Gusto daw Nindong Gumibo nin Orog Pa?
1 Iinagid ni Jesus an Kahadean sa daing kaagid sa halaga na kayamanan. (Mat. 13:44-46) An gibohon na pagpalakop kan bareta kan Kahadean saro man na mahalagang kayamanan. An ministeryong ini maninigo na pinakaprioridad sa satong buhay, dawa kun kalabot sa lubos na pakikikabtang dian an sarong sokol nin pagdehar sa sadiri. (Mat. 6:19-21) Gusto daw nindong gumibo nin orog pa sa paglilingkod sa Kahadean?
2 Estudyaran an mga Kaipuhan na Ini: Nagkapirang bagay an kaipuhan tanganing mapahiwas an satong personal na pakikikabtang sa ministeryo: (1) pagigin determinado na enoton sa buhay an intereses kan Kahadean (Mat. 6:33); (2) pagsagibo nin pagtubod asin pagsarig ki Jehova (2 Cor. 4:1, 7); (3) paghagad nin tabang sa Dios paagi sa sinsero asin daing ontok na pamimibi (Luc. 11:8-10); (4) pagsagibo asin paghiro kaoyon kan satong mga pamibi.—Sant. 2:14, 17.
3 Mga Paagi nin Pagpahiwas kan Satong Ministeryo: Kita gabos puedeng magbugtak kan pundamental na pasohan na regular na paggamit nin panahon sa ministeryo kada bulan. Alagad napag-isipan na man daw nindo an pag-aprobetsar sa lambang oportunidad na magpatotoo nin impormal, pagmamaigot na gibohon na mas makahulogan an saindong mga pag-atubang, pagpaoswag sa pagigin epektibo kan mga pagdalaw liwat nindo, asin paghihingoang mamayo nin progresibong mga pag-adal sa Biblia? Makapag-o-auxiliary o regular payunir daw kamo o makapaglilingkod kun saen mas dakula an pangangaipo? Kun kamo bautisadong tugang na lalaki, puede daw nindong hingoahon na makualipikar bilang ministeryal na lingkod o magurang sa kongregasyon? (1 Tim. 3:1, 10) Puede daw nindong pahiwason an saindong ministeryo paagi sa pag-aplay sa paglilingkod sa Bethel o sa Paadalan sa Ministeryal na Pagsasanay?—Luc. 10:2.
4 An sarong tugang na lalaki na bilog na panahon an trabaho asin dakol na oras an ginagamit sa mga aktibidad sa isport inenkaminar na magregular payunir. Sia nagpoon na mag-auxiliary payunir dangan inareglar an mga kamugtakan nia tangani na lumaog sa bilog na panahon na ministeryo. Sa huri nag-atender sia sa Paadalan sa Ministeryal na Pagsasanay, na nakatabang na andamon sia para sa saiyang asignasyon sa presente bilang sarong paraataman sa sirkito. Sia naoogmang marhay na hinimate nia an pamparigon sa boot na inako nia, asin sia kompiado na sia mas maogma bilang resulta kan saiyang desisyon na gumibo nin orog pa sa paglilingkod sa Kahadean.
5 Binebendisyonan ni Jehova an mga nagpepresentar. (Isa. 6:8) Dai pagtogotan an ano man na makaolang sa saindo sa pagpahiwas kan saindong ministeryo asin pagkamit nin orog pa nganing satispaksion asin kaginhawahan bilang resulta.