An Tataramon nin Diyos Mapuwersa
1. Ano an tema kan aldaw nin espesyal na asembleya sa 2014?
1 Bakong arog nin ibang libro na gibo nin bakong perpektong tawo, an Bibliya igwa nin puwersa na baguhon kita, na iinuuyon an satong isip asin gawi-gawi sa kabutan ni Jehova. Gurano man nanggad kamapuwersa an Tataramon nin Diyos? Paano niyato lubos na magagamit an puwersa kaiyan sa satong buhay? Paano ta mas epektibong magagamit iyan sa pagtabang sa iba? Nagtitiwala kita na an gabos mapapakusog sa espirituwal pag an mga puntong ini tinukar sa programa kan aldaw nin espesyal na asembleya sa 2014. An tema kaiyan ‘An Tataramon nin Diyos Mapuwersa,’ na kinua sa Hebreo 4:12.
2. Maninigo tang abangan an simbag sa anong mga hapot?
2 Aramon an Simbag sa mga Hapot na Ini: Mantang naghihinanyog sa programa, isurat an simbag sa mga hapot na nasa ibaba.
• Taano ta maninigo kitang magtiwala sa Tataramon ni Jehova? (Sal. 29:4)
• Paano niyato maeeksperyensiyahan an puwersa kan Tataramon nin Diyos sa satong buhay? (Sal. 34:8)
• Paano nindo ipapahiling an puwersa kan Tataramon nin Diyos sa saindong ministeryo? (2 Tim. 3:16, 17)
• Paano ta malilikayan na mabiktima kan mapandayang kapangyarihan kan kinaban ni Satanas? (1 Juan 5:19)
• Bilang hoben, paano kamo magigin mapangganang lingkod nin Diyos? (Jer. 17:7)
• Paano kita magigin mapuwersa dawa nangluluya kita? (2 Cor. 12:10)
• Ano an makakatabang sa dagos-dagos na pagbabago, dawa kun igwa kita nin mga paggawi asin ugali na masakit nang baguhon? (Efe. 4:23)
3. Apuwera sa paghinanyog sa programa, paano pa kita makikinabang sa aldaw nin espesyal na asembleya?
3 Makikinabang nanggad kitang marhay sa mahalagang impormasyon na ini! Saro pa, an aldaw nin espesyal na asembleya, arog kan pansirkitong asembleya asin pandistritong kumbensiyon, magtatao sa sato nin oportunidad na magpahiwas asin makiasosyar sa mga tugang sa ibang kongregasyon. (Sal. 133:1-3; 2 Cor. 6:11-13) Kaya makiasosyar sa dati nang mga katuod, asin makipagkatuod man sa iba. Kun may madalaw na ispiker sa saindong asembleya, arog baga kan paraataman nin distrito o Bethelite, taano ta dai aprobetsaran an pagkakataon na i-welcome siya asin an saiyang agom? Iyo, dakul nanggad kitang dahilan na abangan an maabot na aldaw nin espesyal na asembleya!