Magpuka Asin Papagdanayon an Toltol na Pag-iisip

¹ Huli sa parateng nagliliwat na kamugtakan sa kinaban, tamang-tama na an tema kan pansirkitong asamblea sa 1991 “Magpuka Asin Papagdanayon an Toltol na Pag-iisip.” (1 Tes. 5:6) An seryeng ini mapoon sa Pebrero, 1991. Kita gabos maninigong mag-andam na umatender oras na isabi sato kan satong paraataman sa sirkito an petsa.

² An nagkapira sa tampok na mga kabtang kan programa may kaibang apat-na-kabtang na simposium na sinadya sa pagtabang sato na ‘magpuka sa gabos na bagay.’ (2 Tim. 4:5) Sa ibong nin tibaad daing katoltolan na nakaagi, paano kita ngonyan magigin mapanggana sa paglikay sa mga siod ni Satanas asin paglaban sa espiritu kan kinaban? Seguradohon na dai palihison an mahalagang impormasyon na ini. Sa bilog na duwang aldaw na asamblea, aapodon man an satong atension sa praktikal na sadol na yaon sa librong Questions Young People Ask​—Answers That Work. Tibaad boot nindong darahon an saindong kopya. An mga hobenes sa partikular magmamawot na tawan nin espesyal na atension an impormasyon na ipapanongod sa sainda kan paraataman sa sirkito sa Sabado. Arog kan dati, may areglo nin bautismo sa Sabado, kaya an mga nagmamawot na simbolisaran an saindang pagdusay sa pansirkitong asamblea maninigong ipaisi iyan sa pinakamadaling panahon sa nangengenot na paraataman.

³ Sa Domingong aga idodoon an mahahalagang leksion paagi sa serye nin mga demonstrasyon na nagpapaheling kun paano kita makikinabang sa mga kasakitan, pati an mismong mga sala niato. Sa hapon itatao kan paraataman sa distrito an pahayag-publiko sa temang “Paggaweng May Kadonongan sa Rungaw na Kinaban.” An gabos na parahayag kan Kahadean asin interesado maninigong gumibo kan gabos na paghihingoa na magin presente.

⁴ Mantang nag-oorog an mga kagipitan sa buhay, kita nagtutubod na an gabos makikinabang asin magiginhawahan kan materyal na ini na inandam para sa pagpakosog sa sato. Magdesisyon na magin presente asin mag-atento sa bilog na programa, “huli ta ngonyan an satong kaligtasan orog na harani kisa kan kita magturubod.”​—Roma 13:11.