An Pinakamahalagang Pangyayari sa Kasaysayan nin Tawo
1 Nagdigdi si Jesus sa daga sa pagboot kan saiyang Ama tanganing magpatotoo sa katotoohan na magiya sa sato pasiring sa buhay na daing katapusan. (Juan 18:37) An saiyang kaimbodan sagkod sa kagadanan nagtaong onra ki Jehova, nagpakangbanal sa ngaran nin Dios, asin nagtao nin pantubos. (Juan 17:4, 6) Ini an guminibo sa kagadanan ni Jesus na an pinakamahalagang pangyayari sa bilog na kasaysayan nin tawo.
2 Poon sa paglalang ki Adan, nagkaigwa nin duwa sanang sangkap na tawo na nabuhay sa ibabaw kan dagang ini. Si Adan nasa kamugtakan na magtao nin makangangalas na mga bendisyon sa saiyang dai pa namumundag na mga aki. Imbes, may kapasloan siang nagrebelde, na kinokondenar sinda sa makaheherak na pag-eksister na matatapos sa kagadanan. Kan dumatong si Jesus, nagpaheling sia nin sangkap na kaimbodan asin pagkuyog, na binubuksan an oportunidad para sa buhay na daing katapusan sa gabos na naggigibo nin pagtubod.—Juan 3:16; Roma 5:12.
3 Mayo nang ibang pangyayari na ikakokomparar sa sakripisyal na kagadanan ni Jesus. Liniwat kaiyan an dalagan kan kasaysayan nin tawo. Nagtao iyan kan basihan para sa pagbuhay liwat sa binilyon na tawo hale sa mga gadan. Ibinugtak kaiyan an pundasyon para sa daing katapusan na Kahadean na matapos kan karatan asin gigibohon na sarong paraiso an daga. Sa katapustapusi patatalingkason kaiyan an gabos na katawohan gikan sa gabos na klase nin karingisan asin pan-ooripon.—Sal. 37:11; Gibo 24:15; Roma 8:21, 22.
4 Ini gabos nagtatabang sa sato na masabotan kun taano ta tinokdoan ni Jesus an saiyang mga disipulo na girumdomon an saiyang kagadanan paagi sa pagselebrar kan Memorial kada taon. (Luc. 22:19) Inaapresyar an kahulogan kaiyan, inaantisipar niato an pakipagtipon sa mga kongregasyon kan mga Saksi ni Jehova sa bilog na kinaban pagkasolnop kan aldaw sa Biyernes, Abril 14. Bago kan panahon na iyan, marahay na basahon nin iriba bilang pamilya an mga tala sa Biblia manongod sa huring mga aldaw ni Jesus digdi sa daga asin sa saiyang mapusong paninindogan para sa katotoohan. (An irinirekomendar na mga teksto nakalista sa satong 1995 Calendar, Abril 9-14.) Nagtao sia nin arogan para sa sato sa pagtao nin debosyon sa satong Kaglalang. (1 Ped. 2:21) Gibohon niato an pinakamakakaya niato na imbitaran an satong mga katood asin pamilya, siring man an mga estudyante sa Biblia asin iba pang interesadong tawo, sa mahalagang pagtiripon na ini. Ipaliwanag nin patienot kun ano an mangyayari asin an kahulogan kan mga emblema.—1 Cor. 11:23-26.
5 Maninigong iplanong marhay nin patienot kan mga magurang na siertohon na an Kingdom Hall areglado asin malinig. An mga areglo maninigong gibohon para sa saro na madara kan mga emblema. An pagserbi kan mga emblema maninigong organisadong gayo. An nakakatabang na mga suhestion sa kun paano kita makakapaheling nin paggalang sa Pamanggihan kan Kagurangnan itinao sa The Watchtower na Pebrero 15, 1985, pahina 19. Magigin angay na marhay para sa kongregasyon na mag-areglo nin mahiwas na mga akitibidad nin paglilingkod sa langtad durante kan nagkapirang aldaw bago kan pagselebrar siring man nagkapirang aldaw kasunod kaiyan.
6 Kan nakaaging taon, may total na 12,288,917 an nag-atender sa bilog na kinaban para sa paggirumdom kan mahalagang pangyayaring ini. Mantang iyan an pinakamahalagang aldaw sa satong kalendaryo, kita gabos maninigong magin presente.