Programa sa Aldaw nin Espesyal na Asamblea Para sa 2010
1. (a) Anong sono sa Kasuratan na mga tema sa aldaw nin espesyal na asamblea an ipinaliwanag sa nakaagi pa sanang mga taon? (b) Igwa daw nin ano man na partikular na tampok na kabtang kan nakaaging mga aldaw nin espesyal na asamblea na nakatabang sa saindong ministeryo?
1 “Siertohon an Orog na Mahalagang mga Bagay,” “Marigon na Naninindogan Bilang Sarong Aripompon,” “Padagos na Magpatotoo sa Katotoohan,” asin “Kita an Dalipay—si Jehova an Satong Parakoron.” (Fil. 1:9, 10, 27; Juan 18:37; Isa. 64:8) Pira sana ini sa dakol na temang tinokar sa mga aldaw nin espesyal na asamblea kan nakaaging mga taon. Inaantisipar na daw nindo an pag-atender sa aldaw nin espesyal na asamblea para sa 2010? Ipapaliwanag kaiyan an temang: “Nainaan Na an Panahon na Natatada,” na kinua sa 1 Corinto 7:29.
2. Paano puedeng pukawon an pag-antisipar sa asambleang ini?
2 Ponan nang pukawon an pag-antisipar sa aldaw nin espesyal na asamblea pagkatapos tolos na ianunsiar an petsa kaiyan sa saindong kongregasyon. May mga magurang na tinatabangan an saindang mga aki na antisiparon an asamblea paagi sa paglaag kan petsa sa kalendaryo, kaiba an listahan nin mga bagay na kaipuhan na darahon, dangan binibilang ninda an natatada pang mga aldaw sagkod na umabot an asamblea. Durante kan saindong banggi nin Pampamilyang Pagsamba, tibaad gusto nindong repasohon an mga nota sa mga aldaw nin espesyal na asamblea kan nakaaging mga taon. Puede man nindong andamon an saindong puso para sa okasyon na ini paagi sa pagrepaso kan Makinabang sa Edukasyon sa Teokratikong Paadalan sa Pagmiministro, pahina 13-16, tanganing matabangan kamo asin an saindong pamilya na ‘magtao nin atension kun paano kamo naghihinanyog.’—Luc. 8:18.
3. Paano kita makikinabang nin lubos sa mga ipepresentar?
3 Iaplikar an Saindong Nanodan: Pagkatapos kan asamblea, ordinaryo na sanang nadadangog an mga tataramon na, “Magayonon nanggad an programa!” Totoo pirme iyan, huli ta saro ini sa dakol na abundang probisyon hale ki Jehova. (Tal. 10:22) Tanganing an impormasyon magbunga, dapat nindong horophoropon asin girumdomon iyan. (Luc. 8:15) Magtao nin panahon na pag-olayan an programa bilang sarong pamilya o kan mga kaiba nindo sa lunadan mantang kamo papuli pagkatapos kan asamblea. Pag-olayan an mga pasohan kan lambang saro asin an mga punto na makakatabang sa saindo sa ministeryo nindo. An paggibo kaiyan makakatabang sa saindo na makinabang sa impormasyon nin halawig na panahon dawa pagkatapos kan asamblea.—Sant. 1:25.
4. Taano ta magigin kapakipakinabang para sa sato an asambleang ini?
4 Pirme kitang naoogma kun nakakaresibi kita nin kapakipakinabang na regalo na eksaktong iyo an kaipuhan niato. Bako daw na inaantisipar nanggad niato an itinagama ni Jehova para sa sato sa masunod niatong aldaw nin espesyal na asamblea? Makakasierto kita na iyan magigin kapakipakinabang sa gabos na paagi. Makakaasa kitang mag-ako nin tama nanggad na regalo hale sa satong langitnon na Ama, si Jehova, sa paagi nin pagparigon sa boot asin pagsasanay tanganing magibo niato an gibohon na iinasignar nia sa sato.—2 Tim. 4:2; Sant. 1:17.