Jehova an katapusan kan sistemang ini?
17 Kan an mga hukbong Romano salikopan an Jerusalem kan 66 C.E., an mapagbantay sa espirituwal na mga Kristiano dai nakubhanan ni nasindakan. Huling mahigos na mga paraadal kan Tataramon nin Dios, aram ninda na “harani na an paggaba sa saiya.” (Lucas 21:20) Aram man ninda na magibo nin paagi an Dios para sa sainda tanganing makadulag pasiring sa kaligtasan. Kan gibohon iyan nin Dios, duminulag an mga Kristiano. (Daniel 9:26; Mateo 24:15-19; Lucas 21:21) Siring man ngonyan, an mga nakakamidbid sa Dios asin nagkukuyog sa saiyang Aki puedeng atubangon na may kompiansa an katapusan kan sistemang ini. (2 Tesalonica 1:6-9) Sa katunayan, kun mag-abot na an dakulang kahorasaan, magayagaya sindang ‘matindog nin tanos asin ititingag an saindang mga payo, huling aram ninda na an saindang pagkaligtas harani na.’—Lucas 21:28.
18. Ano an magigin resulta kan todo-todong pananalakay ni Gog sa mga lingkod ni Jehova?
18 Pakalaglaga kan Dakulang Babilonya, sa saiyang papel bilang an Gog kan Magog, si Satanas malansar nin todo-todong pagsalakay tumang sa matoninong na mga Saksi ni Jehova. Minasakat “siring sa mga panganoron na makakatakop sa daga,” an mga hukbo ni Gog maglalaom nin pasil na kapangganahan. Kanigoan na pagkabigla an naghahalat sa sainda! (Ezequiel 38:14-16, 18-23) Si apostol Juan nagsurat: “Naheling ko an langit na nabukasan, asin, uya! sarong maputing kabayo. Asin an saro na nangangabayo dian inaapod Maimbod asin Totoo . . . Sa saiyang ngoso nagluluwas an sarong matarom na halabang espada, tanganing ipanlugad nia sa mga nasyon.” An daing kadaogan na “Hade nin mga hade” na ini isasalbar an maimbod na mga parasamba ki Jehova asin popohoon an gabos nindang kaiwal. (Kapahayagan 19:11-21) Magigin pambihirang kulminasyon iyan kan kaotoban kan bisyon kan transpigurasyon!
19. Paano an lubos na kapangganahan ni Cristo makakaapektar sa saiyang maimbod na mga disipulo, asin ano an maninigo nindang pagmaigotan na gibohon ngonyan?
19 Si Jesus ‘hehelingon na may pagngalas sa aldaw na iyan may labot sa gabos na nagtubod.’ (2 Tesalonica 1:10) Gusto mo daw na mapabilang sa mga magpapaheling nin may pagkangirhat na paggalang sa mapangganang Aki nin Dios? Padagos kun siring na pakosogon an saindong pagtubod asin ‘magin andam kamo, huli ta sa oras na dai nindo pinaghohona, an Aki nin tawo madatong.’—Mateo 24:43, 44.
Papagdanayon Nindo an Toltol na Pag-iisip
20. (a) Paano niato ikakapaheling an satong pag-apresyar sa probisyon nin Dios na “maimbod asin mapagmansay na oripon”? (b) Anong mga hapot an maninigo niatong ihapot sa satong sadiri?
20 “An maimbod asin mapagmansay na oripon” regular na sinasadol an banwaan nin Dios na magdanay na mapagbantay sa espirituwal asin papagdanayon an saindang toltol na pag-iisip. (Mateo 24:45, 46; 1 Tesalonica 5:6) Inaapresyar daw nindo an napapanahon na mga pagirumdom na ini? Ginagamit daw nindo iyan sa pagbugtak nin mga prioridad sa buhay? Taano ta dai ihapot sa saindong sadiri: ‘Igwa daw ako nin malinaw na espirituwal na pakamansay na nagpapangyari sa sako na maheling an Aki nin Dios na namamahala na sa langit? Naheheling ko daw sia na andam nang gibohon an paghokom nin Dios tumang sa Dakulang Babilonya asin sa iba pang kabtang kan sistema ni Satanas?’
21. Taano an nagkapira ta tibaad tinogotan na dumiklom an saindang espirituwal na pakamansay, asin ano an apretadong dapat gibohon ninda?
21 An nagkapira na asosyado na ngonyan sa banwaan ni Jehova tinogotan na dumiklom an saindang espirituwal na pakamansay. Posible daw na iyan huli ta mayo sinda nin pasensia o pakatagal, arog kan nagkapira sa enot na mga disipulo ni Jesus? Naapektaran daw sinda nin mga kahaditan sa buhay, materyalismo, o paglamag? (Mateo 13:3-8, 18-23; Lucas 21:34-36) Tibaad nadedepisilan an nagkapira na saboton an nagkapirang impormasyon na ipinublikar kan “maimbod asin mapagmansay na oripon.” Kun an arin man digdi nangyari sa saindo, sinasadol niamo kamo na pag-adalan an Tataramon nin Dios na may bagong kaigotan asin magngayongayo ki Jehova tanganing makamit giraray nindo an makosog, dayupot na relasyon sa saiya.—2 Pedro 3:11-15.
22. Paano nakaapektar sa saindo an pagkonsiderar kan bisyon kan transpigurasyon asin konektadong mga hula?
22 An bisyon kan transpigurasyon itinao sa mga disipulo ni Jesus kan kaipuhan ninda an pagparigon sa boot. Ngonyan, igwa kita nin sarong bagay na mas mahalagang marhay tanganing pakosogon kita—an kaotoban kan pambihirang patanaw sa ngapit na iyan asin dakol pang konektadong hula. Mantang hinohorophorop niato an mamuraway na mga katunayan na ini asin an kahulogan kaini sa ngapit, ipahayag man logod niato sa bilog niatong puso an saboot ni apostol Juan kan sabihon nia: “Amen! Madia, Kagurangnan na Jesus.”—Kapahayagan 22:20.
[Nota sa Ibaba]
a Sa orihinal na Griego, an termino na trinadusir na “mga kolog nin kasakitan” literal na nangangahulogan na “mga kolog nin pangangaki.” (Mateo 24:8, Kingdom Interlinear) Isinusuherir kaini na kapareho kan mga kolog nin pangangaki, an mga problema sa kinaban magigin mas parate, mas makosog, asin mas malawig, na matatapos sa dakulang kahorasaan.
Nagigirumdoman daw Nindo?
• Kan mga taon nin 1870, ano an nasabotan kan sadit na grupo nin mga estudyante sa Biblia manongod sa pagbalik ni Cristo?
• Paano naotob an bisyon kan transpigurasyon?
• Ano an nagin epekto sa kinaban asin sa Kristianong kongregasyon kan pangangabayo ni Jesus tanganing mandaog?
• Ano an dapat niatong gibohon tanganing mapabilang sa mga makakaligtas kun taposon na ni Jesus an saiyang pandadaog?
[Mga Ritrato sa pahina 16, 17]
An patanaw sa ngapit nagin sarong katunayan
[Mga Ritrato sa pahina 18]
Aram daw nindo an nangyari kan ponan ni Cristo an saiyang pandadaog?