Kabtang 1—Mga Bendisyon Gikan sa Pagpaheling nin Apresasyon sa Pagkamoot ni Jehova
1 Si apostol Juan nagsurat: “Kun para sa sato, kita namomoot, huli ta [si Jehova] enot na namoot sa sato.” (1 Juan 4:19) Kun iniisip-isip niato an gabos na itinao ni Jehova sa sato, kita namomotibar man na ipaheling an satong hararom na apresasyon bilang balos. Nagtao si Jesus nin halimbawa sa paggibo kaini paagi sa makinuyog na paghuhulit manongod sa ngaran asin Kahadean nin Dios. (Juan 14:31) Kapakipakinabang na estudyaran ta an nagkapirang paagi na ikapaheheling niato an satong apresasyon sa pagkamoot ni Jehova asin sa mga bendisyon na bunga kaiyan.
2 Pagharongharong: Tinokdoan ni Jesus an saiyang mga disipulo kun paano gigibohon an paghuhulit kan Kahadean. Malinaw na ipinaheheling kan saiyang mga instruksion na sinda nagharongharong, na pinalalakop an maogmang bareta. (Luc. 9:1-6; 10:1-7) Nagkakaipo nin pagkamoot sa Dios asin sa kapwa tangani na makapadagos sa pagharongharong kun kita napaaatubang sa pagkaindiperente asin pagtumang. Minsan siring, sa pagharongharong kita personal na nakikinabang huli ta an satong pagtubod nagigin mas marigon, an satong kombiksion nagigin mas makosog, asin an satong paglaom nagigin mas maliwanag.
3 Sa paghuhulit sa irarom kan pagdirehir kan mga anghel, dakol kitang nanompongan na nagugutom asin napapaha sa katotoohan. (Kap. 14:6) May mga kagharong na nagsabi na sinda haloy nang namimibi para sa tabang kan an sarong Saksi dumatong sa pinto ninda. Duwang Saksi asin sarong sadit na aki an naghaharongharong sa sarong isla sa Caribe. Kan magdesisyon an kaibang mga nasa edad na na sinda mapuli na, an aki nag-enot na sia sana pasiring sa masunod na pinto asin nagtoktok. Sarong hoben na babae an nagbukas kan pinto. Kan maheling ini kan mga nasa edad na, nagduman sinda asin kinaolay an babae. Pinalaog nia sinda asin ipinaliwanag na namimibi pa sana sia sa Dios na magsugo nin mga Saksi na matokdo sa saiya kan Biblia!
4 Paghuhulit sa mga Tinampo: Mantang depisil na marhay sa nagkapirang lugar na manompongan an mga tawo sa harong, an paghuhulit sa tinampo sarong epektibong paagi na makapatotoo sa mga tawo. Apuera kaini, dakol na tawo an nag-iistar sa may trangkang mga komunidad o mga edipisyo na guardiadong marhay kun saen dai kita makapaghaharongharong. Minsan siring, an satong apresasyon sa pagkamoot ni Jehova minomotibar kita na aprobetsaran an gabos na posibleng paagi na makontak an mga tawo na dara an mensahe kan Kahadean, kaiba an paghuhulit sa tinampo.—Tal. 1:20, 21.
5 Mga Pagdalaw Liwat: Huling hinahanap niato an mga “nakamamate kan saindang espirituwal na pangangaipo,” gusto niatong gibohon an makakaya niato na mapanigoan an pangangaipong iyan. (Mat. 5:3) Ini nagkakaipo na kita bumuelta tangani na mabaribihan an mga banhi nin katotoohan na itinanom niato. (1 Cor. 3:6-8) An sarong tugang na babae sa Australia nakapasakamot nin sarong pulyeto sa sarong babae na garo daing gayo nagpaheling nin interes. Minsan siring, nagprosegir an tugang na babae sa pagmamaigot na manompongan sia giraray sa harong. Kan manompongan nia sia sa katapustapusi, naaraman kan satong tugang na babae na pakalihis kan enot na pagdalaw, nagbakal an babae nin mamahalon na Biblia. Pinonan kan tugang na babae an pakipag-adal sa saiya!
6 Pamamayo nin mga Pag-adal sa Biblia: Ini an puedeng magin pinakamaogma asin pinakanakakokontentong kabtang kan satong ministeryo. Kanigoan na bendisyon na matabangan an mga tawo na makanood manongod ki Jehova, maheling sinda na naggigibo nin mga pagliliwat sa saindang buhay tangani na mapaogma sia, dangan maheling mismo an saindang Kristianong bautismo bilang simbolo kan saindang pagdusay sa Dios!—1 Tes. 2:20; 3 Juan 4.
7 Sa masunod na luwas, eestudyaran niato an dakol pang paagi na kita binebendisyonan huli sa pagpaheling nin apresasyon sa pagkamoot ni Jehova.