Pagigin Natural

AN PAGTARAM sa natural na paagi nakatatabang sa saindo na makua an kompiansa nin iba. Magkokompiar daw kamo sa sinabi nin saro na nagtaram sa saindo sa likod nin sarong maskara? Mas magkokompiar daw kamo kun an lalauogon sa maskara mas guapo kisa sadiring lalauogon kan nagtataram? Dai gayod. Kaya imbes na gumamit nin balatkayo, gumawe kamo nin normal.

An pagigin natural dai maninigong ipagkamalo sa kadaihan nin pag-iingat. Bakong tama an maluyang gramatika, salang pronunsiasyon, asin pugong na pagtaram. Maninigo man na likayan an tataramon sa kalye. Gusto niato pirme na magpaheling nin angay na dignidad, sa satong pagtaram sagkod sa satong hiro. An saro na nagpapaheling nin siring na pagigin natural bakong sobra kapormal ni sobra kainteresadong gulaton an iba.

Sa Ministeryo sa Langtad. Kun nagdadangadang kamo sa sarong harong o dinodolok nindo an saro sa pampublikong lugar sa katuyohan na magpatotoo, ano ninenerbios kamo? An kadaklan sa sato iyo, alagad mas sige-sige an pagmateng iyan para sa nagkapira kisa para sa iba. Huli sa tension an boses tibaad magin garo puersado o nagkikibigkibig, o tibaad mahayag an nerbios sa alanganon na mga hiro kan mga kamot o kan payo.

Tibaad magkaigwa kan problemang ini an sarong parahayag huli sa dakol na dahelan. Tibaad iniisip nia an itatao niang impresyon o iniisip-isip kun baga magigin mapanggana an saiyang pag-atubang. Bakong pambihira an mga ini, alagad minalataw an mga problema kun tinatawan nin sobrang atension an siring na mga bagay. Kun kamo ninenerbios bago kamo makikabtang sa ministeryo, ano daw an makatatabang? An maingat na pag-andam asin odok na pamibi ki Jehova. (Gibo 4:29) Isip-isipa an dakulang pagkaherak ni Jehova sa pag-agda sa mga tawo na magkamit nin sangkap na salud asin buhay na daing sagkod sa Paraiso. Isip-isipa an mga hinihingoa nindong tabangan asin an pangangaipo ninda na madangog an maogmang bareta.

Girumdomon man na an mga tawo may libreng kabotan, kaya puede na magsalang akoon ninda o sayumahan an mensahe. Arog man kaiyan kan si Jesus maghulit sa suanoy na Israel. An asignasyon sana sa saindo maghulit. (Mat. 24:14) Dawa kun dai kamo pinatataram nin mga tawo, an mismong presensia nindo magpapatotoo. Nagin kamong mapanggana ta pinabayaan nindo na gamiton kamo ni Jehova sa pag-otob sa saiyang kabotan. Sa mga okasyon na kamo nagkakaoportunidad na magtaram, kumusta daw an saindong pagtaram? Kun makakanood kamong isentro an saindong isip sa mga pangangaipo nin iba, magigin nakaaakit asin natural an saindong pagtaram.

Sa pagpatotoo, kun kamo magawe asin mataram nin arog kan ginigibo nindo aroaldaw, mapapamugtak kaini an boot kan mga naghihinanyog sa saindo. Tibaad magin mas andam pa ngani sindang umako kan mga ideyang sono sa Kasuratan na gusto nindong ipaabot sa sainda. Imbes na magdiskurso sa sainda, kaolayon sinda. Magin mainamigo. Magpaheling nin interes sa sainda, asin akoon an saindang mga komento. Siempre, kun hinahagad kan lenguahe o lokal na kultura an nagkapirang protokol sa pagpaheling nin paggalang kun nakikipag-olay sa mga dai kamidbid, bobooton nindong otobon an mga ini. Alagad puede kamong pirmeng maghuyom.

Sa Plataporma. Kun kamo nagtataram sa sarong grupo, parateng pinakamarahay an natural, garo sana nakikipag-olay na estilo nin pagtaram. Siempre, kun dakol an mga nagdadangog, kaipuhan na kosogan nindo an saindong boses. Kun poprobaran nindong tuomon an saindong pahayag o kun sobra kadetalyado an saindong nota, sobra gayod an interes nindo sa eksaktong pagkasabi kan mga bagay. Importante an tamang pagkasabi, alagad kun sobra an atension na itinatao dian, an pagpahayag nagigin pormalon. Nawawara an pagigin natural. Maninigo na maingat na isipon antes pa an saindong mga ideya, alagad itao an kadaklan nindong atension sa mga ideya, bakong sa eksaktong pagkasabi.

Arog man kaiyan kun kamo iniinterbio sa pagtiripon. Mag-andam na marhay, alagad dai pagbasahon o pagtuomon an saindong mga simbag. Itaram iyan na may natural na modulasyon tangani na basta na sana minaluwas sa nakaaakit na paagi an saindong mga komento.

Dawa an kawiliwiling mga kualidad sa pagtaram na nasosobrahan man puedeng magin bakong natural para sa mga nagdadangog. Halimbawa, maninigo kamong magtaram nin klaro asin gumamit nin tamang pronunsiasyon alagad bako man na sagkod sa punto na an saindong pagtaram magin nang pormalon o artipisyal. An mga mustrang enpatiko o deskriptibo, kun ginigibo nin toltol, makatatao nin buhay sa saindong pahayag, alagad an mga mustrang tuog o sobra irarayo an atension sa saindong sinasabi. Gumamit nin igong kosog nin boses, alagad hingoahon na dai magin makosogon. Marahay na kun minsan magin entusiastiko sa saindong pagpahayag, alagad maninigong likayan nindo an pagigin mahawhaw. An modulasyon, entusiasmo, asin pagsaboot maninigong gamiton sa paagi na dai nag-aapod nin atension sa saindong sadiri o nagigin dahelan na dai na logod mapamugtak an mga nagdadangog sa saindo.

An nagkapira natural na eksakto kun magtaram, dawa kun dai sinda nagpapahayag. An iba mas pangaroaldaw na tataramon an gamit sa saindang pagtaram. An importante magtaram nin toltol aroaldaw asin gumawe na may Kristianong dignidad. Dangan kun nasa plataporma, mas pasil kamong mataram asin magawe na nakaaakit an pagigin natural.

Kun Nagbabasa sa Publiko. An pagigin natural sa pampublikong pagbasa nagkakaipo nin paghihingoa. Tanganing magibo iyan, aramon kun arin an prinsipal na mga ideya sa babasahon nindo, asin obserbaran kun paano linilinaw an mga ini. Isaisip nin malinaw an mga ini; ta kun dai, mga termino sana an babasahon nindo. Berepikaron an pronunsiasyon nin mga terminong bakong pamilyar. Ensayohon an pagbasa nin makosog tangani na makua an tamang punto sa pagtaram asin magrupogrupo an mga termino sa paagi na malinaw na nagpapahayag kan mga ideya. Orootrohon iyan sagkod na suelto na an saindong pagbasa. Kabisadohon na marhay an babasahon nindo tangani na kun iyan basahon nindo nin makosog, an pagbasa nindo magin garo animadong orolay. Iyan an pagigin natural.

Siempre, an kadaklan niatong pampublikong pagbasa sa satong mga publikasyon na basado sa Biblia. Apuera sa mga asignasyon na magbasa sa Teokratikong Paadalan sa Pagmiministro, nagbabasa kita nin mga teksto sa ministeryo sa langtad asin kun nagpapahayag hale sa plataporma. An mga tugang na lalaki inaasignaran na magbasa kan materyales na pinag-oolayan sa Pag-adal sa Torrengbantayan asin sa Pag-adal sa Libro kan Kongregasyon. An nagkapirang tugang na kualipikado inaasignaran na magbasa nin mga manuskrito sa mga nagdadangog sa kombension. Baga man Biblia o ibang materyales an binabasa nindo, basahon an mga kabtang na may mga pankotar sa paagi na nagpapangyaring magin buhay an materyales. Kun dakol na personahe an kinokotar, medyo liwaton an saindong boses para sa kada saro. Patanid: Dai magin sobra kamadrama, kundi tawan nin buhay an pagbasa sa natural na paagi.

An pagbasa na natural garo sana nakikipag-olay. Iyan bakong artipisyal kundi may kombiksion.