Puedeng Magin Epektibo an Pagpapatotoo Paagi sa Telepono
1. Taano ta an pagpapatotoo paagi sa telepono puedeng ibilang na mahalagang kabtang kan satong ministeryo?
1 Taano ta puedeng pag-isipan niato an pagpapatotoo paagi sa telepono sa satong ministeryo? Huli ta iyan saro pang paagi na matabangan an iba na magkaigwa nin tamang kaaraman tanganing maligtas. (2 Ped. 3:9) Minsan ngani an pangenot na paagi niato sa pagpahayag kan maogmang bareta kan Kahadean nin Dios iyo an paghuhulit sa harong-harong, andam kita na aprobetsaran an iba pang paagi na mahulitan an mga tibaad dai manompongan sa harong.—Mat. 24:14; Luc. 10:1-7; Kap. 14:6.
2. Paano inoorganisar an pagpapatotoo paagi sa telepono?
2 Kun Paano Iyan Inoorganisar: Kapareho kan mga areglo sa paglilingkod sa langtad sa harong-harong, an mga parahayag tinatawan man nin teritoryo sa pagpapatotoo paagi sa telepono. An pagpapatotoong iyan puedeng gibohon nin solo o nin sadit na grupo na puedeng duwa o tolong tawo. An lugar na gagamiton maninigong toninong asin mayo nin mga nakakadisturbo. Para sa dakol, may bentaha an pagtukaw sa may lamesa asin pagbugtak sa atubangan ninda kan mga bagay na parate nindang ginagamit kun naghuhulit sa harong-harong.
3. Ano an maninigong girumdomon niato kun nagpapatotoo paagi sa telepono?
3 Kun Paano Magpapatotoo Paagi sa Telepono: Kun nagpapatotoo paagi sa telepono, an satong presentasyon maninigong garo sana nakikipag-olay. An nagkapira na nagpopoon pa sana puedeng magbasa nin sarong presentasyon sa kagharong alagad sa paagi na garo sana nakikipag-olay. Puedeng makatabang sa bagay na ini an mga introduksion na yaon sa librong Reasoning, An Satong Ministeryo sa Kahadean, asin sa pulyetong Gusto daw Nindong Maaraman an Katotoohan? Kun naggigibo nin sadiri nindong presentasyon, magkaigwa nin pinakatema, mag-andam nin hapot, asin magin andam na gumamit nin pirang teksto bilang simbag. Sa pangkagabsan iaalok nindo an kaparehong mga publikasyon na iinaalok sa pagharongharong. Estudyare an minasunod na mga pagirumdom: Magrelaks asin magtaram nin luway-luway. Magin magalang, mapasensia, asin makikatood, huling maririsa ini sa telepono. Maghinanyog mantang nagtataram an kagharong, dangan pasalamatan an saiyang mga komento. Mag-ingat na dai pagsambiton an areglo sa donasyon, huling tibaad mamisinterpretar ini na paghagad nin kuarta paagi sa telepono.
4. An pagpapatotoo paagi sa telepono matabang sa sato na magibo an ano sa teritoryo na iinasignar sa sato?
4 An makakaolay nindo sa telepono tibaad dai makahale sa harong huling may helang o baldado, o saro na depisil manompongan sa pagharongharong huli sa saiyang iskedyul sa trabaho. May iba pa na nakaistar sa mga komunidad na igwang trangka o sa mga apartment na guardiado asin kaipuhan an permiso tanganing makalaog an mga nagbibisita. Kun siring, sa paghihingoang mas lubos na magibo an satong ministeryo, pag-isipan na gamiton an epektibong paagi nin pagpapatotoo paagi sa telepono.