Mga Hapot

◼ Kun naghuhulit paagi sa telepono, maninigo daw niatong ipaliwanag an areglo sa donasyon?

Kun naghuhulit kita nin personal, tibaad puedeng ipaliwanag na an pambilog na kinaban na gibong pagtotokdo sa Biblia kan Mga Saksi ni Jehova biyong sustentado nin gikan sa boot na donasyon asin na naoogma kitang akoon an siring na donasyon. Minsan siring, dai maninigong sambiton an mga donasyon o areglo sa donasyon kun naghuhulit paagi sa telepono, huling mamimisinterpretar ini na sarong klase nin paghagad paagi sa telepono. An ministeryo kan Mga Saksi ni Jehova bako nanggad na komersial.​​—2 Cor. 2:17.

◼ Kun naghuhulit paagi sa telepono, ano an maninigo niatong gibohon kun hagadon nin saro na dai na giraray mag-apod an mga Saksi ni Jehova?

Maninigong igalang an kamawotan nin saro. Sarong nota na may petsa asin ngaran kan kagharong an maninigong ibugtak sa sobre kan teritoryo tanganing malikayan nin mga parahayag an pag-apod sa numerong iyan sa ngapit. Sarong beses sa sangtaon, maninigong repasohon an lista nin mga tawo na naghagad na dai na kita mag-apod. Sa pagdirehir kan paraataman sa paglilingkod, puedeng mag-asignar nin eksperyensiado asin mataktikang mga parahayag na apodan an mga tawong ini tanganing aramon an saindang presenteng saboot.​​—Helingon an “Hapot” sa Hunyo 1994 An Satong Ministeryo sa Kahadean.

◼ Ano an sasabihon niato sa answering machine?

Dai ibaba an telepono. Imbes, magsurat nin inandam na marhay na simbag na puedeng basahon nindo sa telepono. Puede nindong sabihon: “Ikinamomondo ko na mayo kamo sa harong. Kun gusto nindong magdangog nin sarong basado sa Biblia na pagtokar kan [titulo nin pampublikong pahayag], tabi na umatender sa Kingdom Hall kan Mga Saksi ni Jehova. Imbitado an publiko. Mayo nanggad nin pangongolekta.” Dangan sabihon nin malinaw an aldaw asin oras kan pagtiripon, asin itao an adres kan kalye o sabihon an lugar kan Kingdom Hall.