Puwede daw Kamong Maglingkod ki Jehova Bilang Payunir?
1 Sa saro sa “Mga Paradara nin Liwanag” na Pandistritong Kombension, naghapot an sarong espiker: “Puwede daw kamong magpayunir? Kamo daw mapayunir?” Sinabi nia na an mga hapot na ini mahalaga huli ta an Armagedon harani nang marhay, asin ginigibo kaini an paghuhulit na mas apurado kisa kasuarin pa man.—1 Cor. 7:29a.
2 Daing duwa-duwa na an pagpapayunir depisil na gibohon. Nangangaipo iyan nin pagdisiplina sa sadiri asin marahay na organisasyon. Minsan siring, an satong pagpapagal sa ministeryo “bakong daing kapakanan.” (1 Cor. 15:58) Masasabi daw an siring sa iba pang aktibidad na nakagagamit nin satong panahon asin kosog? An pagkamoot ki Jehova nakadadagka sa mga Kristiano na magin maigot sa paglilingkod sa saiya, asin ini nagpahiro sa dakol na lumaog sa pagpapayunir.—1 Juan 5:3; Kap. 4:11.
3 An dakol na hoben na lingkod ni Jehova na magraduwar pa sana sa haiskul nag-iisip nin odok sa boot manongod sa pagpapayunir. Iyan angay nanggad. Ano pang ibang karera an mas importante kisa sa bilog na panahon na ministeryo?—Mat. 6:33; 24:14.
4 Dinadagka daw nindong mga magurang an saindong mga aki na maglingkod sa bilog na panahon? Malinaw daw na nasasabotan kan saindong mga aki na boot nindo na gamiton ninda an saindang bilog na puso, kalag, isip, asin kosog sa kapakipakinabang na gibohon na ini? (Mar. 12:30) An dakol na hoben na parahayag nag-aandam kan saindang sadiri para sa pagriregular payunir paagi sa pakikakabtang bilang auxiliary payunir sa gabos na oportunidad durante kan saindang pag-eskuwela. Siertong an siring na debosyon ki Jehova nakapaoogma sa saiyang puso!—Tal. 27:11.
5 Siyempre, bakong gabos nasa kamugtakan na itinotogot an paglilingkod bilang payunir. Pero, baga man may agom o daing agom, hoben o gurang na, hinorophorop na daw nindo na may kaibang pamibi an paglilingkod ki Jehova bilang payunir? (Col. 3:23) Kadakol nin hoben na mag-agom na nagmamaigot na mapahiwas an saindang ministeryo tanganing an saro o pareho makapayunir.
6 Kun dai nindo kaya na magregular payunir sa presente, puwede daw kamong maglingkod bilang auxiliary payunir? Posible na an dakol na parahayag sa saindong kongregasyon nagpaplano na gibohon iyan sa Abril asin Mayo. Puwede daw kamong umiba sainda? Minsan ngani an gabos na maimbod na lingkod ni Jehova nag-aako nin kadakol na bendisyon, naghahalat an dugang pang mga bendisyon sa mga nakagagamit nin mas dakol na panahon sa paglilingkod sa Kahadean na naghahanap nin mga arog-karnero.—Gibo 20:35.