Mapangganang Paghuhulit Paagi sa Telepono

¹ An satong obheto bilang Mga Saksi ni Jehova bako sanang magpartisipar sa paghuhulit kan maogmang bareta kundi mapaabotan man an gabos na mapupuede kan mensahe kan Kahadean. (Gibo 10:​42; 20:24) Mantang an pagharongharong nagpapadagos na mayor na paagi na maabot an mga tawo, narerealisar niato na maski paagi sa sistematikong metodong ini dai niato nakakaolay an gabos. Kaya tanganing ‘lubos na otobon an satong ministeryo,’ naggagamit kita nin iba pang metodo​—kabale an paghuhulit paagi sa telepono​—tangani na manompongan an arog-karnerong mga indibiduwal.​​—2 Tim. 4:5.

² Sa dakol na lugar, an mga tawo nag-iistar sa guardiadong marhay na mga apartment, grupo nin mga edipisyo na dakol an pamilyang nag-iistar, o may trangkahan na mga komunidad, kun saen depisil na gibohon an satong tradisyonal na metodo nin pagharongharong sa pag-abot sa mga tawo. Minsan siring, dakol na parahayag an nagkakaigwa nin marahay na kapangganahan sa pag-abot sa mga tawong ini paagi sa telepono. Minsan ngani digdi sa Pilipinas tibaad bako ining pasil na marhay, tibaad posibleng makakua nin nagkapirang numero nin telepono hale sa direktoryo nin telepono para sa mga adres na nasa laog kan teritoryo kan saindong kongregasyon. Siring man, an dakol na naghuhulit sa tinampo, sa mga parke, o galeriya nahihimong makua an mga numero nin telepono kan mga nakakaolay ninda.

³ Nagduduwaduwa daw kamong iiba sa saindong ministeryo an paghuhulit paagi sa telepono? Inadmitir nin sarong tugang na lalaki: “Habo ko na an siisay man apodan ako sa harong tangani na pabakalan ako nin ano man na bagay, kaya sirrado na an isip ko sa klaseng ini nin paghuhulit.” Minsan siring, pakatapos sana nin duwang apod sa telepono, sia nagsabi: “Nagustohan ko iyan! Nungka kong inisip na iyan puedeng mangyari, alagad nagustohan ko iyan! Pamugtak an boot nin mga tawo sa telepono, asin madali sanang makua an gabos na kaipuhan nindo. Epektibong marhay ini!” An sarong tugang na babae may kaagid na reaksion: “Bako talaga akong maogma dapit sa paghuhulit paagi sa telepono. An totoo, habo kong gibohon iyan. Alagad prinobaran ko iyan asin nanompongan ko na iyan mabungang marhay. Igwa ako nin 37 pagdalaw liwat huli sa paghuhulit paagi sa telepono asin mas dakol na inaadalan kisa kaya kong asikasohon!” Kun gusto nindong probaran an paghuhulit paagi sa telepono, kamo puede man na magin mapanggana.

⁴ Pag-organisar Para sa Paghuhulit Paagi sa Telepono: An aktibidad na paghuhulit kan kongregasyon nasa irarom kan pagdirehir kan paraataman sa paglilingkod. Depende sa pangangaipo, an grupo nin kamagurangan tibaad gustong magnombra nin saro pang magurang sa kongregasyon o sarong kualipikadong ministeryal na lingkod na makikipagtabangan na marhay sa saiya sa pag-organisar nin paghuhulit paagi sa telepono.

⁵ Saen kamo makakukua nin mga numero nin telepono? Kun an sarong guardiadong marhay na grupo nin mga edipisyo igwa nin sadiring listahan kaiyan nin telepono, tibaad mahimo nindong kuanon an mga numero dian. Kun dai, tibaad posibleng kopyahon an ngaran kan mga residente sa direktoryo na nasa sala paglaog asin helingon iyan sa sarong establisadong libro nin telepono.

⁶ Kun an kamagurangan nagsosongko sa pagpastor sa mga baldado na nasa harong o sa mga maluya an hawak, puede sindang magin listo na enkaminaron an mga ini na makikabtang sa paghuhulit paagi sa telepono. Tibaad an sarong magurang sa kongregasyon puedeng gumibo nin nagkapirang apod sa telepono mientras na nag-oobserbar an parahayag. Dangan puede nang tawan nin oportunidad an parahayag na mag-apod. An dakol na nagpoon sa paaging ini naggagamit nin nagkapirang minuto kada aldaw sa gibohon na ini, asin talagang nagugustohan ninda iyan.

⁷ Mga Suhestion Para sa Kapangganahan: Kan sugoon ni Jesus an saiyang mga disipulo na maghulit, “isinugo [nia] sinda nin manduwaduwa.” (Luc. 10:1) Taano? Aram nia na paagi sa paghuhulit na magkaibanan sinda makanonood sa lambang saro asin magpaparinigonan nin boot. Totoo man iyan sa paghuhulit paagi sa telepono. Paagi sa paghuhulit na magkapadis, kamo makanonood sa lambang saro, makapag-oolay sa saindong mga bunga, asin makatatao nin mga suhestion para sa masunod na pag-orolay. Dawa durante nin pag-apod sa telepono, puede kamong magtinabangan na makua an angay na impormasyon.

⁸ Tangani na magin malinaw an kaisipan asin makakonsentrar, tumukaw kun saen puede nindong ilaag sa atubangan nindo an saindong materyales sa paghuhulit​—an Biblia, librong Reasoning, brosyur na Kahagadan, mga magasin, asin iba pa. Magsurat nin nagkapirang pag-atubang, asin ibugtak iyan sa lugar na maheheling nindo iyan. Magin andam na magkaigwa nin tama asin kompletong rekord, pati an petsa asin oras kan aldaw tangani na maaraman nindo kun noarin kukultibaron an nanompongan na interes.

⁹ An mga tawo parateng nagmamaan kun nakadadangog nin bakong pamilyar na tingog sa telepono. Kaya magin mainit, makikatood, asin mataktika. Solamente paagi sa tingog nindo na maaaraman kan kagharong an saindong karakter asin sinseridad. Magin relaks asin magtaram gikan sa saindong puso. Magtaram nin maluway asin malinaw saka may supisyenteng kosog nin boses na madadangog. Tawan nin oportunidad an kagharong na magtaram. Gamiton an bilog nindong ngaran, asin sambiton na kamo nag-iistar sa komunidad na iyan. Habo niatong isipon nin mga tawo na kita mga paratinda na ginagamit an telepono. Imbes na magsabing inaapodan nindo an gabos na residente sa sarong partikular na edipisyo o grupo nin mga edipisyo, ipaaram sa saiya na sia mismo an inaapodan nindo.

¹⁰ Mga Pag-atubang Paagi sa Telepono: An dakol sa mga introduksion na nasa pahina 9-15 kan librong Reasoning puedeng ibagay sa paghuhulit sa telepono. Puede nindong sabihon: “Inaapodan ko kamo sa telepono huli ta dai ako makakadian asin makaolay kamo nin personal. An katuyohan kan sakong pag-apod hagadon an saindong opinyon manongod sa sarong interesanteng marhay na hapot.” Dangan maghapot.

¹¹ An enot na pag-atubang sa irarom kan titulong “Crime/Safety” puedeng gamiton nin siring kaini: “Kumusta. An ngaran ko _____. Nag-iistar ako sa komunidad na ini. Gusto kong siertohon sa saindo na dai ako nagpapabakal nin ano man na bagay o nagsusurbey. Nag-aapod ako huli sa pagmalasakit ko dapit sa personal na kaligtasan. Kadakol nin krimen sa palibot niato, asin apektado kaiyan an satong buhay. Sa paghona daw nindo maabot an panahon na an gabos na tawo makapaglalakawlakaw sa tinampo sa banggi asin magin ligtas? [Pasimbagon.] Togotan nindo akong basahon an ipinanugang gigibohon nin Dios.”

¹² Nagkaigwa nin marahay na mga resulta an paggamit nin direktang pagdolok sa pag-alok nin mga pag-adal sa Biblia paagi sa telepono. An pag-adal puedeng idemonstrar sa laog nin pirang minuto. Alokon na dalawon an indibiduwal sa saiyang harong sa pagpadagos kan pag-adal, o kun nagduduwaduwa an tawo, alokon na ipadagos an pag-adal paagi sa telepono sa ibang aldaw.

¹³ Sa pagtapos nindo nin pag-oolay, mag-isip nin sarong bagay na magiya pasiring sa saindong pagdalaw sa tawong iyan sa saiyang harong o sa pagpadara paagi sa koreo nin sarong babasahon. Kun nag-aalangan an tawong iyan na itao sa saindo an saiyang adres, alokon na apodan giraray sa telepono. Tibaad mangaipo nin nagkapirang pag-apod bago magin talagang pamugtak an boot nia na imbitaran kamo sa saiyang harong.

¹⁴ Pagkaigwa nin Inisyatiba: An sarong 15 anyos na tugang na daragita pinonan an saiyang paglilingkod sa aga paagi sa pag-apod sa telepono. Nakaolay nia an sarong babae na nag-oyon na akoon an librong Kaaraman. Kan darahon kan tugang na daragita an libro sa harong, gustong maaraman kan babae kun paano naaraman kan hoben na tugang an saiyang numero nin telepono, huling iyan dai nakalista. Napasala an tugang na daragita sa pagdayal kan numerong iyan! Inako kan babae an pag-adal asin nagin na ngonyan dai pa bautisadong parahayag.

¹⁵ An sarong tugang na babae nagkua nin sarong teritoryo na huhulitan paagi sa telepono alagad idinigson na gibohon iyan sa laog nin tolong semana huli sa takot. Ano an nagtao sa saiya nin kosog nin boot na pumoon? Nagirumdoman nia an artikulo sa Awake! na Enero 22, 1997, na may temang “When I Am Weak, Then I Am Powerful.” Idto manongod sa sarong Saksi na naghuhulit paagi sa telepono sa ibong nin pisikal na mga limitasyon. Nagsabi an tugang na babae: “Namibi ako ki Jehova asin naghagad nin kosog. Hinagad ko sa saiya na itao sa sako an tamang mga tataramon sa pagtao kan sakong pag-atubang.” Ano an nagin resulta kan saiyang enot na aldaw nin paghuhulit paagi sa telepono? Ibinareta nia: “Sinimbag ni Jehova an sakong pamibi. Naghinanyog sa sako an mga tawo, asin iinareglo ko an sarong pagdalaw liwat.” Dai nahaloy an paghuhulit nia paagi sa telepono nagresulta sa sarong pag-adal sa Biblia. An konklusyon nia: “Tinokdoan giraray ako ni Jehova na magtiwala sa saiya asin bako sa sakong sadiri.”​—Tal. 3:5.

¹⁶ An pag-atubang kan katotoohan paagi sa telepono nagin mapangganang paagi nin paghuhulit kan maogmang bareta. Mag-andam na marhay, asin makikabtang nin bilog na puso. Dai manluya an boot kun dai nagkakaigwa nin paborableng reaksion sa enot na pirang pagprobar. Mamibi para sa paggiya ni Jehova, asin obserbaran an iba na naghuhulit sa nakaoogmang paaging ini. Paagi sa pagmawot na dai malipasan an siisay man sa satong teritoryo, logod na lubos niatong gibohon an satong ministeryo na may pagkaapurado.​—Roma 10:​13, 14.