Nakapakokosog Asin Positibo

AN MENSAHE na isinugo sa sato na ihulit maogmang bareta. Sinabi ni Jesus: “Sa gabos na nasyon an maogmang bareta kaipuhan na ikahulit nguna.” (Mar. 13:10) Si Jesus mismo an nagtao kan halimbawa paagi sa pagpalataw na marhay kan “maogmang bareta kan kahadean nin Dios.” (Luc. 4:43) An ihinulit kan mga apostol inaapod man na “maogmang bareta nin Dios” asin “maogmang bareta manongod sa Cristo.” (1 Tes. 2:2; 2 Cor. 2:12) An siring na mensahe nakapakokosog asin positibo.

Kaoyon kan pagpahayag nin “daing katapusan na maogmang bareta” kan “anghel na naglalayog sa tahaw kan langit,” sinasadol niato an mga tawo: “Matakot kamo sa Dios asin pamurawayon sia.” (Kap. 14:6, 7) Sinasabi niato sa mga tawo saen man an manongod sa tunay na Dios, ngaran nia, marahayon na mga kualidad nia, makangangalas na mga gibo nia, mamomoton na katuyohan nia, pagkaigwa niato nin paninimbagan sa saiya, asin kahagadan nia sa sato. Kaiba sa maogmang bareta an bagay na lalaglagon ni Jehova Dios an mga maraot, na naglalapastangan sa saiya asin rinaraot an buhay para sa ibang tawo. Alagad bako niatong paninimbagan na husgaran an mga tawo na satong hinuhulitan. An odok niatong kamawotan iyo na pinakadakol na mapupuede an maghimate sa mensahe kan Biblia tangani na iyan talagang magin maogmang bareta para sa sainda.​—Tal. 2:20-22; Juan 5:22.

Limitaran an Negatibong mga Topiko. Siempre, may negatibong mga aspekto an buhay. Dai niato pinipirong an satong mga mata sa mga ini. Tanganing maponan an orolay, puede nindong palatawon an sarong problema na nasa isip kan mga yaon sa saindong teritoryo asin tokaron iyan sa halipot. Alagad parate na kadikit sana an pakinabang sa halawigon na pagtokar kaiyan. An mga tawo pirme na sanang nakakadangog nin makamomondong mga bareta, kaya an pagtaram manongod sa mga bagay na dai nakaoogma tibaad magin dahelan na pintoan ninda magsalang an saindang pinto o an saindang talinga. Sa kapinonan pa sana kan pag-oolay nindo, hingoahon na darahon an atension sa nakagiginhawang mga katotoohan na yaon sa Tataramon nin Dios. (Kap. 22:17) Kun siring, dawa kun habo kan tawo na ipadagos an orolay, may nawalat na kamo sa saiya na nakapakokosog na iisip-isipon. Tibaad huli kaini sia magin mas andam na maghinanyog sa ibang okasyon.

Sa siring man na paagi, kun inimbitaran kamong magpahayag, dai pagpabahaan nin negatibong impormasyon an mga nagdadangog huli sana ta dakolon kaiyan an makukua. Kun an nagpapahayag haloyon na nagtataram manongod sa pagkukulang nin mga tawong namamahala, mga bareta nin krimen asin kadahasan, asin nakasusustong pagigin lakop nin inmoralidad, iyan puedeng makapaluya sa boot. Iintrodusir sana an negatibong mga aspekto nin sarong tema kun iyan may kapakipakinabang na katuyohan. An dikit sana kan siring na materyales puedeng magdoon na napapanahon an saindong pahayag. Tibaad isabi man kaiyan an mayor na mga bagay na nagkokontribwir sa sarong situwasyon asin sa siring magagamit na patunay kun taano ta praktikal an solusyon na sinasabi sa Biblia. Kun posible, magin espesipiko na dai man pinahahaloy an pagtaram manongod sa mga problema.

Parate na bakong posible ni marahay na haleon an gabos na negatibong materyales sa pahayag. An angat nasa pag-atubang kan magkasalak na positibo asin negatibo sa paagi na an kabilogan na epekto positibo. Tanganing magibo ini, dapat na determinaran nindo kun ano an iiiba, kun ano an hahaleon, asin kun saen ibubugtak an pagdodoon. Sa Sermon sa Bukid, sinadol ni Jesus an mga naghihinanyog sa saiya na likayan an nan-aaprobetsar na mga ugale kan mga eskriba asin Fariseo, asin nagsitar sia nin pirang halimbawa tanganing iilustrar an punto. (Mat. 6:1, 2, 5, 16) Minsan siring, imbes na maghaloy sa negatibong mga halimbawa kan mga namomoon na idto sa relihion, idinoon ni Jesus an pagsabot sa tunay na mga dalan nin Dios asin pamumuhay segun dian. (Mat. 6:3, 4, 6-15, 17-34) Positibong-positibo an nagin epekto.

Papagdanayon na Positibo an Tono. Kun naasignaran kamong magpahayag sa saindong kongregasyon manongod sa sarong aspekto nin Kristianong aktibidad, hingoahon na magin nakatatabang imbes na tatsador. Seguradohon na ginigibo nindo an iineenkaminar nindong gibohon nin iba. (Roma 2:21, 22; Heb. 13:7) Pabayaan na pagkamoot, bakong pagkauyam, an magmotibar sa saindong sinasabi. (2 Cor. 2:4) Kun kompiado kamo na gusto kan mga kapagtubod nindo na panigoan si Jehova, ipababanaag kan saindong sinasabi an pagkompiar na iyan, asin ini magkakaigwa nin kapakipakinabang na epekto. Mangnoha kun paano ipinahayag ni apostol Pablo an pagkompiar na iyan, arog kan nasusurat sa 1 Tesalonica 4:1-​12; 2 Tesalonica 3:4, 5; asin Filemon 4, 8-⁠14, 21.

Kun beses kaipuhan na magpatanid an kamagurangan tumang sa gawe-gaweng bakong madonong. Alagad an kapakumbabaan matabang sa sainda na trataron an saindang mga tugang sa espiritu nin kahoyoan. (Gal. 6:1) An pagkasabi nin mga bagay maninigong magpaheling na an mga miembro kan kongregasyon iginagalang. (1 Ped. 5:2, 3) Hinahatolan kan Biblia an hoben na mga lalaki na nangorognang makarealisar kaini. (1 Tim. 4:12; 5:1, 2; 1 Ped. 5:5) Kun kaipuhan na magsagwe, magdisiplina, husayon an mga bagay, ini maninigong gibohon basado sa sinasabi mismo kan Biblia. (2 Tim. 3:16) An pag-aplikar kan Kasuratan maninigo na nungka na ipirit o biribidon an kahulogan tanganing sumuportar sa sarong ideya na dian may makosog na mga opinyon an nagpapahayag. Dawa kun kaipuhan an hatol na nagtatanos, mapagdadanay na positibo an tono kan pahayag kun sa pangenot an tatawan nin pagdodoon iyo an kun paano malilikayan na mapalabot sa paggibo nin sala, kun paano reresolberan an mga problema, kun paano mapanggaganahan an mga kadepisilan, kun paano itatanos an salang dalan, asin kun paano kita iniingatan kan mga kahagadan ni Jehova.​—Sal. 119:1, 9-16.

Kun inaandam an saindong pahayag, tawan nin espesyal na pag-isip-isip kun paano nindo tataposon an lambang prinsipal na punto asin an pahayag sa kabilogan. An huri nindong sasabihon parate na iyo an pinakahaloy na magigirumdoman. Magigin positibo daw iyan?

Kun Nakikipag-olay sa mga Kapagtubod. Inaapresyar nin mga lingkod ni Jehova an mga oportunidad na makiasosyar sa Kristianong mga pagtiripon. Ini mga panahon nin espirituwal na pagparepresko. Sinasadol kita kan Biblia na isaisip an ‘pagparinigonan nin boot’ kun kita nagtitiripon sa satong mga lugar nin pagsamba. (Heb. 10:25) Nagigibo iyan bako sanang nin mga pahayag asin komento durante kan pagtiripon kundi siring man nin pag-orolay bago asin pagkatapos kan pagtiripon.

Minsan ngani normal na mapag-orolayan an buhay niato sa aroaldaw, an pinakadakulang pagparigon sa boot makukua sa pag-orolay sa espirituwal na mga bagay. Kabale digdi an mga eksperyensia niato sa sagradong paglilingkod. Nakapakokosog man an pagpaheling nin nakararahay na interes sa lambang saro.

Huli sa impluwensia kan kinaban sa palibot niato, kaipuhan na magmaan. Kan magsurat sa mga Kristiano sa Efeso, sinabi ni Pablo: “Ngonyan na nahale na nindo an kaputikan, an lambang saro sa saindo magtaram nin katotoohan sa saiyang kapwa.” (Efe. 4:25) Kabale sa pagtaram nin katotoohan imbes na kaputikan an dai pagpamuraway sa mga bagay asin tawo na iniidolo kan kinaban. Siring man, nagpatanid si Jesus tumang sa “mapandayang kapangyarihan nin kayamanan.” (Mat. 13:22) Kaya kun nag-oorolay-olay, kaipuhan na magmaan kita na dai pagpalakopon an pandadayang iyan paagi sa paggibo sa pagkaigwa nin materyal na mga bagay na garo nakaaakit.​—1 Tim. 6:9, 10.

Kan naghahatol manongod sa pangangaipo na magin nakapakokosog, sinasadol kita ni apostol Pablo na dai paghusgaran o menoson an tugang na tibaad naglilikay sa nagkapirang bagay huli sa “mga kaluyahan sa saiyang pagtubod,” sa ibang pagtaram, huli ta dai nia nasasabotan an bilog na sakop kan Kristianong katalingkasan. Tunay nanggad, tangani na an satong pakikipag-olay makapakosog sa iba, dapat na konsideraron niato an saindang pinaghalean asin an itinalubo na ninda sa espirituwal. Abaa kamakamomondo na “magbugtak nin singkogan o dasmagan sa atubangan nin tugang”!​—Roma 14:1-4, 13, 19.

An mga may magagabat na personal na problema​—halimbawa, pabalikbalik na helang​—nagpapasalamat sa nakapakokosog na orolay. An siring na tawo tibaad dakula an ginibong paghihingoa na makaatender sa pagtiripon. Tibaad ihapot kan mga nakaaaram sa saiyang situwasyon: “Kumusta po an pagmate nindo?” Daing duwa-duwa na pasasalamatan nia an saindang pagmalasakit. Minsan siring, tibaad para sa saiya an tema kan saiyang salud bakong an pinakanakaparirigon sa boot na pag-olayan. Tibaad mas makapaogma sa puso nia an mga tataramon nin pag-apresyar asin komendasyon. May naheheling daw kamong tanda kan padagos niang pagkamoot ki Jehova asin kan pakatagal nia sa irarom nin depisil na situwasyon? Naparirigon daw an boot nindo kun sia nagkokomento? Bako daw na tibaad mas nakapakokosog na darahon an atension sa saiyang mga kakosogan asin sa ikinakokontribwir nia sa kongregasyon imbes na sa saiyang mga limitasyon?​—1 Tes. 5:11.

Tangani na makapakosog an satong pakikipag-olay, nangorognang importante na konsideraron an punto de vista ni Jehova sa pinag-oolayan. Sa suanoy na Israel, an mga nagtaram tumang sa mga representante ni Jehova asin nagreklamo manongod sa mana nakanamit kan grabeng kaanggotan nin Dios. (Bil. 12:1-16; 21:5, 6) Pinatutunayan niato na nakinabang kita sa mga halimbawang idto kun nagpapaheling kita nin paggalang sa kamagurangan asin nin pag-apresyar sa espirituwal na kakanon na itinatao paagi sa grupong fiel asin may diskresion na oripon.​—1 Tim. 5:17.

Bihirang magin problema an pakahanap nin kapakipakinabang na mga mapag-oolayan kun kaiba an satong Kristianong mga tugang. Minsan siring, kun sobra kamatatsar an mga komento nin saro, kamo na an magsadiring boot na darahon an orolay sa nakapakokosog na direksion.

Baga man kita naghuhulit sa iba, nagtataram sa plataporma, o nakikipag-olay sa mga kapagtubod, maggamit logod kita nin pakamansay tangani na mapaluwas gikan sa kayamanan kan satong puso an “ano man na tataramon na marahay para sa pagpakosog siring sa kinakaipuhan, tangani na ikatao kaiyan an paborable sa mga nagdadangog.”​—Efe. 4:29.