Pag-auxiliary Payunir—Sarong Pinto Pasiring sa Mas Dakulang Aktibidad
1 Galaga niatong hinahalat an bagong palakaw na ipinanuga ni Jehova, na an gabos niatong panahon asin kosog gagamiton na sa paglilingkod ki Jehova!
2 Alagad dawa ngonyan, an banwaan ni Jehova na nagdadakol nakananamit na sa mga kagayagayahan sa paglilingkod ki Jehova nin bilog na panahon. Dakol an naglaog na sa pagpapayunir. Sinda nangangatanosan na sa paaging ini sinda nagigin mas masibot sa paglilingkod ki Jehova. Boluntad nindang iprinisentar an saindang sadiri.—Sal. 110:3.
3 Sa pag-antisipar sa mas dakulang aktibidad na natatagama sa sato sa bagong palakaw, dakol an madonong na ginagamit an mga tangga na nagpapangyari sainda na progresibong dugangan an saindang paglilingkod sa Kahadean. An saro sa mga ini iyo an pag-auxiliary payunir. An dakol na naglaog na sa gibohon na ini naheling “na si Jehova marahay.” (Sal. 34:8) Kaya nagsumitir sinda nin ikaduwang aplikasyon sa pag-auxiliary payunir na may tsek sa kahon na nagpaparisa na gusto nindang maglingkod nin padagos bilang siring sagkod na may ibang notisya. An pagkakamit nin kabatidan sa gradong ini nin gibohon nakatabang sa dakol na makapag-andam para sa pagregular payunir.
4 An minasunod na pirang bulan nagtatao nin ekselenteng mga oportunidad na mapahiwas niato an satong ministeryo. Puwede daw kamong mag-auxiliary payunir sa Oktubre asin Nobyembre, pati sa Disyembre bago pumoon an mga pandistritong kombension? Kun dai pa nindo naprobaran an gibohon na ini, dinadagka mi kamo na gibohon iyan sa mga bulan na ini. Maheheling nindo na iyan nakapagpapaoswag na eksperyensia. Dakulang kagayagayahan an manonompongan sa paghiras sa iba kan mahahalagang katotoohan na nanodan nindo. Puwede nindong bukasan sa ibang arog-karnero an maliwanag na paglaom nindo sa ngapit. An iba sa kongregasyon mapakokosog kan saindong halimbawa, asin tibaad an iba sainda mapahiro na ‘ipamahala ki Jehova an saindang mga gibo’ asin ‘maparigon’ an saindang mga plano sa ngapit.—Tal. 16:3.
5 An mga dai pa bautisado pero nakikakabtang na sa ministeryo mainit na iniimbitaran na horophoropon kun paano ninda madudugangan an saindang Kristianong aktibidad. Puwede sindang umiba sa mahihigos na auxiliary payunir o regular payunir asin sa siring magkamit nin mahalagang kabatidan. Isip-isipon kun guranong pagpakinosogan an mangyayari kun an mga bagohan asin may kabatidan nag-iiba sa ministeryo!—Roma 1:12; Isa. 40:30, 31.
6 An bendisyon ni Jehova nakapaooswag sa sato sa espirituwal asin nagpapahiro sato na itao an bilog niatong makakaya sa paglilingkod sa saiya. An paghihingoa logod niato sa masunod na pirang bulan makapaogma ki Jehova mantang kita nag-aandam na maglingkod sa saiya sagkod lamang.