“Kakanon sa Tamang Panahon”
1. Paano an katatapos pa sanang programa sa aldaw nin espesyal na asamblea nakatabang sa saimo asin sa iba?
1 Pagkaatender sa satong aldaw nin espesyal na asamblea, parate tang sinasabi, “Idto mismo an kaipuhan mi!” An sarong paraataman sa sirkito nagsabi na pagkadangog kan katatapos pa sanang programa, an nagkapira sa sirkito nia nagpahayag nin pagmawot na orog na makikabtang sa ministeryo. An sarong nagbibiaheng paraataman nagsabi: “Natabangan kami kaiyan na pag-isipan nin malinaw kun haen na kita sa sulog nin panahon mantang rinerepaso mi an samong mga desisyon sa buhay.” An saro pa nagsabi: “Dakol na parahayag an nagsabi na sarong pampukaw ini sa sainda tanganing siertohon na nakapokus sinda sa kun ano an pinakamahalaga, an ministeryo.” Paano ka natabangan kan aldaw nin espesyal na asamblea?
2. Ano an totokaron sa programa sa taon na ini nin paglilingkod?
2 An programa para sa taon na ini iyo man mismo an kaipuhan niato. An tema iyo an “Magpaili ki Jehova,” na kinua sa Salmo 118:8, 9. Uni an nagkapira sa mga temang totokaron: “Kun Paanong si Jehova Sarong Kuta sa mga Panahon nin Kasakitan,” “Tabangan an Iba na Makapaili sa Irarom kan mga Pakpak ni Jehova,” “Arogon si Jehova sa Pagtao nin Pailihan,” “Mga Hoben, ki Jehova Magtiwala!” asin “An Satong Espirituwal na Paraiso—Probisyon na Pailihan Hale ki Jehova.”
3. Paano kita makikinabang nin lubos sa pag-atender?
3 Tanganing Makinabang: Pakaanunsiar kan petsa, gumibo na nin espesipikong mga plano na makaatender, asin imbitaran an saimong mga inaadalan sa Biblia na umiba sa saimo. Tanganing ‘mamunga kita na may pakatagal,’ dapat tandaan niato an satong nadadangog. (Luc. 8:15) Kaya maingat na maghinanyog sa programa, asin magkua nin haralipot na nota kan pangenot na mga punto saka instruksion na pinaplano mong iaplikar sa saimong buhay asin ministeryo. Pagkatapos kan asamblea, magtao nin panahon na pag-olayan an programa bilang pamilya, asin mag-isip nin espesipikong mga paagi na ikakaaplikar mo asin kan saimong pamilya an impormasyon.
4. Taano ta maninigo niatong antisiparon an satong nagdadangadang na aldaw nin espesyal na asamblea?
4 Arog nin masiram asin masustansiang pagkakan, an espesyal na asamblea sa taon na ini iinandam na may dakulang pagkamoot asin maingat na pagplano. Bendisyonan logod ni Jehova an saindong paghihingoa na makaatender asin makinabang sa ‘kakanon na ini sa tamang panahon’ tanganing pataluboon sa espirituwal an Kristianong mga ministro.—Mat. 24:45.