Magin Maigot sa “Pagtao nin Lubos na Patotoo”
1, 2. Ano an hinahangaan nindo manongod sa pagmansay ni Pablo sa paghuhulit kan maogmang bareta, asin paano niato maaarog an saiyang halimbawa sa “pagtao nin lubos na patotoo”?
1 Arog ni Jesus asin dakol na iba pang fiel na lingkod kan suanoy, si apostol Pablo sarong maigot na parahulit kan maogmang bareta, na ‘nagtatao nin lubos na patotoo’ ano man an kamugtakan. Dawa kan nakabilanggo sa sadiring harong, “maboot niang inaako an gabos na nagduruman sa saiya, na naghuhulit kan kahadean nin Dios sa sainda asin itinotokdo an mga bagay manongod sa Kagurangnan na si Jesu-Cristo na may lubos na katalingkasan nin pagtaram.”—Gibo 28:16-31.
2 Kita man puedeng magin maigot sa “pagtao nin lubos na patotoo” sa gabos na panahon. Kaiba dian an pagpapatotoo sa mga tawo na nanunuparan niato sa mga pagbiahe pasiring sa mga asamblea asin kombension o sa panahon nin mga pagbakasyon.—Gibo 28:23; Sal. 145:10-13.
3. Paano niato malilikayan na an satong impormal na pagpapatotoo magin sanang insidental na paghihingoa?
3 Insidental o Impormal na Pagpapatotoo? Igwa daw nin pagkakalaen? Igwa. An sarong bagay na insidental nangyayari na nagkanorongod sana o dai tinutuyo, na garo baga dai plinano o bakong gayong mahalaga. Bako nanggad arog kaiyan an satong ministeryo. Siring kan nagin totoo ki Pablo, mahalaga nanggad sa sato an pagpamuraway sa Dios paagi sa satong pagpapatotoo, asin maninigo na magin intension niato na magpatotoo sa ano man na kamugtakan na angay mantang kita nasa mga pagbiahe ngonyan na tig-init. Minsan siring, an paagi nin pagdolok niato sa iba tama sanang sabihon na impormal—an boot sabihon, pamugtak an boot, makiamigo, asin natural. An pamamaaging ini puedeng magbunga nin mararahay na resulta.
4. Ano an nagpangyari ki Pablo na makapagpatotoo sa saiyang dinadagosan?
4 Mag-andam na Magpatotoo: Kinaipuhan ni Pablo na gumibo nin mga oportunidad tanganing makapagpatotoo mantang nabibilanggo sa sadiring harong sa Roma. Sa saiyang dinadagosan, nagsadiring boot sia na imbitaran sa saiyang harong an lokal na mga namomoon na Judio. (Gibo 28:17) Dawa ngani igwa nin Kristianong kongregasyon sa Roma, naaraman ni Pablo na an komunidad nin mga Judio sa siudad na iyan mayong gayo nin aram manongod sa Kristianong pagtubod. (Gibo 28:22; Roma 1:7) Dai sia nagpogol sa “pagtao nin lubos na patotoo” manongod ki Jesu-Cristo asin sa Kahadean nin Dios.
5, 6. Ano an mga oportunidad niato sa pagpapatotoo nin impormal, asin anong mga pag-andam an magigibo niato tanganing magibo iyan nin epektibo?
5 Isipon an gabos na tawo na tibaad makakaolay nindo sa saindong mga pagbiahe na dikit sana an aram manongod sa Mga Saksi ni Jehova. Tibaad dai ngani ninda aram na nag-aalok kita nin daing bayad na mga pag-adal sa Biblia sa harong. Magin listo sa mga oportunidad na makapagpatotoo sa mga nanonompongan nindo mientras na nagbibiahe, nagpapahingalo sa mga pondohan, nagpapagasolina, namamakal, nagdadagos sa mga otel, nagkakakan sa mga restawran, nakasakay sa pampublikong sasakyan, asin iba pa. Determinaran antes pa kun ano an puede nindong sabihon tanganing maponan an pag-oolay asin makapagpatotoo nin halipot. Tibaad sa mga aldaw na maabot puede kamong magpraktis paagi sa pagpatotoo nin impormal sa saindong mga kataed, paryente, katrabaho, asin iba pang kamidbid.
6 Mangangaipo kamo nin mga publikasyon na gagamiton sa pagpapatotoo nin impormal. Arin na mga publikasyon? Puede nindong gamiton an pulyetong Ano Gusto Nindong Makaaram Pa nin Orog Manongod sa Biblia? Itampok an enot na limang parapo, kun saen itinao an manlaenlaen na dahelan na basahon an Biblia. Ipaheling an kupon na nasa likod para sa paghagad nin daing bayad na pag-adal sa Biblia sa harong. Kun nakakanompong kamo nin tawong naghihimate, ialok an brosyur na Kahagadan. Bilang pag-antisipar kun makanompong kamo nin mga tawo na iba an lenguahe, darahon an pulyetong Good News for All Nations. An pahina 2 nagpapaliwanag kun paano gagamiton ini sa pagpapatotoo. Kun nagbibiahe sa sadiring sasakyan, tibaad mahimo nindo na magdara nin pirang iba pang pundamental na publikasyon para duman sa mga nagpapaheling nin tunay na interes sa mensahe kan Kahadean.
7, 8. Anong patanid manongod sa satong personal na itsura asin gawe-gawe mantang nagbibiahe asin nasa panahon nin paglibang an maninigo niatong himateon?
7 Tawan nin Atension an Saindong Itsura Asin Gawe-gawe: Kaipuhan na seguradohon niato na an satong gawe-gawe saka an satong paggubing asin pag-alinyar dai magtatao sa iba nin salang impresyon o magin dahelan na ‘libakon’ ninda an organisasyon ni Jehova. (Gibo 28:22) Aplikado ini bako sanang sa panahon na nag-aatender nin mga asamblea o kombension kundi patin kun nagbibiahe asin sa panahon nin paglibang. An Torrengbantayan na Agosto 1, 2002, pahina 18, parapo 14 nagpatanid: “An satong itsura maninigo na bakong mapagpasikat, palaen an estilo, nakapupukaw, garo kinulang nin tela, o masyadong sunod sa moda. Dugang pa, maninigo kitang maggubing sa paagi na nagpapabanaag nin ‘reberensia sa Dios.’ Dapat iyan na pag-isipan, bako daw? An kalabot dian bakong paggubing sana nin angay kun nag-aatender sa mga pagtiripon kan kongregasyon [o asamblea] dangan dai na nagmamaan sa ibang mga panahon. An satong personal na itsura maninigo na pirmeng magpabanaag nin pagigin kagalanggalang asin may onra huli ta kita mga Kristiano asin ministro sa laog nin 24 oras.”—1 Tim. 2:9, 10.
8 Maninigo kitang maggubing na may kabinian asin dignidad. Kun an satong itsura asin gawe-gawe pirmeng nagpapabanaag kan satong pagtubod sa Dios, nungka kitang makakamateng napopogolan na magpatotoo nin impormal huling an satong personal na itsura bakong kawiliwili.—1 Ped. 3:15.
9. Anong kapangganahan sa pagpapatotoo an naeksperyensiahan ni Pablo sa Roma?
9 Mabunga an Impormal na Pagpapatotoo: Durante kan duwang taon na pagkabilanggo ni Pablo sa sadiring harong sa Roma, naheling nia an mararahay na resulta sa saiyang mga paghihingoang makapagpatotoo. Ibinareta ni Lucas na “an nagkapira nagpoon na tumubod sa mga bagay na isinabi.” (Gibo 28:24) Inebalwar mismo ni Pablo an pagigin epektibo kan saiyang “pagtao nin lubos na patotoo” kan sia sumurat: “An mga bagay na nangyari sa sako orog pang nakapalakop kan maogmang bareta imbes na kabaliktaran, mala ta an sakong mga gapos nahayag sa publiko mapadapit ki Cristo sa tahaw kan gabos na Bantay sa Pretorio asin sa gabos na iba pa; asin an kadaklan na tugang sa Kagurangnan, huling napakosog an boot sa sakong mga gapos, nagpapaheling nin orog pang kosog nin boot na itaram an tataramon nin Dios na dai nin takot.”—Fil. 1:12-14.
10. Anong kapangganahan sa pagpapatotoo an naeksperyensiahan nin mag-agom kan nakaaging tig-init?
10 Kan nakaaging tig-init, pagkatapos nin sarong aldaw na pag-atender sa pandistritong kombension, an sarong mag-agom nagkaigwa nin mabungang impormal na pagpapatotoo sa sarong serbidora na naghapot manongod sa saindang badge card sa kombension. Ipinaliwanag ninda sa saiya an manongod sa kombension pati an manongod sa paglaom na itinatao kan Biblia para sa ngapit kan katawohan. Itinao ninda sa saiya an pulyetong Ano Gusto Nindong Makaaram Pa nin Orog Manongod sa Biblia? asin ipinaliwanag an areglo nin libreng pag-adal sa Biblia sa harong. Sinabi kan babae na gusto nia na igwang dumalaw sa saiya, isinurat an saiyang ngaran asin adres sa likod kan pulyeto, asin hinagad sa mag-agom na gumibo nin areglo. Anong kapangganahan an puede nindong kamtan sa pagigin maigot sa “pagtao nin lubos na patotoo” sa lambang oportunidad?
11. Anong mga kualidad an maninigong pataluboon niato tanganing ikapalakop an maogmang bareta paagi sa “pagtao nin lubos na patotoo”?
11 Lubos na Ipalakop an Maogmang Bareta: Imahinara kun gurano kaogma si Pablo kan mabaretaan nia na an saiyang mga kapwa Kristiano inaarog an saiyang halimbawa nin kaigotan! Gibohon logod niato an bilog na makakaya niato tanganing ipalakop an maogmang bareta paagi sa paggamit kan lambang angay na okasyon na magpatotoo nin impormal manongod sa satong mga tinutubod na basado sa Biblia.
[Kahon sa pahina 3]
Mga Publikasyon na Kaipuhan sa Impormal na Pagpapatotoo
■ Ano Gusto Nindong Makaaram Pa nin Orog Manongod sa Biblia? (pulyeto)
■ Ano an Kahagadan sa Sato nin Dios? (brosyur)
■ Good News for All Nations (pulyeto)
■ Iba pang pundamental na mga publikasyon