Bagong Areglo Para sa Pagrepaso kan mga Programa sa Asamblea
Mantang paorog nang paorog na nagraraot an kinaban ni Satanas, pinapasarig kita ni Jehova “na isikwal an kabikoan asin an kinabanon na mga mawot asin mamuhay na may toltol na isip asin katanosan patin diosnon na debosyon sa tahaw kan presenteng sistemang ini nin mga bagay.” (Tito 2:12) Kabilang sa mga probisyon na ginigibo nia paagi sa “maimbod asin mapagmansay na oripon” iyo an taonan na mga programa sa pansirkitong asamblea asin aldaw nin espesyal na asamblea. (Mat. 24:45) Nakakapakosog nanggad para sa sato an espirituwal na mga pagtiripon na ini!
Tangani na tabangan kitang magirumdoman asin iaplikar an inakong pagtotokdo, gagamiton durante kan 2005 an bagong areglo para sa pagrepaso kan mga programang ini sa asamblea. Nasa pahina 5-6 kan suplementong ini an mga artikulo na nagpapaheling kun ano an iaatubang sa asamblea saka an mga hapot sa repaso para sa kada programa sa asamblea. Totokaron kan mga kongregasyon an impormasyon na ini sa Pagtiripon sa Paglilingkod dai mahaloy bago asin dai mahaloy pakatapos kan pag-atender ninda sa saindang mga asamblea. Paano daw ini iaareglo?
Saro o duwang semana bago umatender an kongregasyon sa pansirkitong asamblea, iaatubang sa Pagtiripon sa Paglilingkod an dies minutos na pahayag basado sa artikulong “Bagong Programa sa Pansirkitong Asamblea” tangani na pukawon an pag-antisipar sa programa. Dadarahon man kan ispiker an atension sa mga hapot sa repaso asin eenganyaron an gabos na kumua nin mga nota bilang pag-andam para sa repaso na gigibohon pirang semana pakatapos kan asamblea.
Sa laog nin pirang semana pakatapos kan asamblea, iiiba sa Pagtiripon sa Paglilingkod an 15 minutos na repaso kan enot na aldaw kan programa sa asamblea. Sa masunod na semana, gagamiton an 15 minutos sa pagrepaso kan ikaduwang aldaw kan programa. An mga hapot sa repaso na yaon sa suplementong ini an magigin basehan para sa mga pagtokar na iyan. An repaso maninigong magkonsentrar sa praktikal na halaga kan impormasyon. Puedeng iareglo kan kamagurangan na pahalipoton, haleon, o ibalyo sa ibang iskedyul an ibang kabtang kan Pagtiripon sa Paglilingkod tangani na matawan nin lugar an mga sesyon na ini sa repaso.
Parehong areglo an susunodon may koneksion sa programa sa aldaw nin espesyal na asamblea, apuera sa pagkaigwa nin saro sanang 15 minutos na kabtang sa pagrepaso kan bilog na programa. Bobooton niato gabos na isaray an suplementong ini asin gamiton iyan tangani na lubos na makinabang sa marahayon na pagtotokdo na itinatao ni Jehova.—Isa. 48:17, 18.