Kun Paano Paooswagon an Abilidad sa Pakikipag-olay

PASIL daw para sa saindo sa pankagabsan an makipag-olay sa iba? Para sa dakol, an mismong ideya na makipag-olay, nangorogna sa saro na dai ninda midbid, ginigikanan nin kahaditan. Tibaad masusopgon an siring na mga tawo. Tibaad iniisip-isip ninda: ‘Ano daw an ipakikipag-olay ko? Paano ko poponan an orolay? Paano ko iyan ikapagpapadagos?’ An kompiado, makiamigong mga tawo tibaad may tendensiang dominaron an orolay. Tibaad an kadepisilan para sa sainda enganyaron na magtaram an iba asin makanood na maghinanyog sa sinasabi. Kaya kita gabos, baga man masusopgon o makiamigo, kaipuhan na padagos na magkultibar kan teknika sa pakikipag-olay.

Pumoon sa Harong

Tanganing mapaoswag an abilidad nindo sa pakikipag-olay, taano ta dai pumoon sa harong? An nakapakokosog na orolay dakula an ikakokontribwir sa kaogmahan kan pamilya.

An pangenot na nagdedeterminar na bagay sa siring na orolay iyo an hararom na pagmakolog sa lambang saro. (Deut. 6:6, 7; Tal. 4:1-4) Kun kita may pagmakolog, kita nagkokomunikar, asin naghihinanyog kita kun may gustong sabihon an iba. An saro pang importanteng bagay pagkaigwa nin kapakipakinabang na masasabi. Kun kita may regular na programa nin personal na pagbasa kan Biblia asin pag-adal, dakol kitang ikaeestorya. An madonong na paggamit kan pulyetong Pagsiyasat sa Kasuratan Aroaldaw puedeng makapukaw nin orolay. Sa laog kan aldaw, tibaad may nakagagayagaya kitang eksperyensia sa paglilingkod sa langtad. Tibaad may mabasa kitang nakapagtotokdo o makangingisi. Maninigo na ugaleon niato na iestorya an mga bagay na ini sa panahon nin kapakipakinabang na orolay kan pamilya. Ini makatatabang man sa sato na makipag-olay sa mga tawo sa luwas kan pamilya.

Pakikipag-olay sa Estranghero

Dakol an nag-aalangan na ponan an pakikipag-olay sa saro na dai ninda midbid. Alagad huli sa pagkamoot sa Dios asin sa saindang kapwa, an Mga Saksi ni Jehova odok na naghihingoa na makanood kun paano makipag-olay tangani na ikapaabot sa iba an mga katotoohan sa Biblia. Ano an makatatabang sa saindo na umoswag sa bagay na ini?

Mahalaga an prinsipyo na sinasabi sa Filipos 2:4. Ineenkaminar kita na magrisa, “bakong sa personal na interes sa sadiri sana [niatong] mga bagay-bagay, kundi siring man sa personal na interes sa mga bagay-bagay kan iba.” Isip-isipa iyan nin arog kaini: Kun dai pa nindo noarin man nakamidbid kaidto an tawo, an pagheling nia sa saindo estranghero. Paano nindo mapapamugtak an boot nia? Makatatabang an may init na huyom asin makikatood na pataratara. Alagad labi pa dian an dapat konsideraron.

Tibaad naabala nindo an iniisip nia. Kun hingoahon nindong sia makipag-olay manongod sa nasa isip nindo, na kamo daing labot sa nasa isip nia, paborable daw an magigin reaksion nia? Ano an ginibo ni Jesus kan manuparan nia an sarong babae sa sarong bobon sa Samaria? An isip kaini nasa pagsakdo nin tubig. Pinonan ni Jesus an pakikipag-olay nia sa babae basado dian, asin dai nahaloy nagibo na nia iyan na bibong orolay sa espirituwal.—Juan 4:7-26.

Kun kamo mapagmasid, puede man nindong mamansayan kun ano an tibaad iniisip nin mga tawo. Maogma daw o mamondo an tawo? Sia daw may edad na, tibaad maluya an hawak? Nakakaheling daw kamo nin ebidensia na may mga aki sa harong? Garo daw may kaya sa materyal an tawo o naglalapigot siang makakua kan mga pangangaipo sa buhay? Ipinaririsa daw nin mga dekorasyon sa harong o nin personal na alahas an relihiosong impluwensia? Kun kinokonsiderar kan pataratara nindo an siring na mga bagay, tibaad helingon kamo kan tawo na saro na kapareho nia sa interes.

Kun dai nindo nakakaatubang mismo an kagharong, tibaad nadadangog sana an boses nia sa barat na pinto, ano an puede nindong ikonklusyon? Tibaad nabubuhay sa takot an tawo. Puede daw nindong gamiton an impormasyon na iyan tanganing makapoon nin orolay dawa serado an pinto?

Sa nagkapirang lugar posible na enganyaron an sarong tawo na makipag-olay paagi sa pag-estorya sa saiya manongod sa saindong sadiri—an saindong pinaghalean, kun taano kamo ta nagduman sa harong nia, kun taano kamo ta nagtutubod sa Dios, kun taano kamo ta nagpoon na mag-adal kan Biblia, asin kun paano kamo natabangan kan Biblia. (Gibo 26:4-23) Siempre, ini kaipuhan na gibohon na may diskresion asin may malinaw na obheto sa isip. Ini man tibaad magpahiro sa tawo na mag-estorya man sa saindo manongod sa saiya man sana asin kun ano an punto de vista nia sa mga bagay.

Sa nagkapirang kultura, pinagkatodan na an pag-istimar sa mga estranghero. Tibaad daing pag-alangan kamong agdahon nin mga tawo na dumagos asin tumukaw. Oras na nakatukaw na kamo, kun magalang nindong kukumustahon an pamilya asin sinserong hihinanyogon an simbag, tibaad mag-atento man an kagharong sa sasabihon nindo. An ibang banwaan mas makosog pa ngani an ipinaheheling na interes sa mga bisita, kaya tibaad halawig an preliminaryong mga pataratara. Mantang ginigibo iyan, tibaad marisa ninda na kapareho ninda kamo sa nagkapirang bagay. Ini puedeng magbunga nin kapakipakinabang na espirituwal na orolay.

Ano kun dakol an tawo sa lugar nindo na laen man an lenguahe sa saindo? Paano nindo maaabot an mga tawong ini? Kun aadalan nindo dawa an simpleng pataratara sa nagkapira sa mga lenguaheng iyan, marerealisar nin mga tawo na interesado kamo sa sainda. Tibaad magbukas ini kan dalan para sa dugang pang komunikasyon.

Kun Paano Ipagpapadagos an Orolay

Tanganing magpadagos an orolay, magin interesado sa nasa isip kan kaolay nindo. Enkaminaron siang ipahayag an nasa boot nia kun gusto nia. Makatatabang an piling mga hapot. Pinakamarahay an mga hapot sa punto de vista ta parate na an simbag na dinadagka kaiyan bako sanang iyo o dai. Halimbawa, pakasambita kan sarong problema na ikinapupurisaw sa lokal, puede nindong ihapot: “Ano sa paghona nindo an nagin dahelan kan situwasyon na ini?” o “Ano sa paghona nindo an remedyo?”

Kun kamo naghapot, atentong hinanyogon an simbag. Iparisa an tunay nindong interes paagi sa sarong komento, pagtango, mustra. Dai magsaliot. Bukas an isip, estudyaran an sinasabi. “Magin listo kun dapit sa pagdangog, maluway kun dapit sa pagtaram.” (Sant. 1:19) Kun kamo sumimbag na, ipaheling na talagang naghinanyog kamo sa sinabi.

Minsan siring, aramon na bakong gabos masimbag sa saindong mga hapot. Sa nagkapira tibaad an solamenteng simbag na makua nindo kimlat o huyom. An iba tibaad magsabi sana nin iyo o dai. Dai madesganar. Magpasensia. Dai ipirit an orolay. Kun gustong maghinanyog an tawo, gamiton an oportunidad na ipaabot an nakapakokosog na mga kaisipan sa Kasuratan. Pag-abot nin panahon, tibaad ibilang na kamong katood kan tawo. Dangan tibaad andam na siang mas sueltong isabi an nasa isip nia.

Mantang kinakaolay nindo an mga tawo, tanawon an ngapit. Kun an tawo magpalataw nin dakol na hapot, simbagon an nagkapira alagad itada an saro o duwa para sa sunod nindong pag-oolay. Mag-opresir na magsiyasat, dangan isabi sa saiya an mga resulta. Kun dai sia maghapot, puede nindong taposon an saindong orolay nin hapot na sa paniniwala nindo pagkakainteresan nia. Iopresir na tokaron iyan sa sunod na pagdalaw nindo. Makukua an abundang suplay nin ideya sa librong Reasoning From the Scriptures, brosyur na Ano an Kahagadan sa Sato nin Dios?, asin bagong mga luwas kan An Torrengbantayan saka Awake!

Kun Nasa Kaibanan nin mga Kapagtubod

Kun manuparan nindo sa kaenot-enote an saro pang Saksi ni Jehova, kamo daw nagsasadiring boot na makimidbidan? O nagtitindog sana daw kamo na daing girong-girong? An pagkamoot sa satong mga tugang maninigong magpahiro sa sato na magmawot na mamidbid sinda. (Juan 13:35) Paano kamo makapopoon? Puedeng itao sana nindo an saindong ngaran dangan hagadon an ngaran nia. An paghapot sa saiya kun paano nia nanodan an katotoohan parateng magbubunga nin interesanteng orolay asin makatatabang sa saindo na magkamidbidan kamo. Dawa kun garo baga bakong suelto an pagtaram nindo, iparirisa kan saindong paghihingoa sa kaolay nindo na kamo may pagmakolog sa saiya, asin iyan an importante.

Ano an makakokontribwir sa makahulogan na pakikipag-olay sa sarong miembro kan saindong kongregasyon? Magpaheling nin tunay na interes sa tawo asin sa saiyang pamilya. Natapos pa sana daw an pagtiripon? Komentohan an mga punto de vista na naheling nindo na nakatatabang. Ini puedeng magin kapakipakinabang sa saindong duwa. Puede kamong sumambit nin sarong interesanteng punto hale sa bagong luwas kan An Torrengbantayan o Awake! Dai ini maninigong gibohon bilang pagpasikat o pagbalo sa kaaraman. Gibohon iyan tanganing ikasabi an sarong bagay na espesyalmenteng ikinaogma nindo. Puede nindong pag-olayan an asignasyon kan saro sa saindo sa Teokratikong Paadalan sa Pagmiministro asin magtinawanan nin ideya sa kun paano iyan gigibohon. Puede man kamong mag-estorya nin mga eksperyensia sa ministeryo sa langtad.

Siempre, an interes niato sa mga tawo parateng nagbubunga nin orolay manongod sa mga tawo—an mga sinasabi asin ginigibo ninda. Puede man na magin kabtang kan satong orolay an pagpangisi. Magigin nakapakokosog daw an satong sinasabi? Kun isasapuso niato an hatol kan Tataramon nin Dios asin minomotibar kita nin diosnon na pagkamoot, seguradong magigin nakapakokosog an satong pagtaram.—Tal. 16:27, 28; Efe. 4:25, 29; 5:3, 4; Sant. 1:26.

Bago kita makikabtang sa ministeryo sa langtad, nag-aandam kita. Taano ta dai mag-andam nin interesanteng burobareta na ikaeestorya sa pakikipag-olay sa mga katood? Mantang nakababasa asin nakadadangog kamo nin interesanteng mga bagay, tandaan an mga punto na gusto nindong ipaabot sa iba. Pag-abot nin panahon, magkakaigwa kamo nin abundang suplay na pagpipilian. An paggibo kaini magpapangyari sa saindo na madagdagan an ikakakomento nindo apuera sa pan-aroaldaw na rutina sa buhay. Orog sa gabos, an saindo logod na pagtaram magtao nin ebidensia kun gurano kamahalagang marhay para sa saindo an Tataramon nin Dios!—Sal. 139:17.