Ipaaram an Ngaran Asin mga Ginibo ni Jehova
1 “Magpasalamat kamo ki Jehova, mag-apod sa saiyang ngaran, ipaaram sa mga tawo an saiyang mga ginibo. . . . Maggayagaya an puso kan mga naghahanap ki Jehova.” (Sal. 105:1, 3) An salmistang nagsurat kan mga tataramon na iyan nakanompong nin dakulang personal na kagayagayahan sa pagtaram sa iba manongod ki Jehova asin sa saiyang “mga ginibo.” Anong mga ginibo? Daing duda na an mga konektado sa mamuraway na pagkahade nin Dios asin sa “maogmang bareta kan saiyang pagliligtas.”—Sal. 96:2, 3; 145:11, 12.
2 Mantang kita nagdadangadang sa panahon kan Memorial sa 2001, dakol kitang dahelan na maggayagaya manongod sa mga ginibo ni Jehova sa sato. Taano man? Daing duda na an Pamanggihan nin Kagurangnan iyo an pinakadakulang selebrasyon kan taon para sa gabos na tunay na Kristiano. Mayo na nin ibang okasyon na siring kaiyan kun mapadapit sa importansia, katuyohan, o prosedimiento. Ini panahon na girumdomon niato gabos an ginibo ni Jehova asin ni Jesus sa pagtao kan paagi para sa satong kaligtasan. Bakong makangangalas na sa panahon kan Memorial, naturalmenteng inaasahan niatong maheling an biglang pagdakol nin aktibidad sa paglilingkod sa langtad, mantang ipinaaaram niato an ‘maogmang bareta kan pagliligtas’!
3 Ma-auxiliary Payunir daw Kamo? Kan nakaaging Abril 19,704 an nagpalista bilang auxiliary payunir. Kan Mayo, 13,775 an nagpalista. Kan Marso an kabilangan 6,125. Ngonyan na taon, magigibo daw niato giraray an Marso, Abril, asin Mayo na espesyal na mga bulan nin dinugangan na aktibidad sa ministeryo? An Marso may limang Sabado, asin an Abril may limang Domingo. Paagi sa pagplano na maglingkod nin bilog na aldaw sa mga katapusan kan semana, nanompongan nin dakol na parahayag na nagtatrabaho nin bilog na panahon na kaya ninda na mag-auxiliary payunir. Tangani na maabot an kahagadan na 50 oras kada bulan, kaipuhan na an sarong auxiliary payunir magpromedyo nin mga 12 oras kada semana. Estudyaran nin maingat an isinuherir na mga iskedyul sa kahon na nasa pahina 4. Bagay daw sa saindong mga kamugtakan an saro kaini? Kun bako, tibaad puede nindong ibagay an sadiri nindong iskedyul tangani na makapag-auxiliary payunir ngonyan na Marso, Abril, asin Mayo.
4 Maninigo nang pumoon ngonyan an kamagurangan na pataluboon an entusiasmo asin suporta para sa dinugangan na paglilingkod. Kan nakaaging taon sa sarong kongregasyon kun saen an gabos na kamagurangan asin ministeryal na lingkod nagpalista bilang auxiliary payunir, 64 sa 121 parahayag an nagpayunir kan Abril! Naogma man na marhay an kongregasyon na maheling an anom na dai pa bautisadong parahayag na nagpoon na magreport kan Marso asin Abril. Tunay nanggad na ini an pinakamarahay na panahon para sa mga aki asin bagohan na hapoton an kamagurangan kun baga sinda kualipikado nang pumoon sa pakikikabtang sa paghuhulit sa publiko.
5 Nagtatao nin mga Bendisyon an Dugang na Paghihingoa: An mga kongregasyon na nagbubugtak nin espesyal na mga pasohan asin naggigibo nin dugang na paghihingoa nagkakamit nin dakol na bendisyon. May mga kongregasyon na tibaad partikular na idoon an pagkobre sa bihirang mahulitan na teritoryo, na nagkokonsentrar sa alternatibong mga paagi nin paghuhulit, o itinatampok an paghuhulit paagi sa telepono—sarong epektibong paagi tangani na makaolay an mga mayo sa harong asin residente na dai naaabotan.
6 Maninigo daw na an maluyang salud o pagigin gurang makaolang sa siisay man sa pagpartisipar sagkod sa mapupuede sa paglilingkod? Dai sa gabos na kamugtakan. Halimbawa, an sarong 86 anyos na tugang na babae na may kanser nag-auxiliary payunir kan Abril sa ibong kan paggatok kan saiyang mga tabay. Pinagin posible kan paghuhulit paagi sa telepono na sia lubos na makikabtang sa paglilingkod, na dinudugangan an saiyang pag-omaw ki Jehova. Ini nagkaigwa nin nakaaanimar na epekto sa saiya sagkod sa kongregasyon.
7 Mag-andam na Marhay Para sa Memorial: Ngonyan na taon an Memorial natangod sa Abril 8. Mantang ini Domingo, posibleng dakol an umatender. Tibaad magkaigwa kita kan pinakadakulang kabilangan nin mga maatender kasuarin man kun gigibohon niato an satong kabtang paagi sa (1) pag-atender niato mismo asin (2) pag-imbitar sa iba na makiiba sa sato sa Memorial. Siisay an maninigo niatong imbitaran?
8 Helingon sa personal nindong rekord nin paglilingkod sa langtad an ngaran kan mga nagpaheling nin interes sa katotoohan, dawa ngani dai man nindo sinda nasosongko nin regular. Duwa o tolong semana bago an Memorial, magkonsentrar sa pagdalaw sa gabos na ini na dara an imbitasyon sa Memorial. Kun itinotogot kan saindong kamugtakan, mag-alok nin transportasyon para sa mga gustong umatender.
9 Sa nagkapirang kongregasyon, dai nagagamit an gabos na inimprentang imbitasyon sa Memorial. Maninigong seguradohon kan mga sekretaryo kan kongregasyon na itao an mga imbitasyon sa igong panahon tangani na gabos ikadistribwir. Tibaad gusto nindong makinilyahon o isurat nin malinig an oras asin lugar kan Memorial sa ibaba kan imbitasyon. O puede nindong iiba an sarong handbill na nagpapaheling kan adres kan Kingdom Hall kun dian gigibohon an saindong Memorial. Bilang pagirumdom, sa kadaklan na kamugtakan an mga imbitasyon sa Memorial maninigong itao nin personal sa kagharong.
10 Girumdomon an mga Inaktibo: Dahelan nin paggayagaya kun an sarong inaadalan sa Biblia idinudusay an saiyang sadiri ki Jehova asin sinisimbolisaran ini paagi sa bautismo sa tubig. Pero, kada taon an nagkapira sa tahaw niato minaontok sa pakikiasosyar sa sato, asin sinda minapondo sa pagtaram sa iba manongod sa ngaran asin mga ginibo ni Jehova. May marahay kitang dahelan na mahadit. Maski ngani an kadaklan na inaktibo dai binayaan an katotoohan, tibaad sinda puminondo na sa paghuhulit huli sa panluluya nin boot, personal na mga problema, o iba pang kahaditan sa buhay. (Mat. 13:20-22) An mga luminuya sa espirituwal nangangaipo nin tabang na bumalik sa kongregasyon bago sinda masiba kan sistema ni Satanas. (1 Ped. 5:8) Sa panahon na ini kan Memorial gusto niatong gumibo nin espesyal na paghihingoa na tabangan an gabos na kualipikadong inaktibo na umiba giraray sa paghuhulit kan maogmang bareta.
11 Maninigong abisohan kan sekretaryo kan kongregasyon an mga namamayo sa pag-adal sa libro dapit sa siisay man sa saindang grupo na inaktibo. An Komite sa Paglilingkod kan Kongregasyon an mangengenot sa pag-areglo nin mga pagsongko sa pagpastor sa gabos na inaktibo. Kun madeterminaran na makikinabang an indibiduwal sa personal na pag-adal sa Biblia, maninigong desisyonan kan komite sa paglilingkod kun siisay an magigin pinakaangay na mamayo sa pag-adal. Dawa ngani tibaad dai man kaipuhan na mag-adal sa halawig na panahon, an sarong asignadong mamayo kaiyan puedeng ireport an oras, mga pagdalaw liwat, asin pag-adal sa Biblia.
12 Kan nakaaging Abril an sarong tugang na babae na naghaharongharong inalok nin mga magasin an sarong hoben na lalaki sa tinampo. Nagtuga an lalaki na an saiyang agom inaktibong Saksi. Hinapot nia kun saen an Kingdom Hall asin inimbitaran an tugang na babae na dalawon sindang mag-agom. Bilang resulta, an mag-agom nag-atender kan sunod na pagtiripon asin uminoyon sa pag-adal sa Biblia.
13 Mag-andam Para sa Dinugangan na Aktibidad! Idinugang pa kan salmista na nagpahayag na maninigo niatong ipaaram an ngaran asin mga ginibo ni Jehova: “Umawit kamo sa saiya, umawit kamo nin melodiya sa saiya, magpaheling kamo nin interes sa gabos niang makangangalas na ginibo. Mamansag kamo sa saiyang banal na ngaran.” (Sal. 105:2, 3) Ipaheling niato an satong interes sa dakulang ngaran ni Jehova asin sa saiyang “makangangalas na [mga] ginibo” paagi sa pagdagdag sa satong paghihingoa sa ministeryo, na ginigibo ini na an pinakadakulang panahon kan Memorial kasuarin man!
[Kahon sa pahina 4]
Manlaenlaen na Paagi sa Pag-iskedyul nin 12 Oras Kada Semana sa Pag-auxiliary Payunir
Aldaw Oras
Lunes 1 2 — —
Martes 1 — 3 —
Mierkoles 1 2 — 5
Huebes 1 — 3 —
Biernes 1 2 — —
Sabado 5 4 3 5
Domingo 2 2 3 2
Total: 12 12 12 12
An saro daw sa mga iskedyul na ini magigin epektibo sa saindo?
Kun dai, taano ta dai gumibo nin sadiri nindong iskedyul?