Pag-aatubang kan Maogmang Bareta na May Pagkaapurado
1 Ipinaheheling niato an satong hararom na pag-apresyar sa mga panuga kan Kahadean nin Dios paagi sa pakikikabtang nin bilog na puso sa Kristianong ministeryo. Kaipuhan niatong makikabtang sa gibohon na ini na may pagkaapurado. Taano? Huli ta kadikit an mga trabahador, naghaharani na an katapusan kaining maraot na palakaw nin mga bagay, asin namemeligro an buhay kan mga nasa teritoryo niato. (Ezeq. 3:19; Mat. 9:37, 38) Paano kita makapaheheling nin pagkaapurado sa satong aktibidad sa langtad? Paagi sa patienot na pag-andam nin marahay na mga pag-atubang, paagi sa paghanap sa mga tawo saen man sinda puedeng manompongan, paagi sa pagkaigwa nin rekord kan gabos na nagpapaheling nin interes asin pagbalik tolos-tolos tangani na makultibar an interes na iyan. An minasunod na mga suhestion puedeng makatabang mantang iinaatubang niato an maogmang bareta na may pagkaapurado ngonyan na Pebrero. An iaalok librong Creation.
2 Puede kamong makapoon nin pakipag-olay paagi sa pagsambit sa halipot nin nagkapirang problema na inaatubang sa komunidad, dangan puede nindong sabihon:
◼ “Dakol na tawo an naniniwala na igwang Dios, alagad naghohorophorop sinda: ‘Anong klase nin ngapit an boot nia para sa sato?’ Paano nindo sisimbagon iyan? [Pasimbagon.] Aram daw nindo na malinaw na ipinaliliwanag kan Biblia an kabotan nin Dios para sa katawohan asin an mga lakdang na ginigibo nia tangani na hamanon iyan?” Buksan sa pahina 239 kan librong Creation. Basahon an Kapahayagan 21:4 sa parapo 13. Ipaheling an mga retrato sa pahina 237 sagkod 239 tangani na iilustrar kun ano an boot sabihon kaini para sa satong ngapit. Ialok an libro. Iareglo an sarong kombenyenteng panahon na madalaw liwat tangani na ipadagos an pag-orolay.
3 Puede nindong idagos an nakaaging pag-orolay manongod sa Kapahayagan 21:4 paagi sa halipot na pag-atubang na ini:
◼ “Kan nakaagi kong pagdalaw, nag-olay kita manongod sa panuga nin Dios na mag-andam nin sarong bagong daganon na sosyedad para sa katawohan. [Darahon giraray an atension sa retrato na nasa pahina 237 kan librong Creation.] Boot daw nindong maheling an saindong pamilya na nagkakamit nin siring kagayagayang mga kamugtakan? [Pasimbagon.] An hapot, Gurano kamasasarigan an mga panuga nin Dios? Mangnoha tabi an sinasabi nia mismo.” Basahon an Kapahayagan 21:5, 6a. Ihapot an nasusurat na hapot para sa parapo 13 asin 14 sa pahina 239, asin basahon an simbag. Sambiton an alok na pag-adal sa Biblia na mayong bayad. Iareglo na idemonstrar iyan sa huri.
4 Mantang dakol an nahahadit dapit sa nagdadakol na problema na inaatubang nin katawohan, puede kamong magsabi nin siring kaini sa enot na pagsongko:
◼ “An gabos na nanonompongan ko nahahadit manongod sa mga problema na inaatubang niato sa satong komunidad. [Sambiton an pira.] Sa laog nin dakol na dekada nanuga an mga politiko na magtatao nin mga solusyon, asin prinobaran nin nagkapira na gibohon iyan. Ano sa paghona nindo an nagkacausa na padagos na grumabe an mga kamugtakan? [Pasimbagon.] Ipinaliliwanag kan Biblia na ini huli ta kita nabubuhay na sa pagtatapos kan palakaw nin mga bagay.” Basahon an Mateo 24:3 sa pahina 223, parapo 20 kan librong Creation, dangan basahon an mga tema sa parapo 22-27 na nasa pahina 224 asin 225 patin hapoton an kagharong kun minaoyon sia na nangyayari an mga ini ngonyan. Ialok an libro asin iareglo na madalaw liwat asin pag-olayan kun paano reresolberan nin Dios an mga problema nin katawohan.
5 Kun nanuga kamong madalaw liwat tangani na ipaliwanag an solusyon nin Dios sa mga problema ngonyan, puede nindong probaran an pagdolok na ini:
◼ “Guminibo ako nin espesyal na paghihingoa na bumalik tangani na ikapadagos niato an satong pag-orolay manongod sa tunay na solusyon sa mga problema na inaatubang nin katawohan. Kan nakaagi kong pagsongko, nasabotan niato na inaapod kan Biblia an satong panahon na an pagtatapos kan palakaw nin mga bagay. Ano an boot sabihon kaini para sa sato? Iyan nangangahulogan na sa dai na mahahaloy hahaleon nin Dios an bilog na maraot na palakaw na ini asin sasalidahan iyan nin sarong bagong palakaw.” Basahon asin ipaliwanag an Kapahayagan 21:1, 4. Paagi sa paggamit kan retrato na nasa pahina 4-5 kan librong Kaaraman, ipaheling kun ano an magigin mga kamugtakan kun dumatong na an bagong palakaw. Ialok an pag-adal sa Biblia asin probaran na ponan iyan tolos-tolos.
6 Huli sa kadakoldakol na tawong interesado sa palibot, puede nindong sabihon an arog kaini tangani na makabukas nin pag-orolay:
◼ “Nadiskobre niamo na haros gabos nahahadit dapit sa polusyon sa satong aire, tubig, asin pagkakan. Sa nagkapirang nasyon an kamugtakan kan palibot naghuhuma na sa buhay. Huling an Dios an Kaglalang kan daga, ano sa paghona nindo an gigibohon nia manongod kaini? [Pasimbagon.] Nagsasabi an Biblia na papaninimbagon kita nin Dios sa kun paano niato ginagamit an planeta. [Basahon an Kapahayagan 11:18b.] Imahinara an pamumuhay sa sarong daga na mayo na kan gabos na polusyon!” Idoon an panuga nin Dios na sarong paraiso, siring kan ipinaheheling sa Kapahayagan 21:3, 4. Ipaheling an retrato na nasa pahina 237 kan librong Creation. Ialok an libro asin iareglo na madalaw liwat.
7 Kun minadalaw liwat sa saro na nagpaheling nin interes sa dagang Paraiso, puede nindong sabihon:
◼ “Kan nakaagi kong pagsongko, uminoyon kita na tangani na maresolberan an problema manongod sa daga na may polusyon, kaipuhan nin Dios na mag-interbenir sa mga gibo-gibo nin tawo. Alagad an hapot, Ano an dapat niatong gibohon tangani na makaligtas pasiring sa matanos na bagong kinaban na gigibohon nin Dios?” Basahon an Juan 17:3. Agdahon an kagharong na aprobetsaran an satong kurso nin pag-adal sa Biblia na mayong bayad tangani na magkamit kan espesyal na kaaraman na ini.
8 Kanigoan na pribilehio na gamiton bilang modernong aldaw na mga paraani asin gumibo nin nagliligtas-buhay na paghuhulit! Kita logod gabos magdanay na sibot sa pag-atubang kan maogmang bareta na may pagkaapurado, ‘sa pakaaram na an satong pagpapagal bakong daing kapakanan.’—1 Cor. 15:58.