Bagong Programa sa Espesyal na Aldaw nin Asamblea
An probisyon na espesyal na mga aldaw nin asamblea nagpoon kan 1987. An sarong aldaw na mga pagtiripon na ini nagin nakaparirigon para sa mga lingkod ni Jehova asin para sa mga interesado na nag-aatender. Poon sa Pebrero, 1999, iaatubang an sarong bagong programa sa espesyal na aldaw nin asamblea. Manonompongan nindo na kapakipakinabang sa espirituwal an siyam na pahayag asin dakol na interbio patin eksperyensia.
“Magpaheling nin sa Pusong Pagpahalaga sa Lamesa ni Jehova” an tema kan bagong programa. (Isa. 65:14; 1 Cor. 10:21) Pakokosogon kaiyan an satong desisyon na an satong pagsamba ki Jehova dapat na magkaigwa nin pangenot na lugar sa satong buhay. (Sal. 27:4) An kabtang kan paraataman sa sirkito na “Pagsiyasat kan mga Inklinasyon kan Satong Puso” ipaliliwanag an satong saboot manongod sa pag-atender sa mga pagtiripon. Ipaheheling sa sato kan sarong nagdadalaw na espiker (o sarong lokal na tugang kun mayong nagdadalaw na espiker) kun paano mahihimong “Papagdanayon an Espirituwalidad Paagi sa Pagkakan sa Lamesa ni Jehova.” Itatao man an praktikal na pamparigon sa boot sa mga hoben sa organisasyon ni Jehova tangani na mapagdanay an karigonan sa paglilingkod sa Dios. Ipaheheling kan pangenot na pahayag kan nagdadalaw na espiker, na may temang “Pinasarig sa Espirituwal Tangani na Magtao nin Mapusong Patotoo,” kun paano kita sinasangkapan kan mga probisyon paagi sa kongregasyon na mapusong magpatotoo manongod sa Kahadean. Siisay an habong makinabang sa programang ini?
An bagong mga nagdusay na gustong magpabautismo maninigong paisihon an nangengenot na paraataman sa pinakaamay na mapupuede. Kompiado kita na mantang pinoponan niato an ika-12 taon kan areglong espesyal na aldaw nin asamblea, an gabos na maatender maparirigon sa espirituwal para sa gibohon sa enotan.