Pataluboon an Saindong mga Kakayahan nin Pagmansay
1 An makamomondong huring mga aldaw, na ngonyan naeeksperyensiahan niato, nagbunga nin dugang pang kasakitan asin dakol na klase nin magagabat na pagbalo sa banwaan nin Dios sa gabos na lugar. (2 Tim. 3:1-5) Kita gabos nangangaipo nin pamparigon sa boot tangani na marigon na makapanindogan sa pagtubod. (1 Cor. 16:13) Magigibo niato iyan sa tabang ni Jehova mantang padagos kitang nagkakakan nin regular sa saiyang Tataramon, nagsasarig sa saiyang espiritu, asin nagdadanay na dayupot sa saiyang organisasyon.—Sal. 37:28; Roma 8:38, 39; Kap. 2:10.
2 May marahay na dahelan, an temang “Magin Maygurang sa mga Kakayahan nin Pagsabot” detalyadong ipinaliwanag sa programa sa espesyal na aldaw nin asamblea kan nakaaging taon. Iyan basado sa 1 Corinto 14:20, na dian mababasa niato an mga tataramon ni apostol Pablo: “Mga tugang, dai kamo magin saradit na aki sa mga kakayahan nin pagsabot, kundi magin kamong mga omboy kun dapit sa karatan; alagad magin maygurang sa mga kakayahan nin pagsabot.” Ano an nagin saboot nindo manongod sa programa?
3 “Kanigoan kanakaparirigon sa boot!” “Ini talaga an kaipuhan niamo!” Iyan duwa sana sa mga reaksion. Dawa an sarong bakong Saksi na nagduman sa espesyal na aldaw nin asamblea tangani na maheling an saiyang 12 anyos na aking babae na magpabautismo nagsabi na sia naghangang marhay sa programa asin na nasasabotan nia kun paano iyan magigin kapakipakinabang sa saiyang pamilya. Iyan man daw an pagmate nindo? Girumdomon ta an nagkapira sa tampok na mga kabtang kan programa.
4 Kaipuhan an Tamang Kaaraman Tangani na Mapatalubo an mga Kakayahan nin Pagmansay: Sa pambukas na pahayag, na “Pataluboon Ngonyan an Saindong mga Kakayahan nin Pagsabot,” ano an idinoon kan nagpapahayag na kaipuhan tangani na maatubang an mga angat ngonyan? Bako sanang abilidad sa isip. Dapat niatong pataluboon asin pararomon an satong mga kakayahan nin pagsabot sa Biblia, ta tibaad kita madaog kan gabos na karatan na dian kita nababalad. An pagsabot na ini nagkakaipo nin pagdirehir nin Dios. Siring kan salmista, dapat na mapagngayongayo niatong hagadon ki Jehova na ipasabot sa sato an saiyang mga ley asin pagirumdom tanganing mapaglingkodan niato sia nin bilog na puso.—Sal. 119:1, 2, 34.
5 Sa masunod na kabtang, ipinaheling kan paraataman sa sirkito na si Jehova, paagi sa saiyang Tataramon asin organisasyon, nagtatao sa sato nin “Mga Pantabang sa Pagigin Maygurang sa Pagsabot sa Biblia.” An pagsabot tinatawan nin kahulogan na “an abilidad na maheling an nasa laog nin sarong bagay asin mamansayan an minabilog kaiyan paagi sa pakakua kan koneksion kan mga kabtang kaiyan sa balang saro asin sa kabilogan, sa siring naiintindihan an tunay na kahulogan kaiyan.” Siisay an makatatabang sa sato sa pagpatalubo kan abilidad na ini? Si Jehova nagtao nin balaog na mga lalaki tangani na tabangan kita na gumibo nin espirituwal na pag-oswag. (Efe. 4:11, 12) Sinasadol kita kan saiyang daganon na organisasyon na basahon an Tataramon nin Dios aroaldaw asin umatender nin regular sa gabos na pagtiripon kan kongregasyon. (Sal. 1:2) Tinotokdoan kita kun paano gagamiton an Biblia asin an satong Kristianong mga publikasyon sa personal asin pampamilyang pag-adal siring man sa pag-andam para sa mga pagtiripon asin paglilingkod sa langtad. Inaaprobetsaran na daw nindo an gabos na probisyon na ini? Kamo daw nagpapadanay nin regular, personal na programa nin pagbasa sa Biblia? Mahalagang marhay ini tangani na kita maprotehiran na mabiktima nin kinabanon na mga tendensia, uso, pilosopiya, asin mapandayang mga impluwensia.—Col. 2:6-8.
6 Dapat na Patoodon an Satong mga Kakayahan nin Pagmansay: Sa saiyang enot na pahayag, na may temang “Ingatan an Espirituwalidad Paagi sa Pagpatood kan Saindong mga Kakayahan nin Pagmansay,” ipinaliwanag kan nagdadalaw na ispiker na an mga nasa kinaban dai nakamimidbid kun ano an tama asin sala. (Isa. 5:20, 21) Ini huli sa pagsayuma ninda na rekonoseron asin sunodon an matanos na mga pamantayan nin Dios. Sa kabaliktaran, kita na nag-ako nin espirituwal na pagpatood sa organisasyon ni Jehova rinerekonoser an mga pamantayan nin Dios, na nagseserbing giya sa satong mga aktibidad asin gawe-gawe. Sa siring, kita nasa kamugtakan na patunayan sa satong sadiri kun ano an marahay asin inaako sa pagheling ni Jehova patin kun ano an kaoyon kan saiyang sangkap na kabotan.—Roma 12:2.
7 Tangani na malikayan an ribaraw na kaisipan kan kinaban asin an maraot na ibubunga, dapat na padagos na patoodon niato an satong mga kakayahan nin pagmansay. Paano daw ini magigibo? Siring kan nasusurat sa Hebreo 5:12-14, idinoon ni apostol Pablo an pangangaipo na kumakan bako sanang kan “gatas” kan tataramon. Kaipuhan niato nin matagas na espirituwal na kakanon, siring kan inaako niato sa pag-adal kan hula ni Isaias sa Pag-adal sa Libro kan Kongregasyon. Dangan dapat na iaplikar niato tolos sa satong buhay an satong nanonodan. Kun ginigibo niato iyan, kombensido kita sa pagigin tama kan mga prinsipyo asin pamantayan ni Jehova. Pinapatood kaini an satong mga kakayahan nin pagmansay na malinaw na mamidbid kun ano an tama sagkod sala.
8 Makamomondo na an nagkapira nagluya sa espirituwal. Taano? Dai ninda ipinokus an saindang atension sa kun ano an marahay asin tanos sa pagheling ni Jehova. Bilang resulta, sinda nabiktima nin mga orolay asin interbio sa radyo asin telebisyon na may bakong marahay na laog sono sa Kasuratan, sagkod sa nakararaot na musika, o sagkod sa maraot na mga impluwensia sa mga chat room sa komputer. Paagi sa madonong na paggawe, malilikayan niato na maimpluwensiahan nin inmoral, lolong, o maraot na mga tawo.—Tal. 13:20; Gal. 5:7; 1 Tim. 6:20, 21.
9 An mga Hoben Dapat na ‘Magin mga Omboy Kun Dapit sa Karatan’: An programa igwa nin duwang kabtang na espesipikong ineenkaminar an mga hoben na pataluboon an saindang mga kakayahan nin pagmansay. Ipinaheling kan ispiker na an pagigin “omboy kun dapit sa karatan” nangangahulogan nin pagdadanay na daing kabatidan, an boot sabihon, inosente siring sa mga omboy, kun dapit sa mga bagay na maati sa pagheling ni Jehova. (1 Cor. 14:20) Kita gabos pinarigon an boot na magdanay na estriktong nagbabantay sa kun paano niato ginagamit an satong panahon tanganing malabanan na maimpluwensiahan kan gabos na klase nin karatan asin malikayan na maolakitan kaiyan. (Efe. 5:15-17) Inenkaminar kita na kalkulohon kun gurano kadakol na panahon an ginagamit niato sa pagbasa nin materyales na dai direktang nakakokontribwir sa satong pagtalubo sa pagsabot sa espirituwal na mga bagay. Nagibo na daw nindo iyan? Ano an ihinahayag kan mga resulta? Dugang pa sa pagbasa kan Biblia aroaldaw, magin determinadong subaybayan an mga babasahon na itinatao kan organisasyon. An paggibo kaini makatatabang sa sato gabos, kaiba an mga aki, na ‘magkua nin pakasabot.’—Tal. 4:7-9.
10 “Makinabang sa Pag-aplikar kan mga Prinsipyo sa Biblia na May Pakasabot”: Iyan an tema kan pantapos na pahayag kan programa sa espesyal na aldaw nin asamblea. Ipinaliwanag kan bisitang ispiker na si Jehova an Burabod kan nagtatao nin buhay na pakasabot, na nakalalabi nanggad sa pakasabot nin gabos na tawo. Imahinara na sana an pagkaigwa nin oportunidad na gamiton an pakasabot ni Jehova! Buka an palad na itinatao nia iyan sa mga sinserong naghahanap kaiyan asin naghahagad kaiyan na may pagtubod. (Tal. 2:3-5, 9; 28:5) Lubos daw nindong inaaprobetsaran an alok nia?
11 Inenkaminar kita na pag-adalan na aramon an mga prinsipyo mantang binabasa niato an Biblia. (2 Tim. 3:16, 17) Maingat na adalan iyan tangani na magkaigwa nin tamang pakasabot sa sinasabi ni Jehova. Tawan nin panahon an paghorophorop sa mga prinsipyong ini asin papagdanayon iyan sa isip asin puso nindo. Patotoodon kaini an saindong mga kakayahan nin pagmansay tanganing kamo magin mapanggana kun naggigibo nin mga desisyon sa buhay. (Jos. 1:8) Pag-olayan niato an nagkapirang situwasyon na inaatubang nin dakol asin helingon kun paano an pag-aplikar kan mga prinsipyong ini sa Biblia makakatabang sa sato na magin mapanggana.
12 ‘Maninigo daw na arogon ko an sarong estilo nin gubing asin pag-alinyar?’ An mga usong moda sa paggubing asin pag-alinyar kan kinaban parateng nagpapabanaag nin espiritu nin rebelyon. An siring na espiritu nakaiimpluwensia sa mga tawo na maggubing nin bagla asin makanos o mag-eksibir nin seksuwalidad. Anong konektadong mga prinsipyo sa Biblia an makatatabang sa sato na kontrahon an siring na mga tendensia? Huling napatood na an satong mga kakayahan nin pagmansay, eestudyaran niato an prinsipyo na makukua sa 1 Timoteo 2:9, 10, na maggubing “na may kabinian asin toltol na isip . . . , sa paagi na angay sa mga [tawo] na naghihingakong sinda may reberensia sa Dios.” An iba pang prinsipyo na aplikado kaiba an mga nasambitan sa 2 Corinto 6:3 asin Colosas 3:18, 20.
13 ‘Ano an magigibo ko tangani na papagdanayon na makosog an bogkos kan sakong pamilya?’ Mahalagang marhay an marahay na komunikasyon sa tahaw kan mga miembro nin pamilya. An Santiago 1:19 nagsasabi sa sato: “An gabos na tawo kaipuhan na magin listo kun dapit sa pagdangog, maluway kun dapit sa pagtaram, maluway kun dapit sa grabeng kaanggotan.” Kaipuhan na maghinanyog sa lambang saro an mga miembro nin pamilya siring man mag-orolay-olay huli ta an komunikasyon nin pamilya simbagan. Dawa kun tama an sinasabi niato, kun iyan sasabihon sa maringis, mapalangkaw, o daing pakamateng paagi, iyan posibleng marhay na magtao nin orog na danyos kisa karahayan. Kaya baga man kita sarong agom na lalaki o babae, sarong magurang o aki, maninigo na an satong pagtaram “danay na igwa nin pagkamaugayon, na tinimplahan nin asin.”—Col. 4:6.
14 ‘Apektado daw ako nin materyalismo?’ An materyalismo sarong kinabanon na pan-iimpluwensia na ginigibong komplikado an buhay nin saro. Dai kaiyan binubuksan an pinto pasiring sa kaogmahan. (Ecl. 5:10; Luc. 12:15; 1 Tim. 6:9, 10) Tangani na matabangan kita na malikayan an siod nin materyalismo, tinokdoan kita ni Jesus kan importanteng prinsipyong ini: Papagdanayon na simple an mata. An timbang, bakong gayong komplikadong pamumuhay kalabot an pagpokus kan satong mga mata sa intereses kan Kahadean, na ginigibo an gabos na iba pang bagay na segunda sana.—Mat. 6:22, 23, 33.
15 Kun Ano an Maninigong Magin Obheto Niato: Igwa kita sa Tataramon nin Dios nin masasarigan na gikanan nin matanos na mga prinsipyo na magiya sa sato sa paggibo nin mga desisyon. Kaipuhan niatong manodan an mga prinsipyong ini, horophoropon iyan, asin saboton kun paano iyan iaaplikar sa satong buhay. Sa siring, paagi sa ‘pagpatood sa satong mga kakayahan nin pagmansay na mamidbid kun ano an tama sagkod an sala,’ pakikinabangon niato an satong sadiri asin matatawan niato nin onra si Jehova.—Heb. 5:14.