Mag-o-auxiliary Payunir daw Kamo sa Nobyembre o Disyembre?
1 Pinonan ni Jesus an kanigoan kahalagang gibohon na an ngapit nin gabos na katawohan nagdedepende sa resulta kaiyan. (Mat. 4:17) An gibohon na ini makaaabot sa kulminasyon kaiyan bago “an katapusan,” kun an mensahe kan Kahadean ‘ikinahulit na sa bilog na ineerokan na daga para sa pagpatotoo sa gabos na nasyon.’—Mat. 24:14.
2 Mantang harani na kitang marhay ngonyan sa katapusan, mas apretado an gibohon na ini kisa kasuarin pa man. Huli ta nakataya an buhay, an dai kinakaipuhan na pag-atraso puwedeng magkaigwa nin grabeng mga kaaabtan. Pinakosog kan areglo sa pag-auxiliary payunir an dakol na magin mas aktibo sa pag-otob kan apretadong gibohon na ini. Puwede daw kamong mag-auxiliary payunir sa Nobyembre o Disyembre?
3 Marahay na mga Bulan Para sa Pagpapayunir: Mantang an Nobyembre parateng igwa nin marahay na panahon pakatapos kan tig-oran, iyan marahay na panahon na horophoropon an pagpayunir. Siring man, ngonyan na taon an Nobyembre igwa nin limang Domingo, na makatatabang sa mga nagtatrabaho kun ordinaryong mga aldaw. Kadakol kan tibaad makahihimo na mag-auxiliary payunir sa Disyembre, ta ngonyan na taon an mga kombension mapoon sa ikaapat nang semana kan bulan. Siring man, kadakol sa satong mga hobenes an bakasyon sa eskuwelahan sa Disyembre.
4 Sa nakalihis na duwang taon nagkaigwa kita nin promedyong labi sa 5,000 na auxiliary payunir sa kada bulan digdi sa Pilipinas, na marahayon nanggad. Pero, kan Nobyembre nagkaigwa sana kita nin 2,658 auxiliary payunir, asin kan Disyembre 2,068 sana. Kaya boot niamong pakosogon an gabos na puwede na siyasaton an saindang mga kamugtakan tanganing maheling kun puwede sindang makapagpayunir. Taano ta dai ipakipag-olay an posibilidad na ini sa mga ninombrahan na asin humagad nin mga suhestion sainda?
5 Taano ta Pahihiwason an Satong Ministeryo? Iyo, taano ta pinahihiwas kan mga Saksi ni Jehova an saindang ministeryo imbes na humanap nin materyal na mga bentaha? Iyan huli ta boot nindang mag-omaw ki Jehova asin sabihon sa iba an dapit sa saiyang mga katuyohan. Aram ninda na “an kinaban maagi sana, . . . alagad an naggigibo kan kabotan nin Dios magdadanay sagkod lamang.” (1 Juan 2:17) Siring man, naggigibo sinda kaoyon sa saindang mga pamibi na an Kagurangnan kan anihon “magsobol nin mga paraani sa saiyang anihon.” (Mat. 9:37, 38) Bendisyonan logod ni Jehova an saindong mga plano na pahiwason an saindong personal na kabtang sa ministeryo sa Nobyembre asin Disyembre.