Kabtang 2—Mga Bendisyon Gikan sa Pagpaheling nin Apresasyon sa Pagkamoot ni Jehova
1 Sa kabtang kan nakaaging bulan manongod sa temang ini, itinampok niato an apat na paagi na an satong apresasyon sa pagkamoot ni Jehova ikapaheheling sa ministeryo. (1 Juan 4:9-11) Digdi idadagdag niato an lima pang paagi na magigibo niato ini. Kun kita lubos na makikikabtang sa pagtabang sa iba sa espirituwal na paagi, kita maoogma.
2 Impormal na Paghuhulit: Ini sarong epektibong paagi nin paghanap sa mga tawong nagugutom asin napapaha sa katanosan sagkod pagpasakamot sa sainda nin nakakatabang na mga babasahon. Kapakipakinabang na ‘tuboson an angay na panahon’ asin magpatotoo sa gabos na okasyon patin sa siisay man na nanunuparan niato. (Efe. 5:16) Tibaad kaipuhan niatong magkaigwa nin kosog nin boot na magpatotoo sa paaging ini, alagad kun nasasabotan niato an pagkamoot nin Dios asin an mga pangangaipo nin mga tawo, kita magpapatotoo sa gabos na oportunidad.—2 Tim. 1:7, 8.
3 An sarong misyonero mayaman na binendisyonan huli sa pagpoon nin pakikipag-olay sa kapwa pasahero sa sarong taksi. Nagpaheling nin interes an lalaki. Naggibo nin mga pagdalaw liwat, asin naponan an sarong pag-adal sa Biblia. An lalaking iyan nakaaram kan katotoohan asin nag-oswag sagkod na nagin sarong magurang sa kongregasyon!
4 Pagsurat: Tibaad dai niato nahihimo na magharongharong huli sa kamatean sa pisikal o maraot na kamugtakan nin panahon. Puede kitang sumurat, na nagtatao nin halipot na patotoo paagi sa koreo sa mga indibiduwal na midbid niato, sa mga nagadanan nin mga namomotan, o sa mga mayo sa harong sa teritoryo. Puede niatong ilakip an saro sa satong napapanahon na mga pulyeto na igwa nin nakaaakit na mensaheng basado sa Biblia asin nag-eenkaminar sa nakaresibi na sumimbag kun sia igwa nin ano man na hapot. Gamiton an personal na adres nindo o an sa Kingdom Hall; dai tabi paggamiton an adres kan sangang opisina.
5 Paghuhulit Paagi sa Telepono: Ini sarong marahay na paagi na maabot an mga tawo na dai niato nanonompongan sa pagharongharong. Kun gigibohon niato iyan na may diskresion, kabootan, taktika, asin kabatidan, tibaad marahayon na reaksion an makua niato. An Pebrero 2001 An Satong Ministeryo sa Kahadean, pahina 5-6, nagtatao nin praktikal na mga suhestion kun paano makakukua nin pinakamarahay na mga resulta.
6 Kan an sarong tugang na babae naghuhulit paagi sa telepono, hinapot nia an sarong babae kun baga hinorophorop na marhay kaini kun ano an nakatagama sa ngapit para saiya asin sa saiyang pamilya. Nagsabi an babae na iyo. Ihinayag nia na huli sa saiyang pagkadesesperar, nagsolosolo sia sa harong. Huling napahiro kan tunay na pagmakolog kan tugang na babae, uminoyon an babae na tagboon sia sa sarong haraning saod. Bilang resulta, an babae tolos na nag-ako nin pag-adal sa Biblia!
7 Maogmang Pag-ako sa mga Dai Kamidbid: Kun namomotan niato an satong kapwa, magigin listo kitang mariparo an siisay man na dai kamidbid na nagdadalaw sa satong pinagtitiriponan asin ipapamate sa saiya na sia maogmang inaako. (Roma 15:7) Ipaheling sa saiya na sia nasa tahaw nin mga may sinserong interes sa saiyang espirituwal na ikararahay. An satong tunay na pagmakolog asin an satong pag-alok nin personal na pag-adal sa Biblia tibaad magmotibar sa saiya na akoon an satong tabang.
8 An Satong Marahay na Gawe-gawe: Paagi sa satong marahay na gawe-gawe, sinasamnohan niato an katotoohan. (Tito 2:10) Kun an mga taga kinaban inoomaw kita bilang mga Saksi ni Jehova, sinda nagtataong onra sa satong Dios. (1 Ped. 2:12) Ini makatatabang man sa iba na makapoon sa dalan pasiring sa buhay.
9 Taano ta dai repasohon an limang paaging ini tangani na ikapaheling an satong apresasyon sa dakulang pagkamoot ni Jehova sa sato asin iaplikar iyan? (1 Juan 4:16) Kun gigibohon nindo iyan, mag-aani kamo nin dakol na bendisyon.