Dakol Pang Tugang na Lalaki an Kaipuhan sa Paglilingkod Bilang Payunir
1 Dinagka kita ni Pablo na ‘danay na dakol an gibohon sa gibohon kan Kagurangnan.’ (1 Cor. 15:58) Para sa dakol, nangangahulogan ini nin paglaog sa paglilingkod bilang payunir. Kan peryodo poon Setyembre, 1995 sagkod Marso, 1996, labing 1,200 an nakadagdag sa grupo nin mga payunir sa Pilipinas! Daing duwa-duwa na dakol pa an malaog poon sa Setyembre 1, 1996, an pagpoon kan bagong taon nin paglilingkod!
2 Sa presente an dakulang bilang nin mga naglilingkod bilang payunir sa nasyon na ini mga tugang na babae. (Sal. 68:11) Kanigoan an magigin kagayagayahan kan kongregasyon kun dakol pang tugang na lalaki an makaiiba sa grupo nin pambilog na panahon na mga lingkod! (Sal. 110:3) Nasasabotan nanggad na an dakol na tugang na lalaki kaipuhan na mag-asikaso kan magabat na sekular asin pampamilyang mga obligasyon. An iba man mahigos na nag-aasikaso kan espirituwal na mga pangangaipo kan kongregasyon. Pinahahalagahan niato an mga lalaking ini na naghihingoa sa kapakanan kan Kahadean.—1 Tim. 4:10.
3 Dawa siring, puede daw na maglingkod bilang payunir an mas dakol sa saindo mga tugang na lalaki? Kun nagpapayunir an saindong agom na babae, puede daw nindo siang ibanan? Kun kamo retirado na, dai daw kamo maoyon na mayo na nin orog pang nakakokontentong paagi na magamit an saindong panahon kisa sa pambilog na panahon na ministeryo? Kun katatapos pa sana nindong maghaiskul, odok sa boot asin mapagngayongayo na daw nindong inisip-isip an paglaog sa pribilehiong pagpapayunir bilang sarong tangga pasiring sa dagdag pang mga pribilehio siring baga kan paglilingkod sa Bethel?—Efe. 5:15-17.
4 An sarong tugang na lalaki ipinabakal an saiyang maoswag na negosyo asin kuminua nin por orang trabaho tangani na makapayunir sia. Paagi sa saiyang marahay na pangengenot, tolo sa apat niang aki an nagin payunir pakatapos tolos ninda sa haiskul. An ikaapat galagang umiba sa sainda. An tugang na lalaking ini asin an saiyang pamilya mayaman na binendisyonan.
5 Bukas an Sarong Dakulang Tata: An paglilingkod bilang payunir puedeng magbukas nin “sarong dakulang tata na pasiring sa gibohon.” (1 Cor. 16:9) An mga tugang na lalaki na payunir puedeng magamit na marhay sa kongregasyon. An maigot na aktibidad sa langtad nakadudugang sa saindang espirituwal na kualidad asin nakakokontribwir sa saindang teokratikong pag-oswag. An pagpapayunir puedeng magbukas kan dalan pasiring sa dugang pang mga pribilehio nin paglilingkod. Puede iyan na magin sarong tangga sa paglilingkod sa Bethel. Pakatapos kan enot na taon nin pagpapayunir, yaon an bendisyon na umatender sa Paadalan sa Paglilingkod Bilang Payunir. Puedeng pag-aaboton nin mayong agom na mga ministeryal na lingkod asin kamagurangan na mag-adal sa Paadalan sa Ministeryal na Pagsasanay. Iyo, an ministeryong pagpapayunir nagbubukas kan tata pasiring sa mas darakulang pribilehiong ini nin paglilingkod sa organisasyon ni Jehova.
6 An mga tugang na lalaki na ikaaareglo an saindang mga aktibidad tangani na makapakikabtang sa paglilingkod bilang regular payunir puedeng makaeksperyensia kan mas dakulang kaogmahan na minagikan sa nadagdagan na pagtao.—Gibo 20:35.