Pag-ako, Pag-aplikar, Asin Pagkinabang sa Tataramon nin Dios
1 Minsan ngani an minilyon igwa nin kopya kan Biblia, an kadaklan dai nag-aaplikar kan madonong na sadol kaiyan, kaya kadikit an nakikinabang dian. Pero an banwaan ni Jehova nagtutubod na iyan kapakipakinabang para sa gabos na bagay. (2 Tim. 3:16, 17) Kaya an magigin tema kan programa sa pansirkitong asamblea para sa 1993 “Pag-ako, Pag-aplikar, Asin Pagkinabang sa Tataramon nin Dios.”
2 Magkakaigwa nin mga pahayag, demonstrasyon, eksperyensia, asin mga interbio tanganing pakosogon kita asin tabangan kitang iaplikar nin lubos an Tataramon nin Dios sa gabos na kabtang nin buhay. Pag-oolayan sa programa sa Sabadong hapon an sadol asin disiplina sa laog nin pamilya na may koneksion sa pag-aling-aling, asosasyon, asin materyalismo. Ipaheheling kaiyan kun paano kita dapat na mapalaen sa kinaban asin na dai arogon an maraot na mga gawe asin bastos na lenguahe kaiyan. Bilang dagdag, itatao an pagpapakosog tanganing makinabang an nagsosolong mga magurang asin ilong kaakian.
3 Siring man, sa Sabado an mga bagong magdedikar magkakaigwa nin oportunidad na mabautismohan. An mga nagpaplanong magpabautismo maninigo na ipaaram an saindang kamawotan sa pinakamadaling panahon sa nangengenot na paraataman kan kongregasyon tanganing magkaigwa sia nin bastanteng panahon na iareglo an mga magurang na repasohon an mga hapot para sa mga kandidato sa bautismo.
4 Sisiyasaton sa programa sa Domingong aga an mga paagi na kita napalalaen sa kinaban paagi sa pagkuyog sa Tataramon nin Dios. An kahalagahan kan satong itsura asin kun paano malilikayan na raoton an satong isip sisiyasaton. Sa hapon, itatao kan paraataman sa distrito an pampublikong pahayag na may temang “Ano an Tanda kan Biblia Bilang Masasarigan?” Boot niatong siertohon na imbitaran an gabos na interesado sa marahay na programang ini.
5 An petsa asin lugar kan programa sa pansirkitong asambleang ini itatao kan saindong paraataman sa sirkito, asin dinadagka mi an gabos na umatender tanganing umako, iaplikar, asin makinabang sa sadol kan Tataramon nin Dios.—Sant. 1:22-25.