Puede daw Nindong Pahiwason an Saindong Paglilingkod?

1. Ano an apuradong pangangaipo ngonyan sa ministeryo sa langtad, asin taano?

¹ Huling naobserbaran ni Jesus an interes na ipinaheling nin dakol dapit sa maogmang bareta kan Kahadean, ininstruksionan nia an saiyang mga disipulo na ‘makimaherak sa Kagurangnan kan anihon na magsobol nin mga paraani sa saiyang anihon.’ (Mat. 9:37, 38) Huli ta kita nasa huring kabtang na kan panahon nin pag-ani, an satong gibohon mas apurado pa ngani kisa kasuarin man. Nangangahulogan ini na maninigo niatong mapagngayongayong isipon kun paano kita mas lubos na makakapakikabtang sa ministeryo sa langtad.—Juan 14:13, 14.

2. Paano hinimate nin nagkapira an pangapodan na magkaigwa nin mas dakol na mga paraani sa langtad?

² Pinahiwas na Paglilingkod: Paagi sa paggiya asin tabang ni Jehova, nagin posible sa dakol na magpayunir. (Sal. 26:2, 3; Fil. 4:6) An nagkapira naggibo nin espesyal na paghihingoa na makapag-auxiliary payunir nin sarong bulan o labi pa durante kan taon. Nagin marahayon na paagi ini na mapahiwas an saindang ministeryo. Huli sa kaogmahan na namatean ninda sa pakikikabtang sa pribilehiong ini, pinag-isipan kan dakol sa sainda na magregular payunir.—Gibo 20:35.

3. Kun dati na kamong nakapagpayunir, ano an puede nindong mawoton na pag-isipan ngonyan?

³ Puede daw Kamong Magpayunir Giraray?: Kun dati na kamong nakapagpayunir, daing duda na may mga eksperyensia kamong dai malilingawan durante kan mga panahon na iyan. Mapagngayongayo na daw nindong pinag-isipan an posibilidad na magpayunir giraray? Tibaad dai na nakakaolang sa saindo an mga kamugtakan na nagin dahelan kan pagpondo nindo sa pagpapayunir. Tibaad nag-abot na an panahon tanganing maglaog giraray kamo sa espesyal na pribilehiong iyan.—1 Juan 5:14, 15.

4. Anong daing kaagid na oportunidad an bukas sa sato gabos?

⁴ An pag-aani nangyayari na nanggad ngonyan asin madali nang matapos. (Juan 4:35, 36) Siyasaton logod niato gabos an satong presenteng kamugtakan tanganing madeterminaran kun baga kaya niato na gumibo nin pagliliwat sa satong mga aktibidad sa aroaldaw tanganing pahiwason an satong pakikikabtang sa langtad. O kun talagang dai niato mapapahiwas an satong paglilingkod, puede daw kitang maghanap nin mga paagi na magin mas epektibo? (Mar. 12:41-44) Sarong pribilehio nanggad an bukas ngonyan sa gabos na an presenteng mga kamugtakan nagtotogot sa sainda na gamiton ni Jehova sa daing kaagid na gibohon na ini!—Sal. 110:3.