Hapot
◼ Ano an maninigong isaisip mapadapit sa pagbasa kan mga parapo sa mga pagtiripon?
An kadaklan na oras na itinagama para sa Pag-adal sa Torrengbantayan asin sa Pag-adal sa Libro kan Kongregasyon ginagamit sa pagbasa kan mga parapo. Ini nangangahulogan na an tugang na lalaki na iinasignar na parabasa igwa nin magabat na paninimbagan bilang paratokdo. Dapat siang bumasa sa paagi na ‘magtatao nin kahulogan’ sa materyal tangani na an mga nagdadangog bako sanang masabotan iyan kundi mamomotibar man na humiro. (Neh. 8:8) Huli kaini, kaipuhan kan parabasa na mag-andam na marhay para sa saiyang asignasyon. (1 Tim. 4:13; helingon an leksion 6 kan School Guidebook.) Uya an nagkapirang kaipuhan na marhay para sa makahulogan na pagbasa sa publiko.
Gumamit nin Tamang Pagdodoon: Determinaran nin patienot kun arin na mga tataramon an kaipuhan na idoon tangani na ikapaabot an tamang pakasabot.
Pronunsiaron nin Tama an mga Tataramon: Kaipuhan an tamang pagpronunsiar asin klaradong pagtaram kun boot na masabotan kan mga nagdadangog an mga ekspresyon sa publikasyon. Helingon sa diksionaryo an bakong pamilyar na mga tataramon.
Magtaram na May Kosog nin Boses Asin Entusiasmo: An entusiastikong pagtaram nakapupukaw nin interes, napahihiro an mga emosyon, asin namomotibar an nagdadangog.
Magin Mainit Asin Garo Nakikipag-olay: An pagigin natural kadungan kan abilidad sa pagtaram. Paagi sa pag-andam asin pag-ensayo, puedeng magin relaks an parabasa, asin an resulta magigin kawiliwili imbes na nakasusumo asin nakapapagal.—Hab. 2:2.
Basahon an Materyal Siring sa Pagkasurat: An mga nota sa ibaba siring man an impormasyon sa mga parentesis o braket binabasa man na makosog kun liniliwanag kaiyan an nasusurat na mga tataramon. An solamenteng mga iksepsion iyo an mga reperensia na nagsasabi sana kan pinagkuanan. An nota sa ibaba maninigong basahon kun itinotokdo iyan sa parapo, na iiniintrodusir iyan paagi sa pagsabi nin: “An nota sa ibaba nagsasabi . . . ” Pakabasaha kaiyan, ipadagos na an natatada pa kan parapo.
Kun marahay an pagbasa sa publiko, saro iyan sa mga paagi na ‘matotokdoan niato an iba na otobon an gabos na bagay na ipinagboot’ kan satong Dakulang Paratokdo.—Mat. 28:20.