Tabangan an Iba na ‘Magkuyog kan mga Bagay na Nasusurat’
1 Bakong igo na ‘magdangog’ sana kan mga tataramon kan mga hula sa Kapahayagan. Tanganing lubos na makinabang, kaipuhan na an saro ‘magkuyog’ sa nasusurat. (Kap. 1:3) An pagpasakamot nin literatura enot sanang tangga pasiring sa paggibo nin mga disipulo. Oras na manompongan ta an mga andam na magdangog, maninigo kitang bumalik tolos tanganing tabangan sinda na makanood nin dakol pa. Ano an satong sasabihon sa satong pagdalaw liwat?
2 Kun nagtaram kamo kan enot nindong pagsongko manongod sa simbolikong apat na parakabayo, puwede nindong ponan an saindong pag-orolay nin arog kaini:
◼ “Kan nakaagi nag-olay kita dapit sa pangangabayo kan simbolikong apat na parakabayo na maresulta sa dakol na kadahasan asin kasakitan digdi sa daga. Naheling ta ining nangyayari sa atubang mismo kan satong mga mata. Dakol an naghohorophorop kun noarin matatapos an kasakitan na ini tanganing magkamit kita nin buhay sa sarong matoninong na kinaban. Ano an saindong opinyon? [Pasimbagon.] Interesado an mga disipulo ni Jesus sa simbag sa hapot na ini.” Basahon an Mateo 24:3, kun saen pinalataw an hapot, dangan an bersikulo 34, kun saen itinao ni Jesus an simbag.
3 Kun ipinakipag-olay nindo an Kahadean nin Dios sa enot na pagdalaw, puwede kamong magpadagos paagi sa paghapot nin:
◼ “Sa saindong opinyon, anong klaseng gobyerno an kinakaipuhan tanganing mapanigoan an gabos na pangangaipo nin katawohan? [Pasimbagon. Basahon an Jeremias 10:23.] Siring kan naheheling nindo, nungkang katuyohan nin Dios na an tawo an magdirehir kan saiya mismong mga aktibidad. An mga pagprobar na gibohon iyan na mayo kan tabang nin Dios iyo an dahelan kan kadaklan na problema niato. An Kahadean nin Dios iyo an solamenteng gobyerno na makapagtatao kan kaipuhan niato.” Buksan sa pahina 230 kan librong Reasoning, asin pag-olayan an mga teksto sa irarom kan enot na subtema. Mag-areglo na ipadagos an pag-orolay sa masunod na semana.
4 Puwedeng boot nindong probaran ini sa pagpoon nin pag-orolay sa Kasuratan:
◼ Ipaheling an ilustrasyon sa pahina 302 kan librong Revelation, asin ipaliwanag: “Mag-oogma an katawohan sa mga kamugtakan na ini kun gibohon na an kabotan nin Dios digdi sa daga kun paano sa langit. Minsan siring, may mga natatakot na mabuwelta liwat an mararaot na kamugtakan. Magigin imposible iyan huli ta an gabos na maraot mawawara na.” Basahon an Salmo 37:10, 11. Agdahon an kagharong na aprobetsaran an satong programa sa pag-adal sa Biblia tanganing dakol pa an manodan.
5 Kun iwinalat nindo an tract na “Life in a Peaceful New World”:
◼ Puwede nindong itokdo an ilustrasyon sa atubangan dangan basahon an parapo 1 sa irarom kan temang “Life in God’s New World.” Dangan magsabi: “Kun gusto niatong mabuhay sa sarong kinaban na arog kaiyan, igwa nin sarong bagay na importante na kaipuhan tang gibohon.” Basahon an ultimong parapo, asin ialok an librong Revelation.
6 Mantang an satong katuyohan iyo na makapoon nin mga pag-adal sa Biblia, mag-iskedyul nin panahon para sa mga pagdalaw liwat, asin mag-andam nin marhay. Paagi kaini tunay kitang makakatabang sa mga sadiosan an puso.—Kap. 22:6, 7.