Pagpasan kan Satong Sadiring Pasan na Paninimbagan
1 An ideya nin paninimbagan garo magabat na pasan para sa mga tawo ngonyan. An dakol naghihingoang dulagan iyan. Bilang resulta, an mga lalaki inaabandono an mga agom na babae, an mga ina binabayaan an mga aki, an mga hobenes nagpopondo sa pag-eskuwela, asin an mga siudadano nagdudulag sa mga buhis. An tawong responsable saro na mapaniniwalaan, andam na manimbag sa saiyang ginibo. Kun siring, an Tataramon nin Dios malinaw na nagsasabi manongod sa mga Kristiano na “an lambang saro magpapasan kan saiyang sadiring pasan.” (Gal. 6:5) Tamang-tama na an tema kan pansirkitong asamblea sa 1992 “Pagpasan kan Satong Sadiring Pasan na Paninimbagan”! An seryeng ini mapoon sa Pebrero. Kita gabos maninigong gumibo nin depinidong mga plano na umatender.
2 Paagi sa mga pahayag, demonstrasyon, eksperyensia, asin interbio, malinaw na ipaliliwanag kan programang ini an laen-laen na paninimbagan niato gabos bilang mga Kristiano. Sa Sabadong hapon, magkakaigwa nin apat na parteng simposium na magpapaliwanag kun paano niato magayagayang maaasikaso an satong mga paninimbagan. An satong mga hobenes may paninimbagan, asin an pahayag kan paraataman sa sirkito sa Sabadong hapon espesyalmenteng para sa sainda. Sa Sabado may oportunidad man an mga bagong magdusay na mabautismohan. An gabos na nagpaplanong pabautismo sa pansirkitong asamblea maninigong ipaaram ini nin patienot pa sa nangengenot na paraataman tanganing magibo an preparasyon para kaini.
3 Sa Domingong aga an saro pang apat na parteng simposium isesentro an atension sa satong Kristianong paninimbagan na maghulit. Dangan, sa Domingong hapon, an pampublikong pahayag na may titulong “An Bagong Kinaban nin Dios—Siisay an Magigin Kuwalipikadong Lumaog?” itatao kan paraataman sa distrito.
4 Kita gabos magmamawot na iareglo an satong mga gibo tanganing makaatender asin lubos na makinabang sa magayonon na duwang aldaw na programang ini. Ipaaaram saindo kan saindong paraataman sa sirkito an lugar asin petsa na nakaiskedyul para sa saindong kongregasyon.