Pagbalangibog ‘kan mga Tataramon kan Hula’
1 Dakol na tawo an gustong maaraman an kahulogan kan nakaiistorbong mga pangyayari ngonyan. Makikinabang sinda sa ‘pagdangog sa mga tataramon’ kan hula kan Kapahayagan. (Kap. 1:3) Ngonyan na Marso, magkakaigwa kita nin oportunidad na tabangan sinda paagi sa pag-alok kan librong Revelation. Ano an puwedeng sabihon niato?
2 Puwedeng magin epektibo an pag-atubang na ini:
◼ “An guerra, gutom, asin helang dinamat an katawohan sa ika-20 siglong ini. Taano ta arog kaini mantang an tawo nakagibo na nin kadakoldakol na teknikal na pag-oswag? [Pasimbagon.] Dakol an nagngangalas na manodan na ihinula ini sa Biblia. Posibleng nadangog nindo an dapit sa ‘apat na parakabayo kan Apocalipsis.’ Ini sa aktuwal sarong hula na naootob ngonyan. [Buksan an librong Revelation sa kapitulo 16, asin ipaheling an mga ilustrasyon sa pahina 91-7.] Mantang ihinuhula kaiyan an sarong panahon nin dakulang kasakitan, iyan nagtatao man nin paglaom. [Basahon an Kapahayagan 6:2 sa parapo 3.] An Nangangabayo sa puting kabayo iyo si Jesu-Cristo. Paagi sa saiyang Kahadean, nanuga siang dadaogon an karatan asin magdadara nin sarong kinaban na may kaogmahan asin katoninongan.” Ialok an libro.
3 Tibaad an hapot na ini puwedeng makapukaw nin interesanteng pag-orolay:
◼ “Ano sa paghona nindo an kinakaipuhan tanganing mahale an maraot na mga kamugtakan sa kinaban? [Pasimbagon.] Dakol na tawo an minaoyon na igwa nin pangangaipo para sa marikas na mga pagliliwat kun boot na magdanay an kinaban na ini. Ipinaheheling kan Biblia na aram nin Dios an dapat na gibohon asin nanuga na reresolberan an satong mga problema.” Buksan an librong Revelation, sa pahina 171, asin basahon an Kapahayagan 11:15 sa parapo 1. Buksan an mga ilustrasyon sa pahina 302 asin 308, asin idoon an mga bendisyon sa pagsakop kan pamamahala ni Cristo. Dangan ipaliwanag kun paano sinda personal na makikinabang.
4 Puwede kamong maogma sa pagsabi nin siring kaini:
◼ “Dakol na tawo na nakabasa kan libro sa Biblia na Kapahayagan an nanompongan iyan na depisil saboton. Naglaladawan iyan nin manlaenlaen na pambihirang karakter asin pangyayari. An librong ini, an Revelation—Its Grand Climax At Hand!, nagtatao nin bersikulo-por-bersikulong paliwanag kan bilog na libro nin Kapahayagan asin nagpapaheling kun paano kita personal na naaapektaran kan kaotoban kaiyan.” Buksan an libro sa pahina 15, parapo 2, asin itokdo an Kapahayagan 1:1, na nasa maitomon na mga letra. Ipaliwanag na an siring na klase nin mga komento itinatao para sa kada bersikulo sa libro nin Kapahayagan. Ialok an libro.
5 Kun sibot an tawo o bako kamong sierto kun igwa sia nin igong interes, puwede kamong magwalat nin sarong magasin o tract. Kun kamo bumalik asin nagpaheling nin interes, puwedeng ialok an libro.
6 An mensahe na yaon sa Kapahayagan nakakaapektar sa gabos na katawohan. Kaya an gabos kaipuhan na makadangog kan mga tataramon kan hula, Gibohon ta logod an gabos niatong makakaya na ibalangibog an mahalagang mensaheng ini.